Abɛi 11:1-31

  • Mɔ ni yeee etsuinaa sane lɛ hiɛ kã shi (2)

  • Mɔ ni ekwa Nyɔŋmɔ lɛ kɛ hiɛkpatamɔ baa mɛi anɔ (9)

  • “Kɛ́ ŋaawolɔi pii yɛ lɛ, ayeɔ omanye” (14)

  • Mɔ ni hãa mɔ nɔ lɛ baashwere (25)

  • Mɔ ni kɛ ehiɛ fɔ̃ɔ eninamɔ nɔ lɛ baagbee shi (28)

11  Yehowa miihi nsɛnii ni ejaaa,*Shi enáa nsɛni tɛ ni ja* he miishɛɛ.+   Kɛ́ mɔ ko bɔi etsuinaa saneyeli pɛ, hiɛgbele nyiɛɔ sɛɛ,+Shi mɔ ni yeee etsuinaa sane lɛ, ehiɛ kã shi.+   Mɛi ni ja lɛ, amɛnɔkwayeli lɛ ni tsɔɔ amɛ gbɛ,+Shi mɛi ni yeee anɔkwa lɛ, amɛmalemɔ lɛ ni baakpãtã amɛhiɛ.+   Ninámɔ* he baŋ sɛɛnamɔ yɛ mlifu gbi lɛ nɔ,+Shi jalɛ nifeemɔ ji nɔ ni baajie mɔ yɛ gbele mli.+   Mɔ ni sane ko bɛ ehe lɛ, ejalɛ nifeemɔi lɛ hãa egbɛ jaa,Shi mɔ fɔŋ baagbee shi yɛ efɔŋ ni lɛ diɛŋtsɛ efeɔ lɛ hewɔ.+   Mɛi ni ja lɛ, amɛnɔkwayeli lɛ ni baahere amɛ,+Shi mɛi ni yeee anɔkwa lɛ, nibii ni amɛshweɔ lɛ nɔŋŋ ni baadu amɛ.+   Kɛ́ mɔ fɔŋ gbo lɛ, ehiɛnɔkamɔ feɔ efolo;Ni nibii ni ekwɛɔ gbɛ yɛ hewalɛ ni eyɔɔ lɛ hewɔ lɛ hu feɔ efolo.+   Ajieɔ jalɔ yɛ haomɔ mli,Ni mɔ fɔŋ yayeɔ enajiaŋ.+   Mɔ ni ekwa Nyɔŋmɔ lɛ* kɛ enaabu kpãtãa enyɛmi gbɔmɔ hiɛ,Shi nilee nɔ atsɔɔ ahereɔ jalɔi ayiwala.+ 10  Nibii kpakpai ni jalɔi feɔ lɛ hãa maŋ nyaa,Ni kɛ́ mɛi fɔji ahiɛ kpãtã lɛ, abɔɔ oshe.+ 11  Jalɔi ajɔɔmɔ wóɔ maŋ nɔ,+Shi mɛi fɔji anaabu kumɔɔ maŋ shwieɔ shi.+ 12  Mɔ ni bɛ jwɛŋmɔ* lɛ, enyaŋeɔ enyɛmi gbɔmɔ,*Shi mɔ ni kɔɔ sane sɛɛ jogbaŋŋ lɛ, emɔɔ enaabu mli.+ 13  Mɔ ni wieɔ mɔ he efɔŋ lɛ, egbɛɔ saji ni mɛi kɛ lɛ pɛ wie lɛ eshwãa,+Shi anɔkwafo* kɛ saji ni mɛi kɛ lɛ pɛ wie lɛ toɔ.* 14  He ni kudɔmɔ* kpakpa bɛ lɛ, maŋ gbeɔ shi,Shi kɛ́ ŋaawolɔi* pii yɛ lɛ, ayeɔ omanye.* + 15  Mɔ fɛɛ mɔ ni damɔɔ mli ehãa mɔkpɔŋ ni miifa shika lɛ, ebaana amane kɛ̃,+Shi mɔ ni etaaa dɛŋ kɛwooo shi lɛ,* ebaahi shi ni oshãra ko ninaaa lɛ. 16  Yoo ni hiɛ yɔɔ nyam* lɛ náa anunyam,+Shi yiwalɔi tiuɔ ninámɔ sɛɛ. 17  Mɔ ni mli hi lɛ,* lɛ diɛŋtsɛ ebaaná he sɛɛ,*+Shi mɔ ni yitsoŋ wa lɛ, ekɛ haomɔ* baa lɛ diɛŋtsɛ enɔ.+ 18  Mɔ fɔŋ lɛ, enáa nyɔmɔwoo gbonyo,*+Shi mɔ ni duɔ jalɛ nii lɛ, enáa jweremɔnɔ kpakpa.+ 19  Mɔ ni fiɔ shi yɛ jalɛ nifeemɔ mli lɛ, ebaaná wala,+Shi mɔ ni tiuɔ efɔŋ sɛɛ lɛ, ebaagbo. 20  Yehowa miihi mɛi ni tsui ekɔ̃dɔ̃ lɛ,+Shi mɛi ni gbɛ ja lɛ hãa enáa miishɛɛ.+ 21  Ná ole akɛ:* Mɔ fɔŋ yeŋ ehe kɔkɔɔkɔ,+Shi jalɔi abii lɛ, abaahere amɛyiwala. 22  Tamɔ bɔ ni shika tsuru ga ji yɛ kplotoo gugɔŋ lɛ,Nakai nɔŋŋ yoo ni he yɔɔ fɛo shi ebɛ jwɛŋmɔ lɛ ji. 23  Nɔ ni jalɔi shweɔ lɛ kɛ nɔ kpakpa baa,+Shi nɔ ni mɛi fɔji ahiɛ kã nɔ lɛ kɛ mlifu baa. 24  Mɔ ko yɛ ni hãa mɔ nɔ,* shi eyaa nɔ enáa pii;+Mɔ ko hu yɛ ni hãaa mɔ nɔ, shi eyeɔ ohia.+ 25  Mɔ* ni hãa mɔ nɔ lɛ, ebaashwere,+Ni mɔ ni hãa mɛi ahe jɔɔ amɛ lɛ,* lɛ diɛŋtsɛ hu ehe baajɔ lɛ.+ 26  Mɔ ni tsĩɔ ŋmaa* naa lɛ, maŋbii lɛ baalomɔ lɛ,Shi mɔ ni hɔ̃ɔ lɛ, amɛbaajɔɔ lɛ. 27  Mɔ ni tiuɔ ekpakpa sɛɛ kɛ hiɛdɔɔ lɛ, eetao hiɛnyam,+Shi mɔ ni tiuɔ efɔŋ sɛɛ lɛ, no nɔŋŋ baaba enɔ kɛ̃.+ 28  Mɔ ni kɛ ehiɛ fɔ̃ɔ eninámɔ nɔ lɛ, ebaagbee shi,+Shi jalɔi baafee frɔ̃frɔ̃ tamɔ baa ŋmɔŋ.+ 29  Mɔ fɛɛ mɔ ni kɛ amane* baa eshĩabii anɔ lɛ, kɔɔyɔɔ baafee egboshinii,+Ni buulu baatsɔ tsulɔ ehã mɔ ni yɔɔ hiɛshikamɔ tsui. 30  Yibii ni jalɔi woɔ lɛ, wala tso ni,+Ni mɔ ni nine shɛɔ susumai* anɔ lɛ, ehiɛ kã shi.+ 31  Kɛ́ awoɔ jalɔ po nyɔmɔ yɛ shikpɔŋ lɛ nɔ lɛ,Enyiɛ nɔŋŋ ni awóŋ mɔ fɔŋ kɛ eshafeelɔ nyɔmɔ!+

Shishigbɛ Niŋmaa

Loo “shishiumɔ nsɛnii.”
Loo “nsɛni tɛ ni eye emuu.”
Loo “Nii ni jara wa.”
Loo “Mɔ ni ebuuu Nyɔŋmɔ lɛ.”
Hebri sht. ŋm., “bɛ tsui.”
Loo “egbeɔ enyɛmi gbɔmɔ he guɔ.”
Hebri sht. ŋm., “mɔ ni yeɔ anɔkwa yɛ mumɔ mli.”
Hebri sht. ŋm., “haa sane nɔ.”
Loo “ŋaawoo.”
Loo “ajinafoi.”
Loo “ekɛ yiwalaheremɔ baa.”
Hebri sht. ŋm., “mɔ ni nyɛɔ dɛ̃taa lɛ.”
Loo “he yɔɔ fɛo.”
Loo “Mɔ ni yɔɔ suɔmɔ ni tsakeee lɛ.”
Loo “eefee lɛ diɛŋtsɛ esusuma ejurɔ.”
Loo “hiɛgbele.”
Loo “amale nyɔmɔwoo.”
Hebri sht. ŋm., “Nine ta nine dɛŋ.”
Hebri sht. ŋm., “gbɛɔ eshwãa.”
Loo “Susuma.”
Hebri sht. ŋm., “kɛ nu shwãa mɛi anɔ yaka lɛ.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “hiɛgbele.”