E Kauaitaki Iko Dina na Kalou

SA MATAU ga meda kere veivuke vua na Kalou ena gauna eda sotava kina na leqa. Ni o koya ga “sa [Kalou] levu  . . . , ka levu na nona kaukauwa: ka sa sega ni kilai rawa na nona vuku.” (Same 147:5) O koya duadua e kila vinaka na sala ena vukei keda kina meda walia na noda leqa. Kuria, ni iVolatabu sara mada ga e sureti keda meda ‘tukuna na lomada’ vua. (Same 62:8) Ia, na cava na vuna era nanuma kina e levu ni sega ni dau sauma nodra masu na Kalou? E kena ibalebale beka ni sega ni kauai?

Ni bera nomu beitaka na Kalou ena nona sega ni cakava e dua na ka, vakasamataka mada na gauna o se gonelailai kina. Ni rau sega ni vakalaiva na nomu itubutubu me yaco na lomamu, o beitaki rau beka ni rau sega ni lomani iko? E levu na gone era nanuma ni vaka kina. Ia, ni o qase cake, o na raica ni levu na sala e vakaraitaki kina na loloma. E sega gona ni loloma dina ke rau vakalaiva na itubutubu me yaco na ka ga e vinakata na gone.

E vaka tale ga oya o Jiova, ke sega ni sauma na noda masu me vaka eda vinakata, e sega ni kena ibalebale ni sega ni kauaitaki keda. Na kena dina, na Kalou e dau vakaraitaka ena vuqa na sala na nona kauaitaki keda kece.

“Sa i Koya ga Eda sa Cegu Tiko [Kina]”

Taumada, na Kalou ga e vakavuna na noda “cegu tiko ka yavala, ka bula voli kina.” (Cakacaka 17:28,VV) E ivakaraitaki gona ni nona kauai oya na nona solia vei keda na bula!

Kuria oya, e vakarautaka tale ga o Jiova na veika eda gadreva meda bula tiko kina. Eda wilika: “Sa vakatubura ko koya na co me kedra na manumanu, kei na co eso me yaga vei ira na tamata: me vakatubura na kakana mai na qele.” (Same 104:14) E sega wale ga ni veika oqori e vakarautaka na noda Dauveibuli. E solia vakayalololoma tale ga vei keda na “uca mai lomalagi, kei na yabaki e levu kina na vuata, a sa vakamamautaka na lomada e na kakana kei na marau.”​—Cakacaka 14:17.

Ia, e so ena rairai taroga, ‘Ke sa vaka tu oqori na levu ni nona lomani keda na Kalou, na cava eda se sotava tiko ga kina na rarawa?’ Oni kila beka na kena isau?

Me Beitaki li na Kalou?

E vakavuna ga na kawatamata na veika rarawa e sotava. Me kena ivakaraitaki, e kilai vinaka tu na leqa e rawa ni sotavi ni vakayacori e so na ivalavala ririkotaki. Ia, era se guta ga na tamata na itovo vakasisila, gunuvi vakasivia ni yaqona ni valagi kei na yaqona ni viti vaka kina na vakayagataki ni wainimate gaga, vakatavako, vakaitavi ena qito rerevaki, vakau lori vakalialia, kei na so tale. Ke ra sotava na rarawa nira vakayacora na ivalavala ririkotaki vaka oqori, o cei ena beitaki kina? Na Kalou se o koya e sega ni ivalavala vakayalomatua? Na Vosa uqeti ni Kalou e kaya: “Mo dou kakua ni vakaisini kemudou; a Kalou ena sega ni vakalialiai; na ka kecega sa kaburaka na tamata ena tamusuka talega ko ya.”​—Kalatia 6:7.

Kuria oqori, sa qai tu na nodra dau veivakamavoataki na tamata. Ni yaco na ivalu ena dua na vanua, ena sega ni dodonu me beitaki na Kalou ni vakavuna na rarawa e sotavi kina. Ke dua na daubasulawa e mokuta e dua na lewenivanua, ena beitaki beka na Kalou ni vakavuna na nona mavoa se na nona mate? Dravusakulukulu! E dodonu beka meda beitaka na Kalou ke dua na iliuliu e dau vakalolomataki ira, vakararawataki ira, qai vakamatei ira era vakarurugi ena nona lewa? Oqori e sega ni ka vakayalomatua.​—Dauvunau 8:9.

Ia, vakacava o ira na le vica vata na milioni era bula dravudravua se ra waloloi tu? E bale beka vua na Kalou? Sega. Na levu ni kakana e tu ena vuravura oqo e rawa ni vakania na tamata kece. (Same 10:2, 3; 145:16) Na kena sega ga ni votai vinaka  na kakana e solia vakayauyau tu mai na Kalou, e dau vakavuna na viakana kei na dravudravua e veivanua. Ena sega gona ni wali rawa na leqa oqo nira sa dui nanumi ira ga na tamata.

Na Vuna Levu Duadua

O cei me beitaki ena nona tauvimate qai mate e dua ni sa qase sara? O na kurabui beka ke tukuni vei iko ni sega ni vakavuna na Kalou? A sega ni bulia na tamata na Kalou me qase qai mate.

Ni rau biu ena were o Iteni na imatai ni veiwatini, o Atama kei Ivi, a nakita o Jiova me rau bula tawamudu ena parataisi e vuravura. Matata e ke ni a vinakata o Jiova me tawana na vuravura na tamata era vakamareqeta na nodra ivotavota. Oya na vuna e vakatautaka kina na Kalou na nodrau bula ena gauna sa bera mai ina nodrau cakava e dua na ka. Erau na rawa ni bula ena Parataisi ke rau talairawarawa tiko ga vua na nodrau Dauveibuli dau loloma.​—Vakatekivu 2:17; 3:2, 3, 17-23.

E ka ni rarawa ni rau a talaidredre. A vakatulewataka o Ivi me vakarorogo vei Setani na Tevoro. A lasutaki Ivi o koya ena nona kaya ni bureitaka tiko na Kalou e dua na ka vinaka vua. Mani dre ga nona mua o Ivi ena nona vinakata me “vaka na Kalou,  . . . [me] kila na ka vinaka kei na ka ca.” A tomani koya o Atama ena nona talaidredre.​—Vakatekivu 3:5, 6.

Ni rau valavala ca, erau sa vakadinadinataka kina ni sa sega ni ganiti rau na bula tawamudu. Erau sotava kina na vua ni nodrau ivalavala ca. Erau vakila ni sa yali mai na nodrau kaukaua kei na nodrau igu, tini sara me rau mate. (Vakatekivu 5:5) Ia, e levu cake sara na ca e sotavi ena vuku ni nodrau talaidredre. Eda se sotava tiko ga oqo na vua ni nodrau ivalavala ca o Atama kei Ivi. A vola na yapositolo o Paula: “Sa curu ki vuravura nai valavala ca e na vuku ni tamata e lewe dua [o Atama], kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:12) Io, ena vuku gona ni nodrau talaidredre o Atama kei Ivi, e sa dewavi ira kina na kawatamata na ivalavala ca kei na mate me vaka e dua na matedewa.

iVakadinadina Levu ni Nona Kauai na Kalou

E kena ibalebale beka oqo ni sa vakaleqai vakadua na nona buli ira na tamata na Kalou? Sega, ni sa qai votu gona e ke na ivakadinadina levu ni nona kauaitaki keda na Kalou. A vakarautaka na sala me voli ira kina na  kawatamata mai na ivalavala ca kei na mate, dina ga ni mosimosi sara vua. Na ivoli vakarautaki oya na bula uasivi i Jisu, a tu vakarau me cabora ena vukuda. (Roma 3:24) O koya gona, a vola na yapositolo o Joni: “Sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16) Ena vuku ni loloma vakasakiti oqo, e rawa tale kina nida nuitaka na bula tawamudu. Ena nona ivola o Paula vei ira mai Roma, e kaya: “E na vuku ni dua bauga nai valavala dodonu sa rawa me ra vakadonui na tamata kecega me ra bula.”​—Roma 5:18.

Ena nona gauna lokuci na Kalou, eda vakadeitaka ni na oti vakadua na rarawa kei na mate e vuravura. E sa na qai vakayacori kina na ituvaki a raivotutaki ena Vakatakila: “Raica, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” (Vakatakila 21:3, 4) O na kaya beka, ‘Ena qai yaco oqori ena gauna au sa mate kina.’ Na kena dina, ena rawa ni yacovi iko oqori. Ia, kevaka mada ga o sa mate, ena rawa ni vakaturi iko na Kalou. (Joni 5:28, 29) Oqori na nona inaki na Kalou me baleti keda, qai oqori sara ga na ka ena yaco. E lasutaki gona ke tukuni ni Kalou e sega ni kauaitaki ira na kawatamata!

“Toro Voleka Yani Vua na Kalou”

E veivakacegui dina na noda kila ni sa tuvanaka tu na Kalou na iwali dina ni leqa ni kawatamata. Vakacava ena gauna oqo? Cava eda na cakava ni mate e dua na wekada lomani se tauvimate na luveda? E se sega ni nona gauna lokuci na Kalou me vakaotia kina na tauvimate kei na mate. E tukuna vei keda na iVolatabu ni na gadrevi meda wawa mada vakalailai ni bera ni qai vakayacori. Ia e sega ni kena ibalebale ni sa guilecavi keda na Kalou. Baleta na tisaipeli o Jemesa e kaya: “Toro voleka yani vua na Kalou, ka na toro voleka mai vei kemudou ko koya.” (Jemesa 4:⁠8) Io, e sureti keda na noda Dauveibuli meda veiwekani voleka kei koya, o ira gona era cakava vaka kina era vakila e veigauna na nona veitokoni, ena gauna sara mada ga era sotava kina na ituvaki dredre sara.

Eda na toro voleka vakacava vua na Kalou? Oqori tale ga na ka a via kila o Tui Tevita ena rauta na tolunaudolu na yabaki sa oti, ena nona taroga: “I Jiova, . . . o cei ena tiko vakadua e na nomuni ulu-ni-vanua tabu?” (Same 15:1) A sauma ga o Tevita ena nona kaya: “O koya sa lako vakadodonu, ka kitaka nai valavala dodonu, ka vosa dina tiko mai na vu ni yalona. O koya sa sega ni kakase na yamena, se caka ca vua na kai nona.” (Same 15:2, 3) E rawa nida kaya, ni o Jiova e dau vakadonui ira na goletani mai na sala erau a muria o Atama kei Ivi. Ena torovi ira voleka ga na cakava na lomana.​—Vakarua 6:24, 25; 1 Joni 5:3.

E rawa vakacava nida cakava na loma ni Kalou? Ena gadrevi meda vulica na ka e “dodonu  . . . ka vinaka talega e na mata ni Kalou na nodai Vakabula,” da qai bulataka sara. (1 Timoci 2:3) E vauci tale ga kina na kena vulici na kilaka dodonu ena Vosa ni Kalou, na iVolatabu. (Joni 17:3; 2 Timoci 3:16, 17) Meda kua ni wilika wale tu ga na iVolatabu. E vinakati meda vakatotomuri ira na Jiu mai Peria ena imatai ni senitiuri, era a rogoca na vunau i Paula. Me baleti ira, eda wilika: “Era taleitaka vakalevu na vakarogoca na vosa, ka ra sa dau vakasaqaqara e na i Vola Tabu e na veisiga me ra raica kina se sa dina na veika era rogoca se sega.”​—Cakacaka 17:11, VV.

Ena vaka tale ga kina nikua, na noda vulica vinaka na iVolatabu ena vaqaqacotaka na noda vakabauta na Kalou qai vukei keda meda bucina na veiwekani voleka kei koya. (Iperiu 11:6) Ena vukei keda tale ga meda kila na sala e veitaratara kina o Jiova kei na kawatamata—⁠ena sega wale ga ni yaga ena dua na gauna lekaleka ia ena yaga vakalevu sara ena dua na gauna balavu vei ira na vakarau tu mera rawata na bula tawamudu.

Dikeva na veika era kaya e so na lotu Vakarisito me baleta na nodra veiwekani voleka kei na Kalou. E kaya o Danielle, yabaki 16: “Dua na ka na noqu lomani Jiova, qai levu tale ga na ka  au via vakavinavinakataka vua. Na nona solia vei au na itubutubu dau loloma rau qai lomani koya dina. Rau vakavulici au ena nodrau vakayagataka na nona Vosa.” E dua na lotu Vakarisito mai Uruguay e vola: “E vuabale na noqu vakavinavinakataka vei Jiova na nona yalololoma kei na nona veitokani.” E sureti ira sara mada ga na gonelalai na Kalou. E kaya o Gabriela, e yabaki vitu: “E levu duadua noqu lomana na Kalou niu vakatauvatana kei na veika era tu e vuravura! E tiko na noqu iVolatabu. Au dau taleitaka na vulica na veika me baleta na Kalou kei na Luvena.”

Nikua, e vica na milioni ena vuravura raraba era duavata kei na daunisame ena nona kaya: “E yaga vei au me’u toro vua na Kalou.” (Same 73:28) Era vukei mera vosota na leqa era sotava tu ena gauna oqo, ra qai vakanuinui dei ina bula tawamudu ena Parataisi e vuravura. (1 Timoci 4:8) Vakacava me nomu isausau na nomu saga mo “toro voleka yani vua na Kalou”? E vakadeitaki vei keda: “Sa sega ga ni yawa ko koya vei keda yadua.” (Cakacaka 17:27) Io, e kauaitaki iko dina na Kalou!

[iYaloyalo ena tabana e 5]

E laurai ena vuqa na sala na nona kauaitaki keda o Jiova

[iYaloyalo ena tabana e 7]

E rawa sara mada ga vei ira na gonelalai mera toro voleka vua na Kalou

[iYaloyalo ena tabana e 7]

Ena gauna oqo, e vukei keda o Jiova meda vosota. Ena qai vakaotia na tauvimate kei na mate ena nona gauna lokuci