Raica sara na lewena

Na Cava e Kilai me Baleta na iRairai kei Jisu?

Na Cava e Kilai me Baleta na iRairai kei Jisu?

Kena isau vakaivolatabu

E sega ni dua e kila na irairai dina kei Jisu ni sega ni vakamacalataki qori ena iVolatabu. Kena ibalebale e sega ni bibi na irairai kei Jisu. Ia e vakamacalataka na iVolatabu eso na ka e rawa nida kila kina vakacaca na irairai kei Jisu.

  • Mata: E Jiu o Jisu, kena irairai ni rau veiucui kei tinana qai laurai toka vua eso na ka e kilai kina ni dua na Jiu. (Iperiu 7:14) De dua e tautauvata ga na kena irairai kei ira na kena vo. Sa rauta me sega ni bau kilai koya e dua ni gole mai Kalili i Jerusalemi ena dua na gauna. (Joni 7:10, 11) E rawa ni nanumi ni dua ga vei ratou na tisaipeli ke ratou duri vata tu. Nira gole yani na ilala levu mera lai vesuki Jisu, e rawa nira vesuka ga e dua e tu e kea ke a sega ni tukuna rawa tu o Jutasa e dua na ivakatakilakila.?—Maciu 26: 47-49.

  • Drauniulu: E sega ni vakabauti ni ulu balavu o Jisu ni kaya na iVolatabu e dau “maduataka na tagane ni balavu na drauniuluna.”?​—1 Korinica 11:14.

  • Kumi: E vakumi o Jisu. A muria nodra lawa na Jiu e vakatabui kina mera ‘kotiva vakasakuca na tutu ni kumidra’ na tagane. (Vunau ni Soro 19:27; Kalatia 4:4) E cavuti tale ga ni vakumi o Jisu ena dua na parofisai vakaivolatabu e vakamacalataki kina na veika rarawa ena caka vua.​—Aisea 50:6.

  • Yago: E vakadinadinataki ni bulicaki vinaka na yago i Jisu. E dau lakova e vica vata na maile ena nona cakacaka vakaitalatala. (Maciu 9:35) A curu ena nodra valenilotu na Jiu me vakatoboicutaka na nodra teveli na dauveisauilavo. A talia tale ga e dua na kuita ena dali me cemuri ira tani mai na valenisoro na sipi kei na bulumakau. (Luke 19:45, 46; Joni 2:14) E kaya na ivola na McClintock and Strong’s Cyclopedia: “E laurai ena itukutuku kece ni kosipeli ni kaukaua qai bulicaki vinaka na yagoi [Jisu].”—Volume IV, tabana e 884.

  • iRairai ni mata: E dau veikauaitaki o Jisu qai yalololoma, e laurai sara ga qori ena irairai ni matana. (Maciu 11:28, 29) E duidui na kedra ituvaki o ira era dau gole vua nira vinakata na veivuke se veivakacegui. (Luke 5:12, 13; 7:37, 38) O ira mada ga na gone era doudou ni torovi koya.—Maciu 19:13-​15; Marika 9:​35-​37.

Rai cala me baleta na irairai kei Jisu

Rai cala: Era kaya eso ni cavutu mai Aferika o Jisu ni kaya na Vakatakila e vaka na vauvau na uluna, na yavana e vaka na “kopa raradamu.”​—Vakatakila 1:​14, 15, The New Jerusalem Bible.

Ka dina: E “ivakatakilakila” na ka e volai ena Vakatakila. (Vakatakila 1:1) Na ivakamacala ni ului Jisu kei na yavana e vakatakarakarataka nona itovo ni vakaturi oti. E sega ni vakaibalebaletaki ina kena irairai ni se bula e vuravura. E kaya me baleti Jisu na Vakatakila 1:14: “E vulavula na drauniuluna me vaka na vulavula ni vauvau kei na uca cevata.” E vakabibitaki tiko e keri na roka, sega ni irairai. Qori e vakatakarakarataka na vuku i Jisu ni dua na gauna balavu sa bula voli mai kina. (Vakatakila 3:14) Na tikinivolatabu ya e sega ni vakatauvatana tiko na ului Jisu ina vauvau se na uca cevata.

Na yavai Jisu “e vaka na kopa vinaka ni vakatakatai ena lovo.” (Vakatakila 1:15) Na matana e “vaka na matanisiga ni cila kaukaua.” (Vakatakila 1:16) E sega ni dua na matatamata e va qori na roka ni kuliniyagona. Kena ibalebale na raivotu ya e vakatakarakarataka na nona “tiko ena rarama e sega ni torovi rawa” o Jisu ni vakaturi oti.​—1 Timoci 6:​16.

Rai cala: Malumalumu qai rerere o Jisu.

Ka dina: E sega ni rerere o Jisu. Kena ivakaraitaki, a sega ni vuni nira gole yani na ilala levu mera lai vesuki koya. (Joni 18:4-8) A se sega na misini ena gauna a cakacaka voli kina vakamatai o Jisu. Sa wacava nona kaukaua ni na vakayagataka ga na iyaya vakamatai sa bau tu ena nona gauna.—Marika 6:3

Na cava ga e vukei koya kina e dua tale ena colati ni kaunirarawa? Cava e mate kina e liu o Jisu rau qai mate e muri na le rua ratou vako vata? (Luke 23:26; Joni 19: 31-33) Dua na malumalumu levu e tarai Jisu ni voleka me vakamatei. A rairai vakavuna qori nona yadra tu ena bogi taucoko ena levu ni nona rarawa. (Luke 22: 42-44) Era vakararawataki koya na Jiu ena bogi, mataka tarava ra vuke na kai Roma na veivakararawataki. (Maciu 26: 67, 68; Joni 19: 1-3) Eso na ka va qori e rairai vakatotolotaka nona mate.

Rai cala: E matararawa tu ga o Jisu, e sega ni dau veikauaitaki.

Ka dina: A vakatotomuria vinaka o Jisu na nona itovo na Tamana vakalomalagi o Jiova, e kaya na iVolatabu “ni Kalou mamarau.” (1 Timoci 1:11; Joni 14: 9) A veivakavulici tale ga o Jisu ena sala me rawati kina na marau. (Maciu 5: 3-9; Luke 11:28) Kena ibalebale ena laurai sara ga e mata i Jisu na nona marau.