TOƁERE 8
Fii honɗun Allah accani ko boni e tampere ?
1. Honno bonki fuɗɗori ?
Allah acci yo yimɓe laamo e nder duuɓi heewuɗi, hollugol ɓe ɓe hunnataa fii satteendi tagaaɗo.
Bonki fuɗɗino e oo aduna fewndo Seytaane feni fenaande makko aranere nden. Ado o noddeede Seytaane, hari ko o malaa’ikaajo moƴƴo, kono “ o jaɓaali daraade e goonga ”. (Yuuhanna 8:44.) Hinaa Allah waɗi mo Seytaane. O holluno faale fii yo tagaaɗo rewu mo kanko. O fenani nene Hawaa, o ɗayni mo fii yo o ɗofto mo hara o ɗoftaaki Allah. Baaba Aadama tawti nene Hawaa e yeddugol Allah. Ko fewjoore baaba Aadama nden waɗi si hiɗen tampude e hiɗen maayude. — Janngee Fuɗɗooɗe nden 3:1-6, 19, TMN.
Ɓayri Seytaane yewti nene Hawaa fii wota o ɗofto Allah, ko onsay o fuɗɗi murtinde tagaaɗo ɓaawo Joomiraaɗo on. Yimɓe buy hannde tawti Seytaane e yeddugol Allaahu Lanɗo on. Ko ɗun waɗi ko Seytaane woni “ lanɗo aduna on ”. — Janngee Yuuhanna 14:30 ; 1 Yuuhanna 5:19.
2. Ko Allah tagi kon no wonduno e ella ?
Ko Allah tagi kon fow no moƴƴi e no timmi. Yimɓe e malaa’ikaaɓe ɓe Allah tagi ɓen fow no waawuno ɗoftaade mo (Yaɲɲannde sariyaaji ɗin 32:4, 5, TMN). Allah no tagidi en e hettaare fii no suɓiren waɗugol ko moƴƴi maa ko boni. Nden hettaare no okki en hollugol hiɗen yiɗi Allah. — Janngee Yaaquuba 1:13-15, TMN ; 1 Yuuhanna 5:3.
3. Fii honɗun Allah accani tampere haa oo saa’i ɗoo ?
Fii saa’ihun, Yahuwah no accani ɓee murtuɓe. Fii honɗun ? Ko fii hollugol en, laamagol ɓaawo ballal makko nafataa en (Waajotooɗo on 7:29 ; 8:9, TMN). Ko feƴƴi kon fow e nder duuɓi 6 000 no holli ɗun ko goonga. Lamɓe aduna waawaali lannude gere, bonki, tooɲe maa ɲabbeeli. — Janngee Yeremiiya 10:23, TMN ; Roomu 9:17.
Kono, wonanɓe Laamu Allah ngun heɓoyay nafa ngun laamu (Isaaya 48:17, 18, TMN). Neeɓataa, Yahuwah ittoyay laamu tagaaɗo fow. Ko suɓiiɓe Laamu Allah ngun wonoyta e hoore ndii leydi. — Isaaya 11:9, TMN; Janngee Feɲɲinannde 11:15.
Ndaaree vidio on Fii honɗun Allah accani tampere ?
4. Honno muɲɲaare Allah walliri en ?
Seytaane no wi’i, hay gooto waawataa rewude Allah e hoore laaɓal. On wi’ay ko fenaande ? Hiɗon waawi. Muɲɲaare Allah no walli en no holliren si hiɗen wonani laamu makko ngun maa laamu tagaaɗo. Ngurndan men no holli ko suɓiɗen. — Janngee Ayyuuba 1:8-12 ; Tindi 27:11, TMN.
5. Honno suɓortoɗen Allaahu on ?
Ko suɓiɗen kon no holli si hiɗen faalaa Laamu Allah ngun.
Hiɗen waawi suɓaade Joomiraaɗo on, si en janngi, en waɗi ko o yamiri en kon ka Deftere makko (Yuuhanna 4:23). Hiɗen waawi wikkaade Seytaane si en tawaaka e fii politiki e gere. — Janngee Yuuhanna 17:14.
Seytaane no huutorde mbawdi makko fii ɓantugol dugulayaagal. Kono si en salike waɗude ko boni, hay goreeɓe men ɓen e siɓɓe men ɓen jalay en maa ɓe wikkoo en (1 Petruusu 4:3, 4). Ko ɗun waɗi, hiɗen haani suɓagol. En waaway jokkondirde e yimɓe yiɗuɓe Allah ? En waaway ɗoftaade Allah golliren sariyaaji makko ɗin ? Si en waɗii ɗun, en hollay Seytaane, o fenuno fewndo o wi’i hay gooto ɗoftotaako Allah. — Janngee 1 Korenti 6:9, 10 ; 15:33.
Giggol Allah ngol no holli en ko boni e tampere lannoyay. Ɓee hooliiɓe heɓoyay ngurndan weluɗan e hoore ndii leydi haa poomaa. — Janngee Yuuhanna 3:16.
