Mo̱ Yehova e Mudied’a dibie̱ e? Mbad’a bwam ńa jalabe̱ mu muedi ngedi po̱ ońol’a ye̱se̱ ńe nde jombwea la malea a mabolano̱. Me so̱ muse̱ṅ e? We̱le̱ la mo̱ o ebolo di mabola ná longe̱ di bate do̱lo̱ na be̱ne̱ pe̱ jándá e? Kiṅ’a Dibie̱ Salomo a tili bebwea ba minia. Mi matapa be̱be̱ na myudi ma longe̱ me̱se̱. Jombweye byembilan bō̱.

Be̱ne̱ne̱ la Loba Lakisane̱. Lakisane̱ nde le mweńa o mulatako ma bwam na Yehova. Salomo a tili ná: “Lakisane̱ Loba na mulema mo̱ngo̱ mwe̱se̱ nde o si lakisane̱ so̱ṅtane̱ lo̱ngo̱. O me̱se̱ o mabolano̱ o̱nge̱le̱ nde mo̱ nde a me̱nde̱ ne̱nge̱le̱ mangea mo̱ngo̱.” (Minia 3:5, 6) Be̱ne̱ne̱ la Loba lakisane̱ tongwea na wasa la bediedi bao na sengane̱ pe̱ mo̱ di mabola ná longe̱ di be̱ne̱ jándá la mbale̱. Nink’a bedangwedi be mabola moto a bwese̱ mulema ma Loba muńe̱nge̱ be bola pe̱ ná Yehova ālabe̱ mikumwan ma Satan mute̱nge̱ne̱ Mo̱.​—Minia 27:11.

Bolane̱ la Dibie̱ o Mulatako na bane̱. Malea Loba a mabolano̱ bome ba bai, bito ba babe̱ na bana me muse̱ṅ we̱nge̱ buka póndá ye̱se̱. Loba a malangwea bome ba bai ná: “Bwane̱ munj’ango̱ muńe̱nge̱,” nika e mapula nde kwala ná ba tike be̱ jemea na bito babu. (Minia 5:18-20) O kalat’a Minia, bito ba babe̱ ba maso̱ beteledi be londi na esese ba mut’ede̱mo ńena mom’ao na bana bao ba mubeano̱. (Minia, epasi 31) Bana pe̱ ba maso̱ bediedi o sengane̱ bayēdi babu. (Minia 6:20) Ni kalati e malee̱ pe̱ ná be̱ne̱ la mako̱m le mweńa ońolana be̱ la muso̱lo̱ki di mawana nde wasa la bwam ba moto mo̱me̱ne̱. (Minia 18:1) Mako̱m mena ma tute̱le̱ biso̱ o bola bwam to̱ bobe, ońola nika so̱ jángame̱ne̱ po̱so̱ mako̱m masu na dibie̱.​—Minia 13:20; 17:17.

Bolane̱ la dibie̱ ońol’a wame̱ne̱. Kalat’a Minia e be̱n malea ma tiki ońola samba muńo̱si, wasa be̱ne̱ besengedi ba bwam, janane̱ ba bobe na be̱ mot’a ngińa o ebolo. (Minia 6:6; 14:30; 20:1) E mome̱le̱ ná lakisane̱ la dibie̱ la mot’a benama buka Loba di malenea nde dibumbe. (Minia 14:12) E mome̱le̱ biso̱ o tata milema masu te̱nge̱ne̱ mambo ma matute̱le̱ o bola bobe, e mo̱nge̱le̱ pe̱ biso̱ ná “[o mulema] nde longe̱ di mabusano̱.”​—Minia 4:23.

Lodun la bato be o wase lo so̱i ná die̱le̱ longe̱ bupisane̱ nink’a malea di mabola ná longe̱ di bate do̱lo̱. Ońola nika ba be̱n bwam o jemea Yehova ka Mudied’abu.

​—Nika e se̱medi o kalat’a Minia.