BAARA JUMANW LO BE KƐ N’I KA NILIW YE?
Buwati dennin dɔ, min sababu fɛ mɔgɔw be dumuni sɔrɔ Alako ta fan fɛ
SAAN 2020, SƐTANBURU TILE FƆLƆ
Sisan ka tɛmɛ sanga ni wagati bɛɛ kan, Jehova Seerew ye videwow ni sɛbɛ caaman bɔ ɛntɛrɛnɛti kan. Nka yɔrɔ caaman na duniɲa kɔnɔ, see tɛ an balima caaman ye ka taga ɛntɛrɛnɛti kan. Dɔw sigiyɔrɔ la, ɛntɛrɛnɛti be tigɛ tuma o tuma, a ka suma, wala a yɛrɛ tɛ yen fewu.
Nka sisan, an balima caaman be se k’an ka gafew ni videwow telesarse hali ni ɛntɛrɛnɛti t’u fɛ! O be se ka kɛ cogo di?
JW Box ye buwati dennin dɔ ye min be di kafow ma yɔrɔ min na bɛɛ tɛ se ka ɛntɛrɛnɛti sɔrɔ. O buwati kɔnɔ, rutɛri dɔ be yen an ye min san baarada dɔ fɛ. Betɛli ka biro min be ɔridinatɛriw koo ɲɛnabɔ, ale ye logiciel dɔ dilan ka don a kɔnɔ, ani ka jw.org ka gafew ni videwow don a kɔnɔ fana. JW Box kelen kelen bɛɛ sɔngɔ be se waa seegi ɲɔgɔn ma.
Balimaw b’u ka telefɔni n’a ɲɔgɔnnafɛnw konɛkte JW Box ka wifi la Masaya Boonw kɔnɔ ani u b’an ka gafew ni videwow telesarse. Hali telefɔni kɔrɔw wala telefɔni dasuw be minw fɛ, u be se ka konɛkte. Nka ni ɛntɛrɛnɛti tɛ kafo dɔ fɛ do? U be se k’a kɛ cogo di ka gafe kuraw sɔrɔ JW Box kɔnɔ? Betɛli be to ka clé USB dɔw ci u ma, jw.org ka gafew ni videwow be sɔrɔ minw kɔnɔ. U b’o clé USB kɔnɔnafɛnw don JW Box kɔnɔ. O clé USB kelen kelen bɛɛ sɔngɔ be se kɛmɛ naani ɲɔgɔn ma.
JW Box y’an balimaw dɛmɛ cogo di? Nathan Adruandra, ye denfa ye min be Kɔngo Kinsasa jamana na. A y’a ɲɛfɔ ko: “Kabi wagatijan n’ y’a ɲini ka videwo nunu telesarse: ‘Jehova, ne ye n jigi la ele le kan’ ani Aw ye aw hakili to Lɔti muso ka koo la. Nka n’ ma se k’u telesarse ka ye. O ye n’ jigi tigɛ. Sisan, n’ be se k’o videwow telesarse n’ ka telefɔni kɔnɔ ani o b’an dɛmɛ k’an deenw kalan koɲuman.”
Nizeriya, balimacɛ dɔ be kafow dɛmɛ ka JW Box koo ɲɛnabɔ. A y’a fɔ ko: “Balimaw be JW Box jati Jehova ka nilifɛnba dɔ ye. U ninsɔndiyanin lo kosɔbɛ k’a ye ko sisan, u be se k’an ka gafew ni videwow telesarse cogo nɔgɔman na.”
JW Box deen 1 700 ni kɔ cira ka ban balimaw ma Afiriki, Oseyani ani Ameriki worodugu fan fɛ. Labɛnw be kɛra fana walisa k’u ci kafo caaman wɛrɛw ma. O bɛɛ musakaw be sara cogo di? O be sera ka sara niliw sababu fɛ, o minw be kɛ an ka baara kama duniɲa kuru bɛɛ kɔnɔ. O niliw fanba be kɛ donate.jw.org kan. Aw ni ce aw ka niliw la.
