LESONI 17
Na Cava e Kilai Kina o Jisu?
Nida vulica na veika e tukuna o Jisu qai cakava e vuravura, eda na kila eso na itovo eda na volekati koya kina kei na Tamana o Jiova. Na cava eso na itovo qoroi qori? Eda na vakatotomuri Jisu vakacava?
1. Na sala cava e tautauvata kina o Jisu kei Tamana?
Ni se tiko mai lomalagi o Jisu, e vica na bilioni na yabaki na nona dau raica na ka e cakava na Tamana dauloloma qai vuli vua. Oya na vuna e tautauvata kina na nodrau ivakarau ni rai, ivakarau ni vakasama kei na ka rau cakava. (Wilika Joni 5:19.) Ni vakatotomuria vinaka o Jisu na itovo nei Tamana, e tukuna kina: “O koya sa raici au sa raici Tamaqu tale ga.” (Joni 14:9) Ni o vulica tiko na itovo i Jisu, o na kilai Jiova vinaka kina. Kena ivakaraitaki, na nona yalololoma o Jisu vei ira na lewenivanua e vakaraitaka na nona kauaitaki iko o Jiova.
2. E vakaraitaka vakacava o Jisu ni lomani Jiova?
E kaya o Jisu: “Au na vakayacora na ka e vakarota vei au o Tamaqu meu cakava, me kila kina o vuravura niu lomani Tamaqu.” (Joni 14:31) Ni se bula e vuravura o Jisu, e vakaraitaka ni lomani Tamana vakalevu ena nona talairawarawa vua ni sotava mada ga na dredre. E dau taleitaka o Jisu me tukuni Tamana, qai vukei ira eso tale mera veiwekani kei koya.—Joni 14:23.
3. E vakaraitaka vakacava o Jisu ni lomani ira na tamata?
E kaya na iVolatabu ni o Jisu e “taleitaki ira vakalevu na kawatamata.” (Vosa Vakaibalebale 8:31, ivakamacala e ra) E vakaraitaka qori ena nona dau vakayaloqaqataki ira qai vukei ira vakayalololoma. E laurai ena nona cakamana na nona kaukaua kei na nona yalololoma. (Marika 1:40-42) E dau yalovinaka qai sega ni veivakaduiduitaki. E veivakacegui na nona vosa qai vakavuna mera nuidei na yalomalumalumu era rogoci koya. Ni lomani keda vakalevu, e tu vakarau kina me vakararawataki qai mate. Ia e lomani ira sara vakalevu na muria na nona ivakavuvuli.—Wilika Joni 15:13, 14.
VAKEKELI
Vulica e levu tale na itovo i Jisu qai dikeva na sala mo vakatotomuria kina nona loloma kei na nona lomasavu.
4. O Jisu e lomani Tamana
Eda vulica ena ivakaraitaki i Jisu na sala meda lomana kina na Kalou. Wilika Luke 6:12 kei na Joni 15:10; 17:26. Ni o wilika oti na tikinivolatabu qori, veivosakitaka na taro qo:
-
Eda na vakatotomuri Jisu vakacava ena noda lomani Jiova?
O Jisu e lomana na Tamana vakalomalagi qai masu wasoma vua
5. O Jisu e dau kauaitaki ira na vakaleqai
O Jisu e dau kauaitaka sara ga e liu na ka era vinakata na lewenivanua. Na gauna mada ga e oca tu kina, e vakayagataka na nona gauna kei na nona kaukaua me vukei ira na lewenivanua. Wilika Marika 6:30-44, qai veivosakitaka na taro qo:
-
Ena tikinivolatabu qo, na cava eso na sala e vakaraitaka kina o Jisu na nona veikauaitaki?—Raica na tikina e 31, 34, 41, kei na 42.
-
Na cava e uqeti koya?—Raica na tikina e 34.
-
Ni vakaraitaka o Jisu na itovo i Jiova, na cava o vulica kina me baleti Jiova?
-
Eda na vakatotomuria vakacava na veikauaitaki i Jisu?
6. O Jisu e dau lomasavu
E sega ni levu na nona iyau, ia e dau lomasavu, e uqeti keda tale ga meda cakava qori. Wilika Cakacaka 20:35, qai veivosakitaka na taro qo:
-
Me vaka e tukuna o Jisu, eda na marau vakacava?
Sarava na VIDIO, qai veivosakitaka na taro tarava.
-
Cava eso na sala eda rawa ni soli ka kina, ke sega ni levu mada ga na ka e tu vei keda?
O bau kila?
E kaya na iVolatabu meda masu vei Jiova ena yaca i Jisu. (Wilika Joni 16:23, 24.) Nida masu va qori, eda sa vakavinavinakataka tiko na ka e cakava o Jisu ena vukuda, meda itokani kina i Jiova.
KA ERA KAYA ESO: “E sega ni kauaitaka na Kalou na noda rarawa.”
-
Ni vakatotomuria vinaka o Jisu na itovo nei Tamana, e kilai vakacava ni kauaitaki keda o Jiova?
KA O VULICA
O Jisu e lomani Jiova, e lomani keda tale ga na kawatamata. E ucui tamana vinaka o Jisu, ni o kilai koya vinaka, o na kilai Jiova vinaka tale ga.
Railesuvi
-
Eda na lomani Jiova vakacava me vakataki Jisu?
-
Eda na lomani ira vakacava na tamata me vakataki Jisu?
-
Na cava o taleitaka vakalevu ena itovo i Jisu?
IKURI
Dikeva eso na itovo i Jisu eda rawa ni vakatotomuria.
“Vakatotomuri Jisu ena Nomu . . .” (Jisu—Na Sala, na Dina, na Bula, tabana e 317)
Dikeva na itavi bibi i Jisu ena masu.
“Cava Meda Masu Kina ena Yaca i Jisu?” (Na Vale ni Vakatawa, 1 Feperueri, 2008)
Vakacava e tukuna na iVolatabu na irairai kei Jisu?
“Na Cava e Kilai me Baleta na iRairai kei Jisu?” (Ulutaga ena jw.org)
Na cava eda rawa ni vulica ena ka e dau cakava o Jisu vei ira na yalewa?
“Dokai Ira Qai Kauaitaki Ira na Kalou” (Na Vale ni Vakatawa, 1 Seviteba, 2012)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
