Bible no hyɛ hɛn nkuran dɛ ɔwɔ dɛ yefi hɛn akoma mu kyɛ adze. Bible no san so ka dɛ sɛ obi yi ne yamu kyɛ adze a, nyia ɔregye akyɛdze no nye nyia ɔrekyɛ adze no nyina nya do mfaso. (Mbɛbusɛm 11:25; Luke 6:​38) Jesus kaa dɛ: “Ɔma yɛ nhyira kyɛn ɔgye.”​—Asomafo Ndwuma 20:35.

•  Ebɛn aber na sɛ obi kyɛ adze a Nyankopɔn n’enyi gye ho?

•  Ebɛn aber na sɛ obi kyɛ adze a Nyankopɔn n’enyi nngye ho?

•  Kyerɛwnsɛm ahorow bi a ɔfa adzekyɛ ho

 Sɛ obi fi ne pɛ mu kyɛ adze a, Nyankopɔn n’enyi gye ho. Bible no ka dɛ: “Dɛ mbrɛ obiara esusu wɔ n’akoma mu, nnyɛ nkɔmpewdo, anaa nhyɛdo; na Nyankopɔn dɔ nyia ɔtsew n’enyim ma.”​—2 Corinthfo 9:7.

 Dza ɔka nyamesom a Nyankopɔn gye to mu ho so nye dɛ obi beyi ne yamu akyɛ adze. (James 1:​27) Sɛ obi yi ne yamu boa nkorɔfo a hɔnho akyer hɔn no a, Nyankopɔn n’enyi sɔ, osiandɛ Nyankopɔn bu papayɛ a ɔtse dɛm no dɛ dza wɔdze afɛm no. (Mbɛbusɛm 19:17) Bible no ma yehu dɛ Nyankopɔn nankasa botua nyimpa a ɔkyɛ adze no kaw.​—Luke 14:12-​14.

 Aber a ɔnnyɛ adwen pa na ɔdze rekyɛ adze no. Nhwɛdo ahorow bi nye yi:

•   Ber a obi rekyɛ adze dze ahwehwɛ enyimnyam efi nyimpa hɔ.​—Matthew 6:2.

•   Ber a nyia ɔrekyɛ adze no nyim dɛ sɛ ɔkyɛ obi adze a, onyii no so bɛkyɛ no adze.​—Luke 14:12-14.

•   Ber a obi rekyɛ adze dze ahwehwɛ nkwagye efi Nyankopɔn hɔ.​—Ndwom 49:6, 7.

 Ber a ɔdze roboa dwumadzi bi anaa ndzeyɛɛ bi a Nyankopɔn kyir. Dɛ mfatoho no, ɔnnyɛ papa dɛ ebɛkyɛ obi sika dɛ ɔmfa nkɔtow kyakya, ɔmfa nkɔtɔ ndubɔn anaa ɔmfa nkɔwe nsa. (1 Corinthfo 6:9, 10; 2 Corinthfo 7:1) Obi so wɔ hɔ a, obotum ayɛ edwuma naaso ɔmmpɛ dɛ ɔyɛ. Nyimpa a ɔtse dɛm no ɔnnyɛ papa dɛ yɛbɔboa no.​—2 Thessalonicafo 3:10.

 Ber a obi kyɛ adze ara ma ɔno ntsi onntum nnhwɛ n’ebusua. Bible no kyerɛkyerɛ dɛ ɔsɛ dɛ ebusua tsir hwɛ ma n’ebusua nsa ka hɔn ehiadze. (1 Timothy 5:8) Ɔnnyɛ papa dɛ ebusua tsir bi bɛkyɛ adze ara ma ɔno ntsi orunntum nnhwɛ n’ebusua. Nyimpa binom so wɔ hɔ a nna wɔmmpɛ dɛ wɔbɔhwɛ hɔn awofo a woenyinyin no ma ɔno ntsi wɔkaa dɛ, biribiara a wɔwɔ no yɛ akyɛdze a woeyi esi hɔ ama Nyankopɔn. Jesus kasaa tsiaa hɔn a nna wɔreyɛ dɛm no.​—Mark 7:​9-​13.