iMatai ni iVola Vei Timoci 4:1-16
4 Ia e tukuna vakamatata na yalo ni Kalou nira na lutu tani mai na vakabauta eso ena gauna e muri, nira rogoca na itukutuku veivakacalai e nanumi ni vu vakalou+ kei na nodra ivakavuvuli na timoni,
2 ena nodra veivakaisini na tamata lasulasu,+ e sa tavuni na nodra lewaeloma me vaka e tavuni ena kaukamea katakata.
3 Era vakatabuya na vakawati,+ era vakarota tale ga me vakatabui eso na kakana+ e bulia na Kalou mera kania+ ena vakavinavinaka o ira na vakabauta+ ra qai kila vinaka tale ga na ka dina.
4 Na vuna, ni vinaka kece na ibulibuli ni Kalou,+ e sega ni dua na ka me vakatabui+ ke da kania ena vakavinavinaka,
5 ni sa vakasavasavataki ena vosa ni Kalou kei na kena masulaki.
6 Ni o vakasalataki ira na veitacini ena ka kece qo, o na dauveiqaravi vinaka i Karisito Jisu, ni o sa vakani vinaka sara ena vosa ni vakabauta kei na ivakavuvuli totoka o sa muria voleka tiko mai.+
7 Ia mo cata na italanoa lasu+ e beci kina na ka e savasava era dau talanoataka na buinigone. Ena yasana adua, mo vakarautaki iko vinaka me nomu isausau mo qarava na Kalou ena yalodina.
8 Ni yaga vakalailai ga na vakaukaua yago, ia na noda qarava na Kalou e yaga ena ka kece, ni na vakalougatataki kina noda bula ena gauna qo kei na noda bula ena gauna mai muri.+
9 E nuitaki na itukutuku qo qai dodonu me ciqomi vakalevu.
10 Qori na vuna keitou cakacaka tiko kina vakaukaua, keitou gumatua tale ga,+ ni keitou yavutaka vua na Kalou bula na neitou inuinui, na nodra iVakabula+ na tamata kece ga,+ vakabibi o ira na yalodina.
11 Mo vakarota tiko ga na ka kece qo, mo vakavulica tale ga.
12 Me kua sara ni dua e beci iko ni o se cauravou. Ia mo ivakaraitaki vei ira na yalodina ena vosa, ena itovo, ena loloma, ena vakabauta, ena ivalavala savasava.
13 Mo gumatua tiko ga ena wilivola e matanalevu,+ ena nomu veivakadreti, kei na veivakavulici me yacova na noqu lako yani.
14 Kua ni vakawalena na isolisoli e soli vei iko ena parofisai, kei na nodra tabaki iko e ligadra na ilawalawa qase.+
15 Vakasamataka vakabibi na ka kece qo, me tara sara na lomamu, mera raica na tamata kece na nomu toso.
16 Qarauni iko vinaka tiko ga kei na nomu veivakavulici.+ Tudei kina, ni o cakava qo o na vakabulai iko kei ira na rogoci iko.+
