Raica sara na lewena

Era Veivakavulici Vakacava na iVakadinadina i Jiova ena iVolatabu?

Era Veivakavulici Vakacava na iVakadinadina i Jiova ena iVolatabu?

 Keimami vakarautaka na sala vinaka duadua mo kila kina na ka e kaya na iVolatabu. E rawa ni vukei iko na neimami iwalewale ni veivakavulici mo:

  •   Marautaka nomu bula

  •   iTokani ni Kalou

  •   Kila na ka e yalataka na iVolatabu ena veigauna se bera mai

Ena ulutaga qo

 Cava e caka ena vuli iVolatabu?

 Ena vukei iko e dua na iVakadinadina i Jiova mo kila vinaka na iVolatabu ni drau vulica vata na ulutaga yadua ena ivola, Marau me Tawamudu! O na kila vinaka kina na ka e kaya na iVolatabu, ena yaga tale ga vei iko. Sarava na vidio qo mo kila kina e levu tale na ka.

 E saumi na vuli iVolatabu?

 Sega. Keimami muria ga na ivakasala i Jisu vei ratou nona tisaipeli: “E soli wale vei kemudou, dou solia wale tale ga.” (Maciu 10:8) E sega tale ga ni saumi na iyaya ni veivakavulici me vaka na iVolatabu, kei na ivola e kena ulutaga, Marau me Tawamudu!

 E vakacava na kena balavu?

 E tiko ena ivola e 60 na lesoni. Ena vakatau sara ga vei iko na toso ni vuli. Ia e levu era dau vulica e dua, se sivia na ulutaga ena dua na macawa.

 Au na tekivu vuli vakacava?

  1.  1. Vakalewena na fomu ni kere vuli iVolatabu ena neimami website. Ena qai veitaratara yani vei iko e dua na iVakadinadina i Jiova me salavata ga kei na ka o vakalewena mai ena fomu qori.

  2.  2. Ena veitaratara yani o koya ena vakavulici iko. Ena vakamacalataka vei iko na cakacaka ni vuli iVolatabu, ena sauma tale ga nomu lomatarotaro.

  3.  3. Drau na tuvanaka sara na iwalewale ni nomu vuli. E rawa ni caka na vuli ni gole yani i nomu vale o koya me vakavulici iko, se drau vakayagataka na talevoni, video call, vola ivola, se imeli. Rawa ni dua na aua na vuli, ia e rawa ni lekaleka se balavu me vakatau ena kemu ituvaki.

 Rawa niu tovolea mada ga e dua na lesoni?

 Io, vakalewena ga na fomu ni kere vuli iVolatabu ena neimami website. Ni veitaratara yani e dua na iVakadinadina i Jiova, tukuna vua ni o via tovolea ga na vuli mo raica ke o na taleitaka se sega. Ena vakayagataka o koya na brochure, Marau me Tawamudu! E tiko kina e tolu na lesoni e rawa ni o vakadeitaka kina mo vuli se sega.

 Au sa na dua na iVakadinadina i Jiova keu vuli iVolatabu?

 Sega. Ia keimami taleitaka na vakavulica na iVolatabu vei ira na tamata kece. Keimami sega ga ni vakasaurarataka e dua me lewena na neimami lotu. Keimami vakamacalataka tale ga ena veidokai na ka e kaya na iVolatabu. Ia e nomuni vakatulewa yadua sara ga na ka oni via vakabauta.—1 Pita 3:15.

 Rawa niu vakayagataka ga noqu iVolatabu?

 Io, rawa ni o digia na ivakadewa ni iVolatabu o via vakayagataka. Ia keimami marautaka na vakayagataka na iVakadewa ni Vuravura Vou, ni matata qai donu tale ga. Keimami raica ni levu era via vakayagataka ga na ivakadewa ni iVolatabu e matau vei ira.

 Rawa niu sureta eso tale mera vuli vata kei au?

 Io, rawa ni o sureti ratou nomu vuvale se itokani.

 Vakacava keu vuli tu ena dua na gauna kei ira na iVakadinadina i Jiova, e rawa niu vuli tale?

 Io. O na taleitaka sara na vuli ena gauna qo ni sa vakavoutaki na ka e vulici, qai vakarautaki sara ga me ganita na ituvaki ni bula ena gauna qo. O na sarava tale ga kina e levu na vidio kei na itaba, ena bulabula tale ga na vuli.

 Au rawa ni vulica ga vakataki au na iVolatabu?

 Io. Dina ni levu na vuli iVolatabu era marautaka me dua e vakavulici ira, ia eso era vinakata mera tekivu vuli mada ga vakataki ira. Na iVukevuke ni Vuli iVolatabu e tiko ena neimami website, e tu kina eso na ivukevuke kei na iwalewale e rawa ni vukei iko ni o vulica na iVolatabu. Qo eso na ivukevuke ena rawa ni yaga vei iko:

  •   Lesoni ni Vuli iVolatabu ena Internet (Online Bible Study Lessons). Ena saumi kina eso na taro bibi me baleta na bula, me vaka: O cei na Kalou? Na cava e yaco tiko kina na ca kei na rarawa? Ena vakaotia na Kalou na rarawa?

  •   Vidio Vakaivolatabu. Ena saumi na taro vakaivolatabu ena vidio leleka qo.

  •   Saumi naTaro Vakaivolatabu. Ena saumi e levu na taro vakaivolatabu ena ulutaga qo.

  •   iVakamacala ni Tikinivolatabu. O na kila kina na ibalebale ni tikinivolatabu kilai levu.