Vei Ira mai Roma 3:1-31
3 O koya gona, na cava e uasivi kina na Jiu, se na cava na yaga ni cili?
2 E uasivi dina ena ka kece. Kena imatai, nira lesi mera maroroya na vosa ni Kalou.+
3 Vakaevei ke ra sega ni vakabauta eso, sa na lomatarotarotaki kina na yalodina ni Kalou?
4 Sega sara! Me dina ga na Kalou+ veitalia ke ra lasu na tamata kece,+ me vaka e volai: “Me laurai ena nomuni vosa na nomuni yalododonu, moni qaqa tale ga ni oni veilewaitaki.”+
5 Ia ke vakavotui na yalododonu ni Kalou ena noda tawayalododonu, na cava meda kaya? E dau tawadodonu na Kalou ena gauna e tauca kina nona cudru? (Au vosa tiko vakatamata.)
6 Sega sara! Ena qai lewai vuravura vakaevei na Kalou?+
7 Kaya mada keu lasu, ia e mani vakavotui kina ni dau dina na Kalou, e dokai o koya, na cava au lewai tale ga kina ena nodra kaya niu tamata ivalavala ca?
8 Na cava eda sega ni kaya kina, me vaka ga era beitaki keda eso ena nodra kaya nida tukuna: “Meda caka ca mada me qai yaco kina na ka vinaka”? Ena salavata sara ga kei na lewadodonu na itotogi e tau vei ira qo.+
9 Vakaevei, eda vinaka cake na Jiu? Sega sara! Sa vakamatatataki oti nida vauci kece na Jiu kei ira na kai Kirisi ena ivau ni ivalavala ca.+
10 Me vaka e volai: “E sega na tamata yalododonu, sega mada ga ni dua,+
11 e sega ni dua e yalomatua, e sega ni dua e bau vakasaqara na Kalou.
12 Era gole tani kece, era tawayaga kece. E sega ni dua e yalololoma, sega sara ga ni dua.”+
13 “Na nodra itilotilo na ibulubulu e tadola tu ga, e veivakacalai na yamedra.”+ “E tu e daku ni tebenigusudra na weli gaga ni gata.”+
14 “E sinai na gusudra ena vosavakacaca kei na vosa gaga.”+
15 “E totolo na yavadra mera vakadavedra.”+
16 “E nodra sala na rusa kei na rarawa,
17 ra qai sega ni kila na sala ni vakacegu.”+
18 “E sega ni bau laurai e matadra nira rerevaka na Kalou.”+
19 Eda kila ni soli sara ga vakatabakidua na Lawa vei ira na Jiu. Ke dua gona vei ira e kaya ni sega nona cala, ena vagalui koya na Lawa. Ena kila tale ga o vuravura kece ni na totogitaki ira na Kalou.+
20 Ena sega gona ni okati me yalododonu e dua ena mata ni Kalou ni muria na lawa,+ e yaga na lawa meda kila vinaka kina na ivalavala ca.+
21 Ia sa qai kilai ni veivakadonui ni Kalou e sega ni vakatau ena muri ni lawa.+ E macala qo mai na Lawa kei na ka era vola na Parofita.+
22 Io, na veivakadonui ni Kalou e vakatau ena nodra vakabauti Jisu Karisito o ira kece na vakabauta, me vaka nida tautauvata kece.+
23 Ni sa valavala ca na tamata kece, qai sega ni yacova rawa na lagilagi ni Kalou.+
24 E okati ira na Kalou mera yalododonu ni sereki ira na ivoli i Karisito Jisu.+ Qo na isolisoli ni Kalou+ ena vuku ni nona loloma soli wale.+
25 E soli Jisu na Kalou me isoro meda veiyaloni kina na kawatamata kei na Kalou+ nida vakabauta na dra i Karisito.+ E cakava qo na Kalou me vakaraitaka ni a yalododonu ena nona vosota na ivalavala ca ena gauna sa oti ni se veivosoti tiko.
26 Qo me vakaraitaka na nona yalododonu+ ena gauna qo, ena nona okata me yalododonu o koya e vakabauti Jisu.+
27 O koya gona, e dua na ka me dokadokataki? E sega. E sega ni vakaoti ena lawa e lavaka na cakacaka,+ ena lawa ga ni vakabauta.
28 Eda raica gona ni okati me yalododonu e dua ena vuku ni nona vakabauta, sega ena nona cakava na ka e lavaki ena lawa.+
29 Se nodra Kalou duadua ga na Jiu o koya?+ Sega ni nodra Kalou tale ga na lewe ni veimatanitu?+ Io, e nodra Kalou tale ga na lewe ni veimatanitu,+
30 ni Kalou ga o koya,+ ena okati ira na cili mera yalododonu+ ena vuku ni vakabauta, mera yalododonu+ tale ga na sega ni cili ena vuku ni nodra vakabauta.
31 Eda na bokoca na lawa ena vuku ni noda vakabauta? Me kua sara ni yaco qori! Eda na vakataudeitaka ga na lawa.+
