Dokai Ira Qai Kauaitaki Ira na Kalou

ENA gauna se bula kina e vuravura o Jisu, a vakaraitaka vinaka sara ga na itovo i Tamana vakalomalagi kei na ka e dau cakava. E tukuna: “[Au] sega . . . ni cakava vakataki au e dua na ka, ia au tukuna ga na ka e vakavulici au kina o Tamaqu . . . niu dau cakava na ka e vinakata.” (Joni 8:28, 29; Kolosa 1:15) Koya gona, nida vulica na sala e dau veimaliwai kina o Jisu kei ira na yalewa kei na nona rai me baleti ira, eda rawa ni kila kina na nona rai na Kalou me baleti ira na yalewa kei na ka e namaka vei ira.

Era tukuna e vica vata na vuku ni nona rai o Jisu me baleti ira na yalewa e duidui sara mai na nodra rai e levu ena gauna a volai kina na Kosipeli. E rawa vakacava qori? Ia vakacava na nona ivakavuvuli, e se rawa tiko ga ni uqeta na nodra galala na yalewa nikua?

E Dau Raici Ira Vakacava na Yalewa o Jisu?

◼ E sega ni raici ira o Jisu mera ivakavakacegu ni veiyacovi. Era nanuma eso na iliuliu ni lotu vakaJiu, ni nodra veimaliwai kei ira na yalewa e rawa ni lai tini ena garogaro. Me vaka nira dau raici cala tu na yalewa nira ivurevure ni veika ca, era sega kina ni vakatarai mera vosa vei ira na tagane e matanalevu se mera gole ituba ke sega nira ubia na uludra. Ia ena yasana adua, o Jisu e vakasalataki ira na tagane mera qarauna na nodra gagadre vakayago ra qai dokai ira na yalewa, mera solia tale ga vei ira na galala mera dauveimaliwai kei ira eso tale.​—Maciu 5:28.

E tukuna tale ga o Jisu: “Na tagane e sereka na watina qai vakawati tale e sa veibutakoci, o koya gona e sa cala vei watina.” (Marika 10:11, 12) Koya gona, e cata o koya na nodra ivakavuvuli na rapai ena nodra vakatarai ira na tagane mera sereki watidra “ena dua ga na yavu e rawa.” (Maciu 19:3, 9) Na vakasama ni veibutakoci kei na dua e sega ni watina e vulagi vei ira e levu na Jiu. E tukuna na nodra rapai ni o tagane ena sega vakadua ni rawa ni veibutakoci​—o yalewa ga! E kaya e dua na ivakamacala vakaivolatabu, “na nona raica o Jisu mera dokai na yalewa me vakataki ira ga na tagane, e vakavuna mera sega ni beci kina ra qai rokovi.”

Yaga ni nona ivakavuvuli nikua: Ena ivavakoso vaKarisito ni iVakadinadina i Jiova, era dau veimaliwai ra qai veitokani na yalewa kei ira na tagane. Era sega ni leqataka na yalewa ni na tawakilikili na nodra rai na tagane me baleti ira se ra vakamatauni ira tale vakasivia vei ira na yalewa baleta ni o ira na lotu vaKarisito tagane era na qarauna mera dokai ira na ‘kenamarama me vaka era tinadra, goneyalewa me vaka era ganedra ena yalosavasava sara.’​—1 Timoci 5:2.

◼ E dau solia nona gauna o Jisu me vakavulici ira na yalewa. Na nodra rai na rapai ni dodonu mera kua ni kila e levu na ka na yalewa, ia o Jisu a qai vakavulici ira, uqeti ira tale ga mera dau vakaraitaka na lomadra. Na nona sega ni via tarovi Meri o Jisu me rogoca nona veivakavulici, e vakaraitaka kina ni sega ni yalani ga na nodra itavi na yalewa ena veika e vauca na veiqaravi e vale. (Luke 10:38-42) E vakila tale ga na yaga ni nona veivakavulici na taci Meri o Marica, me vaka e laurai ena nona sauma na taro i Jisu ena gauna sa mate kina o Lasarusa.​—Joni 11:21-27.

E kauaitaka o Jisu na ka era nanuma na yalewa. Ni se bula voli e vuravura, e levu vei ira na yalewa Jiu era vakabauta ni sala me rawati kina na marau oya me dua na luvedra tagane e rawata e levu na ka, ke rawa me dua na parofita. Ena gauna e kacivaka kina vakadomoilevu e dua na yalewa: “E kalougata na katonigone a kunekunetaki kemuni!” e vakayagataka vinaka na gauna qori o Jisu me tukuna vua e dua na ka e bibi cake. (Luke 11:27, 28) Ena nona vakaraitaka ni bibi cake na noda talairawarawa vua na Kalou, e vakaraitaka kina vua o Jisu ni tiko na itavi e bibi cake mai na itavi era dau qarava tu na yalewa.​—Joni 8:32.

◼ Yaga ni nona ivakavuvuli nikua: O ira na dauveivakavulici ena ivavakoso vaKarisito era dau marautaka na nodra ivakamacala na yalewa ena gauna ni soqoni. Era dau dokai ira tale ga na yalewa matua ena vuku ni nodra “dau vakavulica na ka vinaka” ena nodra ivakaraitaki vinaka ena itovo nira veimaliwai se nira tiko taudua. (Taito 2:3) Era nuitaki ira tale ga mera vunautaka e veivale na itukutuku vinaka ni Matanitu ni Kalou.​—Same 68:11; raica na kato “E Vakatabui Ira na Yalewa Mera Vosa na Yapositolo o Paula?” ena tabana e 9.

◼ E kauaitaki ira na yalewa o Jisu. Ena gauna vakaivolatabu, era sega ni dau vakamareqeti vakalevu na yalewa ni vakatauvatani vei ira na tagane. E tukuna na Talmud me baleta na rai qori: “E marau o koya e vakaluveni tagane, ena rarawa o koya e vakaluveni yalewa.” Eso na itubutubu era okati ira na luvedra yalewa mera icolacola bibi​—nira na vaqara e dua na watidra kei na isolisoli ni yalewa ena gauna ni vakamau, era na sega tale ga ni vakanuinui vei ira ena gauna era sa na qase kina.

E vakaraitaka sara ga o Jisu ni bibi tale ga na nodra bula na goneyalewa me vakataki ira na gonetagane​—a vakaturi koya na luvei Jairo goneyalewa me vaka ga nona vakaturi koya na luvena tagane e dua na yada mai Neini. (Marika 5:35, 41, 42; Luke 7:11-15) Ni oti nona vakabula o Jisu e dua na yalewa “e vakavuna na timoni nona vakalairoro voli me tinikawalu na yabaki,” a vakatokai koya me “luvei Eparama,” e dua na ­matavosa e sega ni kilai vakalevu ena volavola vakaJiu. (Luke 13:10-16) Ni vakayagataka o Jisu na vosa ni veidokai qori qai yalovinaka, e vakaraitaka ni o koya na yalewa qori e dodonu me kauaitaki me vakataki ira ga na kena vo, e vakaraitaka tale ga na levu ni nona vakabauta.​—Luke 19:9; Kalatia 3:7.

◼ Yaga ni nona ivakavuvuli nikua: E dua na ivosavosa mai Esia: “Nodra susugi na yalewa e vaka ga noda lai suya tiko na nodra iteitei eso tale.” Na tama lotu vaKarisito dauloloma ena sega ni vakamuai ena rai qori, ia ena qaravi ratou vinaka kece na luvena tagane kei na luvena yalewa. Era na raica na itubutubu vaKarisito mera na vuli kece na luvedra ra qai qaravi vinaka vakayago.

◼ E nuitaki ira na yalewa o Jisu. Ena nodra mataveilewai na Jiu, na nodra dau soli ivakadinadina na yalewa e laurai me tautauvata kei ira na bobula. A tukuna o Josephus, na daunitukutuku makawa ni imatai ni senitiuri: “Me kua ni vakadonui na nodra dau soli ivakadinadina na yalewa baleta nira dau raica vakamamada na ka ra qai sega ni dau veidokai.”

E duidui vakalevu sara o Jisu, a digitaka sara ga na yalewa me vakadinadinataka na nona sa vakaturi. (Maciu 28:1, 8-10) E dina nira vakadinadinataka na yalewa yalodina na nona mate kei na nona bulu na Turaga, ia e dredre me ratou vakabauta na yapositolo na nodra itukutuku. (Maciu 27:55, 56, 61; Luke 24:10, 11) Ia nona rairai e liu vei ira na yalewa, e vakadinadinataka o Karisito nira veiganiti na yalewa mera nona ivakadinadina me vakataki ira na vo ni tisaipeli.​—Cakacaka 1:8, 14.

◼ Yaga ni nona ivakavuvuli nikua: Ena loma ni ivavakoso ni iVakadinadina i Jiova, era dau kauaitaka na nodra rai na yalewa o ira na tagane era veiqaravi ena ivavakoso. O ira tale ga na tagane vakawati lotu vaKarisito, e dodonu mera “dokai ira” na yalewa ena nodra dau vakarogoci ira matua.​—1 Pita 3:7; Vakatekivu 21:12.

iVakavuvuli Vakaivolatabu e Vakamarautaki Ira na Yalewa

Ena gauna ra vakatotomuri Karisito kina na tagane, e soli kina vei ira na yalewa na veidokai kei na galala me vaka ga a nakita taumada na Kalou. (Vakatekivu 1:27, 28) Era sega ni duavata na lotu vaKarisito tagane vakawati ena rai me baleta na nodra vinaka cake vei ira na yalewa, ia era laiva mera dusimaki ena ivakavuvuli vakaivolatabu, qori e vakamarautaki ira kina na watidra.​—Efeso 5:28, 29.

Ena gauna e tekivu vulica kina na iVolatabu o Yelena, e galuvaka tu ga na nona dau vakalolomataki koya o watina. A susu mai o watina ena dua na vanua e dau yaco kina na itovo voravora, oya mera dau butakoci vakalevu na yalewa mera vakawatitaki, e levu tale ga kina na ivalavala kaukaua. E tukuna o Yelena: “Na ka au vulica ena iVolatabu e vakaukauataki au. Au sa qai kila ni tiko e dua e lomani au vakalevu, e dokai au, qai kauaitaki au. Au kila tale ga ni na rawa ni veisautaka o watiqu na ka e dau cakava vei au ke vulica na iVolatabu.” A qai yaco qori ena gauna a ­vakadonuya kina o watina me vulica na iVolatabu qai papitaiso me dua na iVakadinadina i Jiova. E tukuna o Yelena: “E ivakaraitaki vinaka dina o koya ena lewa matau. Keirau vulica me keirau yalorawarawa ni veivosoti.” Na cava sa qai tukuna o Yelena? “Na ivakavuvuli vakaivolatabu e vukei au dina meu raica niu kauaitaki, au taqomaki tale ga ena noqu vakawati.”​—Kolosa 3:13, 18, 19.

E levu tale ga era sotava na ituvaki me vakataki Yelena. Era marau e vica vata na milioni na yalewa lotu vaKarisito nira saga kei na watidra mera muria na ivakavuvuli vakaivolatabu ena nodra vakawati. Era vakila nira dokai, vakacegui, e soli tale ga vei ira na galala ni veimaliwai kei ira na tacidra lotu vaKarisito.​—Joni 13:34, 35.

Era kila na yalewa kei na tagane lotu vaKarisito nira ivalavala ca ra qai sega ni uasivi, era ibulibuli ni Kalou e sa “okati tu mera tawayaga.” Ia nodra toro voleka vua na Kalou dauloloma kei na Tamadra o Jiova, era sa nuitaka kina nira na ‘sereki mai na nodra bobula tu ina ca’ ra qai marautaka “na galala lagilagi era vakila tu na luve ni Kalou.” Sa dua dina na inuinui totoka vei ira na tagane kei na yalewa ena nona veikauaitaki na Kalou!​—Roma 8:20, 21.

 [Kato ena tabana e 9]

E Vakatabui Ira na Yalewa Mera Vosa na Yapositolo o Paula?

E vola na yapositolo o Paula: “Mera galu na yalewa ena ivavakoso.” (1 Korinica 14:34) Na cava e vakaibalebaletaka o Paula? Vakacava e beci ira? Sega. E dau cavuta ga vakalevu na nodra ivakavuvuli yaga na yalewa. (2 Timoci 1:5; Taito 2:3-5) Ena nona ivola vei ira e Korinica e sega wale ga ni vakasalataki ira na yalewa o Paula, e vakasalataki ira kece e tiko na nodra isolisoli​—isolisoli ni nodra vosataka e dua tale na vosa kei na isolisoli ni parofisai​—oya mera “galu” ena gauna e vosa kina e dua tale e vakabauta. * (1 Korinica 14:26-30, 33) Kena irairai ni so na yalewa lotu vaKarisito era taleitaka vakalevu na nodra vakabauta vou, ra qai dau takosovi koya e vunau mera tarogi koya ena gauna e vosa tiko kina me vaka na kena ivalavala ena yasayasa oya. Me kua ni yaco qori, e uqeti ira na yalewa o Paula ‘mera tarogi ira ga na watidra mai vale.’​—1 Korinica 14:35.

[iVakamacala e ra

 [iYaloyalo ena tabana e 10]

A digitaki Meri Makitala o Jisu me tukuna vei ratou na yapositolo ni sa vakaturi

 [iYaloyalo ena tabana e 11]

O ira na muria na ivakavuvuli vakaivolatabu era na dokai ira qai kauaitaki ira na yalewa