ADZESUA 49
Ebɛnadze Na Ibotum Ayɛ Ama Enyigye Aatsena W’ebusua Mu?—Ɔfa 1
Sɛ nyimpa beenu bi war fofor a, enyigye a wonya no, hɔn yamu a nkyɛ ɔbɛtsena hɔ daa. Enyigyesɛm nye dɛ, dɛm enyigye no botum atsena hɔ daa. Christianfo a wɔawar akyɛr, na wɔdze afotu a ɔwɔ Bible mu yɛ edwuma wɔ hɔn awar mu no bɛgye ato mu dɛ, iyi botum ayɛ yie ampa.
1. Ebɛn afotu na Bible no dze ma kunnom?
Edwuma a Jehovah dze ahyɛ kunnom nsa wɔ ebusua no mu nye dɛ, hɔn nye ebusua no ne tsir, kyerɛ dɛ, hɔn na ɔsɛ dɛ wodzi ndzɛmba enyim wɔ ebusua no mu. (Kenkan Ephesusfo 5:23.) Jehovah hwɛ kwan dɛ okun besisi gyinae ahorow a ɔbɔboa ebusua no. Bible no tu kunnom fo dɛ: “Hom [nkɔ do] ndɔ hom yernom.” (Ephesusfo 5:25) Dɛm asɛm yi kyerɛ dɛn? Dza ɔkyerɛ nye dɛ, okun a ɔdɔ ne yer no, odzi no nyi wɔ fie na abɔntsen do nyina. Ɔbɔ ne yer ho ban mbrɛ ɔbɛyɛ a asɛm bɔn biara ronnto no. Ɔyɛ dza obotum biara dze hwɛ ne yer na ɔyɛ ndzɛmba a ɔbɛma ne yer n’enyi agye. (1 Timothy 5:8) Afei, dza ohia paa no, ɔboa ne yer ma ɔnye Nyankopɔn ntamu yɛ kamakama. (Matthew 4:4) Dɛm mboa no bi nye dɛ, ɔnye ne yer bɔbɔ mu abɔ mpaa na ɔnye no akenkan Bible no. Sɛ okun bi dɔ ne yer na ɔhwɛ no yie a, ah, ɔma okun no na Jehovah ntamu yɛ kama aber biara.—Kenkan 1 Peter 3:7.
2. Ebɛn afotu na Bible no dze ma yernom?
Nyankopɔn n’Asɛm no ka dɛ “ɔyer dze, ɔmfɛr no kun.” Iyi kyerɛ dɛ, ɔsɛ dɛ obu no kun kɛse paa. (Ephesusfo 5:33) Obesi dɛn ayɛ dɛm? Obotum dze n’enyi ato famu na ɔaahwɛ suban pa a no kun no wɔ, nye mbɔdzen a no kun robɔ dze ahwɛ ɔno na mbofra no, na ɔaakamfo no wɔ ho. Nnyɛ iyi nko, sɛ no kun si gyinae bi a, ɔsɛ dɛ ɔtaa n’ekyir. Afei so, sɛ no kun nnsom Jehovah mpo a, ɔsɛ dɛ mbrɛ ɔnye no kasa, nye nsɛm a ɔka fa noho no nyina kyerɛ dɛ, odzi no kun nyi paa.
3. Ebɛnadze na awarfo botum ayɛ ama hɔn awar aasɔ?
Bible no ka dɛ, sɛ ɔbanyin na ɔbaa bi war a, ‘hɔn beenu no bɛyɛ honankor.’ (Matthew 19:5) Iyi kyerɛ dɛ ɔnnsɛ dɛ wɔma kwan koraa ma biribiara tsetsew hɔn ntamu. Sɛ wobotum ayɛ dɛm a, ɔwɔ dɛ wonya ber ma hɔnho, na wɔtaa nye hɔnho bɔ nkɔmbɔ. Afei so, osiandɛ wɔdodɔ hɔnho ntsi, ɔnnsɛ dɛ hɔn mu biara dze asɛm bi sie ne nyɛnko. Mbom no, ɔsɛ dɛ obiara tum ka n’akoma mu nsɛm nye mbrɛ osi tse nka no ho asɛm kyerɛ ne nyɛnko. Sɛ woyi Jehovah si nkyɛn a, ɔnnsɛ dɛ hɔn mu biara ma kwan ma obi fofor anaa biribi fofor biara ho hia no kyɛn no hokafo. Ɔsɛ dɛ okun na ɔyer nyina yɛ ahwɛyie paa na hɔn mu biara ammfa noho aannhyehyɛ nyimpa fofor bi.
PƐNSAPƐNSA MU KƆ EKYIR
Ma yɛnhwɛ Bible mu afotusɛm a ɔbɛma w’awar asɔ.
4. Kunnom—hom ndɔ hom yernom na hom nhwɛ hɔn yie
Bible no ka dɛ “ɔsɛ dɛ kunnom dɔ hɔnankasa hɔn yernom, dɛ hɔnankasa hɔn honam.” (Ephesusfo 5:28, 29) Dɛm asɛm yi kyerɛ dɛn? Ma yɛnhwɛ VIDEO yi, na yensusu asɛmbisa a odzi do no ho.
-
Ebɛnadze na okun bi botum ayɛ dze akyerɛ dɛ ɔdɔ ne yer na ɔdwen no ho?
Ma yɛnkenkan Colossaefo 3:12, na yensusu asɛmbisa yi ho:
-
Okun besi dɛn dze kyerɛwsɛm yi ayɛ edwuma wɔ n’awar mu?
5. Yernom—hom ndɔ hom kunnom na hom mbu hɔn
Bible no tu ɔyer fo dɛ, sɛ no kun som Jehovah o, sɛ ɔnnsom no o, ɔsɛ dɛ obu no. Ma yɛnkenkan 1 Peter 3:1, 2, na yensusu nsɛmbisa yi ho:
-
Sɛ wo kun nnsom Jehovah a, yenyim dɛ w’adaaso ara nye dɛ daakye bi, ɔbɛba abɔsom no. Naaso ehwɛ a, ebɛnadze paa na eyɛ a ɔbɔboa wo kun ma ɔaabɔsom Jehovah—edze Bible mu asɛm bogu no do da biara da, anaadɛ ebɛda suban pa edzi akyerɛ wo kun na ama oeehu dɛ ibu no? Ebɛnadze ntsi na ereka dɛm?
Sɛ kun na yer adwen yɛ kor a, ɔma wotum sisi gyinae pa. Naaso, ɔtɔ da a, obotum aba dɛ ɔyer no nye no kun rennyɛ adwen wɔ asɛm bi ho. Sɛ ɔba no dɛm a, ɔyer no botum atɔ no bo ara akyerɛ n’adwen wɔ obu mu. Naaso ɔwɔ dɛ ohu dɛ, Jehovah dze ahyɛ no kun no ne nsa dɛ ɔno na onsisi gyinae a ɔbɔboa ebusua no. Ntsi ɔsɛ dɛ ɔyɛ dza obotum biara na ɔtaa gyinae a no kun esi no ekyir. Sɛ ɔyɛ dɛm a, ɔbɛma obiara n’enyi agye wɔ ebusua no mu. Ma yɛnkenkan 1 Peter 3:3-5, na yensusu asɛmbisa yi ho:
-
Sɛ ɔyer bi dzi no kun nyi a, ɔyɛ a Jehovah tse nka dɛn?
6. Ibotum edzi ɔhaw biara a ibehyia wɔ w’awar mu no do
Awar biara nnyi hɔ a ɔhaw nnyi mu. Ntsi sɛ ɔhaw bi ba a, ɔsɛ dɛ kun na yer nyina bɔ mu siesie. Ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛn ndzɛmba na ihunii wɔ video no mu a ɔkyerɛ dɛ nna awarfo no ntamu resɛɛ?
-
Mbrɛ ɔbɛyɛ na hɔn awar no asɔ bio no, ebɛnadze na wɔyɛe?
Ma yɛnkenkan 1 Corinthfo 10:24 na Colossaefo 3:13. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:
-
Sɛ edze dɛm kyerɛwsɛm yi yɛ edwuma a, obesi dɛn aboa ma w’awar aasɔ?
Bible no ka dɛ ɔsɛ dɛ hɛn mu biara dzi ne nyɛnko nyi. Iyi ma yehu dɛ, ɔsɛ dɛ yɛnye afofor dzi no yie, na yebu hɔn. Ma yɛnkenkan Romefo 12:10, na yensusu nsɛmbisa yi ho:
-
Ana ɔsɛ dɛ okun anaa ɔyer bi tweɔn kesi dɛ no hokafo bedzi no nyi ansaana ɔno so edzi no nyi? Ebɛnadze ntsi na ereka dɛm?
BINOM KA DƐ: “Nkan no nna menye mo hokafo ntamu yɛ kama paa, naaso sesei dze ɔnntse dɛm.”
-
Sɛ obi ka dɛm a, ibesi dɛn ama oeehu dɛ Bible no botum aboa no?
DZA ESUA
Sɛ kun na yer dodɔ hɔnho, obiara bu ne nyɛnko, na wɔdze Bible mu afotusɛm bɔ hɔn bra a, hɔn enyi bɛgye.
Mbobɔdo
-
Ebɛnadze na okun botum ayɛ ama enyigye aatsena n’awar mu?
-
Ebɛnadze na ɔyer botum ayɛ ama enyigye aatsena n’awar mu?
-
Sɛ awar a, ebɛn Bible mu afotusɛm na obotum aboa wo ma w’awar aasɔ?
HWEHWƐ PII KA HO
Kenkan afotusɛm ahorow a obotum aboa ma w’ebusua enyi aagye wɔ nwomaba yi mu.
Hwɛ ndwom ho video yi, na ibohu dɛ sɛ obi dze Nyankopɔn n’afotu yɛ edwuma wɔ n’awar mu a, ohyira no.
Sua dza ɔyer yɛ a ɔkyerɛ dɛ ɔgye to mu dɛ, no kun na ɔyɛ ebusua no ne tsir ho adze.
“Mbaa, Ebɛnadze Ntsi Na Ɔsɛ Dɛ Hom Brɛ Homho Adze Hyɛ Tsiryɛ Ase?” (Ɔweɔn-Aban, May 15, 2010)
Hwɛ video yi, na ibohu mbrɛ afotu a Bible no dze ma wɔ awar ho no botum aboa awarfo paa.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
