Jehovah Adasefo wɔ nhyehyɛɛ bi a obotum aboa wo ma esua ndzɛmba pii efi Bible no mu. Sɛ yɛnye wo sua Bible no a, obotum aboa wo ma:

•   W’enyi agye

•   Abɛyɛ Nyankopɔn ne nyɛnko

•   Ehu anohoba ahorow a Bible no abɔ afa daakye ho

Wɔ dɛm ɔfa yi

•  Ebɛn kwan do na wɔyɛ Bible adzesua no?

•  Sɛ wɔnye me rusua adze a, mubotua ahen?

•  Ɔbɛgye ber tsentsen ahen ana wɔnye me esua buukuu no ewie?

•  Mibesi dɛn ahyɛ ase?

•  Mubotum ama wɔnye me ayɛ adzesua kor bi ahwɛ anaa?

•  Sɛ meka dɛ wɔnye me nsua Bible no a, aso ɔsɛ dɛ mebɛyɛ Jehovah Dasefo?

•  Mubotum dze mara me Bible ayɛ adzesua no a?

•  Mubotum afrɛ afofor ma wɔabɛka moho ma yeesua adze no?

•  Sɛ menye Jehovah Adasefo esua Bible no pɛn a, aso mubotum nye hɔn esua adze bio a?

•  Sɛ obi mmpɛ dɛ Ɔdasefo bi nye no sua Bible no a, aso hom wɔ nhyehyɛɛ bi a nankasa botum dze esua Bible no?

 Ebɛn kwan do na wɔyɛ Bible adzesua no?

 Obi nye wo bosua buukuu bi a wɔato dzin Ibotum Enya Enyigye Daa! Sɛ hom fa asɛntsir bi a nna woesusu ho, hom wie a nna hom afa fofor so. Nkakrankakra ibosua ndzɛmba pii wɔ Bible no mu na ibohu kwan a dza irusua no besi aboa wo. Hwɛ video yi, na ibohu ndzɛmba afofor pii.

 Sɛ wɔnye me rusua adze a, mubotua ahen?

 Irunntua hwee. Jehovah Adasefo dze akwankyerɛ a Jesus dze maa n’esuafo no yɛ edwuma. Ɔkaa dɛ: “Hom nyaa no kwa, hom mfa mma kwa.” (Matthew 10:8) Afei so ndzɛmba a yɛnye nkorɔfo sua no, bo biara nnda do; no mu bi nye Bible no nye buukuu a wɔato dzin Ibotum Enya Enyigye Daa!

 Ɔbɛgye ber tsentsen ahen ana wɔnye me esua buukuu no ewie?

 Adzesua nsɛm ahorow 60 na ɔwɔ buukuu yi mu. Ber tsentsen a edze bosua buukuu yi ewie no begyina woara wo do, naaso binom ebohu dɛ sɛ wotum sua adzesua asɛm kor anaa dza ɔbor dɛm wɔ dapɛn kor mu a, ɔboa hɔn paa.

 Mibesi dɛn ahyɛ ase?

1.  1. Hyehyɛ fɔɔm a ɔwɔ intanɛt do no. Woho nsɛm a edze bɛma hɛn no, adze kor pɛ na yɛdze bɛyɛ. Ɔno nye dɛ yɛdze bedzi w’ebisadze no ho dwuma, ama Jehovah Dasefo bi nye wo eebosua Bible no.

2.  2. Obi a ɔnye wo bosua adze no bɛfrɛ wo anaa ɔbɛba wo fie. Nyia ɔnye wo bosua adze no bɛma ehu mbrɛ ibotum enya Bible adzesua yi do mfaso kɛse, na nkyii so nsɛmbisa a ɔkyer w’adwen no, ɔbɔboa wo ma enya ho mbuae.

3.  3. Enye obi a ɔnye wo bosua adze no bɛyɛ adzesua no ho nhyehyɛɛ. Obotum aba wo fie nye wo ebosua adze. Hom botum so afa tɛlefon, video kɔɔl, krataakyerɛw, anaa email do ayɛ adzesua no. Mpɛn pii no, adzesua no botum edzi bɛyɛ dɔnhwer kor. Naaso dɛ adzesua no bɔbor dɔnhwer kor o, dɛ orunndu dɛm o, woara na ebɛkyerɛ.

 Mubotum ama wɔnye me ayɛ adzesua kor bi ahwɛ anaa?

 Nyew. Sɛ epɛ dɛ eyɛ dɛm a, hyehyɛ fɔɔm wɔ intanɛt do. Sɛ obi frɛ wo anaa ɔba wo fie dɛ ɔnye wo rubosua adze a, ma onhu dɛ epɛ dɛ ɔnye wo yɛ adzesua kor bi ma ehwɛ. Ɔnye wo bɛhyɛ ase esua Ibotum Enya Enyigye Daa! nwomaba no ahwɛ dɛ sɛ w’enyi bɛgye adzesua no ho a. Adzesua nsɛm ebiasa na ɔwɔ dɛm nwomaba yi mu.

 Sɛ mepen do dɛ wɔnye me nsua Bible no a, aso ɔsɛ dɛ mebɛyɛ Jehovah Dasefo a?

 Oho. Hɛn Jehovah Adasefo dze, hɛn enyi gye ho paa dɛ yɛdze Bible no bɛkyerɛkyerɛ nkorɔfo, naaso yɛnnhyɛ obiara dɛ ɔmbɛyɛ Jehovah Dasefo. Mbom, yefi obu mu kyerɛkyerɛ dza Bible ka no, na yɛgye to mu so dɛ obiara wɔ hokwan dɛ osi dza ɔbɛgye edzi ho gyinae.​—1 Peter 3:15.

 Mubotum dze mara me Bible ayɛ adzesua no a?

 Nyew, ibotum dze Bible nkyerɛase biara a epɛ no ayɛ adzesua no. Hɛn dze, hɛn enyi gye Wiadze Fofor Nkyerɛasee no ho osiandɛ ne nkyerɛasee no dzi mu na no mu da hɔ so. Naaso yeebohu dɛ nyimpa piinara so na hɔn enyi gye ho dɛ wɔdze Bible nkyerɛase a wɔwɔ no bɛyɛ adzesua no.

  Mubotum afrɛ afofor ma wɔabɛka moho ma yeesua adze no?

 Nyew. Ibotum ama w’ebusua anaa w’anyɛnkofo abɛka woho ma hom eesua adze.

 Sɛ menye Jehovah Adasefo esua Bible no pɛn a, aso mubotum nye hɔn esua adze bio a?

 Nyew ibotum. Wɔasesa buukuu a yɛdze yɛ adzesua no, nye kwan a yɛfa do yɛ adzesua no mu ma ɔroboa nkorɔfo pii ndɛ. Ne dɛm ntsi yɛgye dzi paa dɛ w’enyi bɛgye adzesua fofor yi ho mpo akyɛn nkan dze no. Wɔ dɛm buukuu a yɛdze yɛ Bible adzesua yi mu no, mfonyin na video ahorow pii wɔ mu, na enye nyia ɔnye wo bosua adze no so bɔbɔ adzesua no mu nkɔmbɔ paa..

 Sɛ obi mmpɛ dɛ Ɔdasefo bi nye no sua Bible no a, aso hom wɔ nhyehyɛɛ bi a nankasa botum dze esua Bible no?

 Nyew. Ɔwɔ mu, nyimpa pii ebohu dɛ sɛ wɔma obi nye hɔn sua Bible no a, ɔboa paa. Naaso wɔ binom so hɔn afamu no, ɔyɛ a ahyɛse no dze wɔmmpɛ dɛ obi nye hɔn sua Bible no, mbom wɔpɛ dɛ hɔnankasa sua hɔn adze. Sɛ ekɔ hɛn wɛbsaet do a, ɔfa bi wɔ hɔ a wɔato dzin “Ndzɛmba A Ibotum Dze Esua Bible No.” Wɔ dɛm ɔfa no, ibenya ndzɛmba pii a obotum aboa wo ma esua Bible no. Ndzɛmba ahorow a odzidzi do yi botum aboa wo paa:

•   Bible Ho Video Ahorow. Dɛm video ntsiantsia ahorow yi kyerɛkyerɛ Bible mu nkyerɛkyerɛ etsitsir bi mu.

•   Bible Mu Nsɛmbisa A Woebua. Dɛm nsɛm yi ma yenya Bible mu nsɛmbisa pii ho mbuae.

•   Kyerɛwnsɛm A Wɔakyerɛkyerɛ Mu. Hwɛ dza Bible mu asɛm na nsɛmfua ahorow bi kyerɛ ankasa.