San̄a Kpere Abasi

“Afo Ọyọsọn̄ọ Ada ye Owo Emi Ọsọn̄ọde Ada”

2 SAMUEL 22:26

IWAKKE se isibiakde nnyịn nte owo oro ikọbuọtde idem ndikpu m̀mê ndibian̄a nnyịn. Utọ edikpu oro ọyọyọhọ ererimbot emi mme owo mînyeneke nsọn̄ọnda mi. (2 Timothy 3:1-5) Ndi odu owo oro ikemede ndiberi edem ke ọyọsọn̄ọ ada ye nnyịn ọyọhọ ọyọhọ? Ẹyak ikere iban̄a se ikọwọrọde Edidem David ke Israel eset.

Mme owo ẹma ẹkpu David idiọk idiọk ke eyouwem esie. Ufụp ama anam Saul, emi ekedide akpa edidem Israel, anam enye akabade nyọn̄ onyụn̄ ọkọbọ enye. Ke ufọk ufọk, Michal an̄wan David ikọsọn̄ọke ida ye David ebe esie, edi ama “ese enye ke ndek ke esịt esie.” (2 Samuel 6:16) Ahithophel, emi ekedide ọnọitem David, ama akabade ada-owo-nnọ onyụn̄ etiene mbon nsọn̄ibuot an̄wana ye David. Anie ekedi etubom nsọn̄ibuot emi? Ekedi Absalom eyen David! Ndi mme owo ndikpu David ndien ndien ama anam enye ọduọk idotenyịn onyụn̄ ekere ke idụhe owo oro ẹkemede ndiberi edem?

Ikụt ibọrọ ke se David etịn̄de ke 2 Samuel 22:26, NW. David, kpa owo oro ekenyenede ọkpọsọn̄ mbuọtidem, ama etịn̄ uto emi aban̄a Jehovah Abasi ete: “Afo ọyọsọn̄ọ ada ye owo emi ọsọn̄ọde ada.” David ama enen̄ede enịm ke inamke n̄kpọ m̀mê mbon en̄wen ẹkpu imọ adan̄a didie, ke Jehovah ayaka iso ọsọn̄ọ ada ye imọ.

Ẹyak inen̄ede idụn̄ọde ikọ David oro. Ẹkeme n̄ko ndikabade ikọ Hebrew oro ẹkabarede “ọyọsọn̄ọ ada” nte “edinam ima-mfọnido.” Ima esinam owo enen̄erede ọsọn̄ọ ada. Ima esinam Jehovah ọsọn̄ọ ada ye mbon oro ẹsọn̄ọde ẹda ye enye. *

Fiọk n̄ko ke nsọn̄ọnda idịghe ikpîkpu ekikere; enye ananam n̄kpọ kpukpru ini, itiehe ndebe ndebe. David ama okụt ke idem esiemmọ ke Jehovah esisọn̄ọ ada. Ke ini oro David okosobode afanikọn̄ akan, Jehovah ama an̄wam enye, ọsọn̄ọ ada ekpeme onyụn̄ ọnọ anam-akpanikọ edidem emi ndausụn̄. David ama owụt esịtekọm onyụn̄ otoro Jehovah ke ndinyan̄a enye ‘nsio ke ubọk mme asua esie.’—2 Samuel 22:1.

Nso ke ikọ David ọwọrọ ọnọ nnyịn? Jehovah iyokke nyok inyụn̄ ikpụhọkede. (James 1:17) Enye ikpụhọkede mme edumbet esie, inyụn̄ itreke ndisu mme un̄wọn̄ọ esie. David ekewet ntem ke psalm en̄wen ete: “Jehovah . . . ikpọn̄ke mbon-ima esie,” m̀mê mbon oro ẹsọn̄ọde ẹda ye enye.—Psalm 37:28.

Jehovah esinen̄ede ama ndikụt nnyịn isọn̄ọde ida. Enye enen̄ede ama ke ini isọn̄ọde ida ikop uyo esie, enye onyụn̄ eteme nnyịn ete ikpebe nsọn̄ọnda imọ ke ini inamde n̄kpọ ye mbon en̄wen. (Ephesus 4:24; 5:1) Imekeme ndinen̄ede nnịm ke enye idikpọn̄ke nnyịn tutu amama edieke isọn̄ọde ida ntem. Inamke n̄kpọ m̀mê mbon en̄wen ẹkpu nnyịn adan̄a didie, imekeme ndinen̄ede nnịm ke Jehovah ọyọsọn̄ọ ada anam n̄kpọ ke ufọn nnyịn, onyụn̄ an̄wam nnyịn iyọ idomo ekededi oro isobode. Ndi enen̄ede ọdọn̄ fi ndisan̄a n̄kpere Jehovah, “emi enyenede nsọn̄ọnda”?—Ediyarade 16:5.

[Ikọ Idakisọn̄]