Vola o Marika 6:1-56
6 E biubiu mai kea o Jisu me gole i nona vanua,+ eratou tomani koya na nona tisaipeli.
2 E lai veivakavulici sara ena valenilotu ena Siga ni Vakacecegu. Era kurabui e levu na rogoci koya, ra qai kaya: “E rawata mai vei na ka kece qo?+ Na cava tale ga e soli kina vua na vuku qai cakava na cakacaka veivakurabuitaki e ligana?+
3 Sega ni o koya qo na matai,+ na luvei Meri;+ na tuakai Jemesa,+ Josefa, Jutasa, kei Saimoni?+ Eratou sega ni tiko tale ga qo na ganena?” Era mani tarabe ena vukuna.
4 Ia e kaya vei ira o Jisu: “E dokai na parofita ena veivanua kece, vakavo ga ena nona vanua, vei ira na wekana, kei na nona vuvale.”+
5 E sega ni mani cakava e kea na cakacaka veivakurabuitaki, e tarai ira ga e vica na tauvimate ra qai bula.
6 E kurabuitaka sara o koya nira sega ni vakabauta. E mani lai veivakavulici+ wavoki ga ena veikoro e kea.
7 E kacivi ratou mai na le Tinikarua, qai talai ratou me ratou lako yarurua yani,+ e solia tale ga vei ratou na kaukaua me ratou vakasavi ira na yalo velavela.+
8 E vakarota tale ga me ratou kua ni kauta e dua na ka, na nodratou ititoko ga—me kua na madrai, na taga ni kakana, se taga ni ilavo*+—
9 ia me ratou vakaivava ga ratou kua ni tokara e rua na isulu.*
10 E kuria: “Ni dou sa curu ina dua na vale, dou tiko kina me yacova ni dou biuta na vanua qori.+
11 Ke dou sega ni ciqomi se rogoci ena vanua qori, dou kuretaka tani na kuvuniqele mai yavamudou* ni dou biubiu me ivakadinadina vei ira.”+
12 Eratou lako sara me ratou vunau mera veivutuni+ kina na lewenivanua,
13 eratou vakasava e levu na timoni,+ ratou lumuta e levu na tauvimate ena waiwai qai vakabulai ira.
14 E rogoca o Tui Eroti* ni sa kuruseta na vanua na yaca i Jisu ra qai kaya voli na lewenivanua: “Sa vakaturi mai na mate o Joni na Dauveipapitaisotaki, sa rauta me veivakurabuitaki na ka e cakava.”+
15 Ia era kaya eso: “Qo o Ilaija.” Eso tale era kaya: “E vaka ga e dua na parofita.”+
16 Ni rogoca o Eroti, e kaya: “O Joni ga au tamusuka na uluna, sa vakaturi.”
17 Ni o koya ga a talatala me lai vesu mai o Joni, me biu i valeniveivesu ena vuku i Erotiasa erau sa mai veiwatini tiko,+ ia e wati Filipi na tacina.
18 Ni dau kaya o Joni vei Eroti: “E sega ni dodonu mo tauri wati tacimu.”+
19 Qo e yaloca sara ga kina o Erotiasa, e saga kina me vakamatei Joni, ia e sega ni rawata.
20 E maroroi Joni voli o Eroti ni rerevaka ni turaga yalododonu qai yalosavasava.+ Ni rogoci koya oti, e sega ni kila se cava me cakava, ni taleitaka nona ivakamacala.
21 E yaco na loma i Erotiasa ena siga sara ga e vakarautaka kina o Eroti e dua na kakana ni nona siganisucu+ qai sureti ira kina na vakaitutu lelevu, o ira na komada ni mataivalu kei ira na tamata rogo e Kalili.+
22 E curu yani na luvei Erotiasa me meketi ira. E taleitaka o Eroti kei ira na kana tiko* kei koya na nona meke, mani kaya vua na tui: “Kerea vei au na ka ga o vinakata, au na solia vei iko.”
23 Io, a yalataka vua: “Na ka ga o kerea vei au, au na solia vei iko, ke veimama mada ga noqu matanitu.”
24 E lai tarogi tinana: “Na cava meu kerea?” E kaya o tinana: “Na ulu i Joni na Dauveipapitaisotaki.”
25 Sega ni bera nona gole vua na tui me lai vakaraitaka vua na ka e vinakata: “Au vinakata me soli vakatotolo vei au ena dua na veleti na ulu i Joni na Dauveipapitaisotaki.”+
26 E rarawa vakalevu na tui, ia a vakayacora ga na ka e kerea na goneyalewa ena vuku ni ka sa yalataka, ena vukudra tale ga na nona vulagi.*
27 Mani tala sara na tui e dua na sotia qai vakarota me kauta mai na ulu i Joni. E lako na sotia qai lai tamusuka mai na ulu i Joni e valeniveivesu
28 qai kauta mai na uluna ena dua na veleti. E solia sara vua na goneyalewa qai solia o goneyalewa vei tinana.
29 Ni ratou rogoca qori nona tisaipeli, eratou kauta na yagona me ratou lai vakadavora ena ibulubulu.*
30 Eratou soqoni vata yani vei Jisu na yapositolo me ratou tukuna vua na ka kece eratou cakava kei na nodratou veivakavulici.+
31 E kaya vei ratou: “Mai, datou lai vakacegu mada vakalailai+ ena dua na vanua lala.” E sega na gauna galala me ratou kana kina ni le levu era tabili yani, so era sa lesu.
32 Eratou mani vodo ena dua na waqa me ratou vakatikitiki ina dua na vanua lala.+
33 Ia era raica na lewenivanua ni ratou sa lako, ra lai kila tale ga e levu na nodratou sa biubiu, era mani cici yani e vanua na lewenikoro kece ena yasayasa ya, ra mani liu tale vei ratou.
34 Ni sobu yani, e raica sara e dua na ilala levu, dua na ka nona lomani ira+ nira vaka na sipi e sega na kena ivakatawa.+ Mani vakavulici ira ena levu sara na ka.+
35 Ni sa yakavi mai, eratou qai lai tukuna vua na nona tisaipeli: “E vanua lala qo, sa kala tale ga na matanisiga.+
36 Ni tukuna mada vei ira mera lako mera lai voli kedra+ ena itikotiko vagalala kei na koro voleka.”
37 E kaya vei ratou o Jisu: “Dou vakani ira.” Eratou kaya vua: “Vakacava, me keitou volia mai e 200 na dinari* na madrai qai solia vei ira mera kania?”+
38 E kaya vei ratou: “E vica na madrai e tiko vei kemudou? Dou lai raica mada!” Ni ratou vakatataro oti, eratou kaya: “E lima na madrai, rua na ika.”+
39 E tukuna vei ira na ilala levu ya mera dabe vakaiwasewase ena veico drokadroka.+
40 Era mani dabe me ya100, ya50 tale ga.
41 E taura o Jisu na lima na ibuli madrai kei na rua na ika, tacake i lomalagi me vakavinavinaka,+ oti e qai tikitikica na madrai, solia vei ratou na tisaipeli me ratou veisoliyaka vei ira na ilala levu ya. E wasea tale ga vei ira na rua na ika.
42 Era mani kana kece, era mamau;
43 era vakasinaita tale e 12 na basikete ena kena vo, sega ni wili kina na ika.+
44 Na kedra iwiliwili na kana madrai e rauta ni 5,000 na tagane.
45 Oti ga ya, e tukuna vei ratou nona tisaipeli me ratou lai vodo i waqa me ratou liu i tai, i Peciseita, me se talaci ira mada na ilala levu ya.+
46 Ni vakamoce oti vei ira na ilala levu, e qai cabe ina ulunivanua me masu.+
47 Ni karobo na vanua, sa tu e loma ni wasawasa na waqa, ia e tiko duadua ga e vanua o Jisu.+
48 Ni raica nodratou sasaga voce ena bula ni cagi e tadravi ratou, rauta na matakacaca,* e taubale sara yani vei ratou e dela ni wai, ia e lomana me lako siviti ratou sara.
49 Ni ratou raici koya ni taubale tiko yani e delaniwai eratou qolouvaka: “Kemudou! Na cava qo!”
50 Eratou taqaya ni ratou raici koya. Sega ni bera nona kaya vei ratou: “Dou yaloqaqa, o yau ga qo, dou kua ni rere.”+
51 E vodo sara i waqa, mai ruru yani vakasauri na cagi. Sa duatani na nodratou kurabui,
52 ni ratou sega ni taura rawa na ibalebale ni ibuli madrai, ni se buawa tiko ga na lomadratou, e dredre kina me ratou kila.
53 Ni ratou yaco i tai, eratou soko yani i Kenisareti ratou lai vakelea sara na nodratou waqa ena dua na vanua voleka.+
54 Era kilai koya na lewenivanua ena gauna ga eratou sobu yani kina.
55 Era veiciciyaki ina yasayasa kece ya mera laveti mai na tauvimate kece ena nodra idavodavo, mera kau ina vanua era rogoca ni tiko kina.
56 Ena koro kece e curuma, na koro lelevu, kei na tikotiko vagalala, era na biuti ira na tauvimate ena makete ra qai vakamasuti koya mera bau tara mada ga na tutu ni nona isulu e sau.+ Era vakabulai kece o ira na tara.
iVakamacala e ra
^ Kir., “kopa.”
^ Se “e dua tale na isulu.”
^ Se “na dabe tiko ena teveli.”
^ Se “na dabe tiko ena teveli.”
^ Se “ena ibulubulu nanumi.”
^ Oya, rauta na 3 na kaloko ena mataka me yacova na cabe ni siga rauta na 6 na kaloko.
