OŃOLA BESO̱MBE̱
12: Mambo o mabupe̱no̱
NJE NIKA E MAPULANO̱ KWALA
Lambo o mabupe̱no̱ di titi mpuli mwena o me̱nde̱no̱ to̱ndo̱ londise̱—di buki nika. Po̱le̱ la mo̱ o su di mabaise̱ ná o te̱se̱ mambo, o be̱ ngiń’ebolo na ńai ńe ná ni tukwa mwano.
Mambo mō̱ ma mabaise̱ mińa to̱ woki jita ná o po̱le̱ mo̱ o su, mape̱pe̱ ma mabaise̱ myo̱di, mbu mō̱ to buka nika. We ná o po̱le̱ lambo o su di mabaise̱ mbu mō̱ to̱ buka nika, yete̱na wabi mo̱ mongo masadi ma woki to̱ myo̱di.
OŃOLA NJE NIKA ŃENO̱ MWEŃA
Po̱le̱ la lambo o mabupe̱no̱ o su di mabola ná, o bate be̱ne̱ne̱ wame̱ne̱ lakisane̱, wouse̱ mulatako mo̱ngo̱ ma mako̱m, o bate pe̱ be̱ bonam.
Be̱ne̱ne̱ la wame̱ne̱ lakisane̱: O te̱se̱ te̱ mambo masadi nde o po̱le̱ pe̱ mo̱ o su, nika e mabola wa mbaki o te̱se̱ mande̱ne̱. O mabata pe̱ be̱ne̱ lakisane̱ o lembe̱ mitakisan ma buńa te̱, ka mabandan ma mako̱m m’esukulu.
Mulatako ma diko̱m: Bato ba to̱ndi be̱ne̱ mako̱m ma mate̱se̱ mambo ba bino̱ ná be ná ba po̱le̱ o su, nika ná, bato ba bi nje ba mapulano̱ na bena be be̱be̱ o tuse̱ ńolo o po̱le̱ mo̱ o su. Omo̱ń a nika, mbad’a bwam ńa jouse̱ mulatako ńe nde ná bińo̱ na nune̱ moto lo be̱ne̱ lambo leno̱ o bupe̱ mwemba.
Bonam: O te̱se̱ te̱ mambo ma bupe̱ nde o po̱le̱ pe̱ mo̱ o su, we muńe̱nge̱ ná o tongwe̱le̱.
“Na to̱ndi be̱ne̱ mambo na mabupe̱no̱. Ma mabola ná na walame̱ne̱, ná be̱ne̱ pe̱ lambo neno̱ ná na po̱le̱ o su. Wombo pe̱ te̱ miwe̱n mo̱ngo̱, we muńe̱nge̱ o kwala ná, ‘Wē! na tongwe̱le̱ po̱n na mbale̱! Na po̱le̱ nje na tano̱ na te̱se̱ o bola.’”—Kristo̱f.
BETE̱SEDI BA BIBE̱L: “To̱ nja ńingilan jombwa la ngo̱ a si masa da; nu pe̱ ńingilan jombwa mawindi a si mumbwa.”—Mulangwedi 11:4.
NJE WENO̱ NÁ O BOLA
Bupe̱ man matanga ná o te̱se̱ na po̱le̱ pe̱ mambo o mabupe̱no̱ o su.
Te̱se̱ mambo ma po̱le̱ o su. Tila mambo o mabupe̱no̱ bupisane̱ mweńa mao, po̱so̱ ma me maboso, ma londe̱ maba, ma londe̱ malalo, na nika.
Ne̱ni po̱le̱ mo̱. Ońola lambo te̱, bola ninka ná:
-
Te̱se̱ pond’a po̱le̱ mo̱ o su.
-
Te̱se̱ nje yangame̱n bolabe̱.
-
Dutea ońola mikidi me ná mi po̱ na ne̱ni pe̱ buka mo̱.
Bola ka nje te̱ o te̱se̱no̱. O s’enge̱le̱ ná o bo̱le̱ te̱se̱ mambo masadi me̱se̱ denge̱ o mabotea. Baise̱ na wame̱ne̱ ná, ‘Njika lambo laboso neno̱ ná na bola o po̱le̱ o su nje na te̱se̱no̱ e?’ Nde o bole mo̱. Ombwea bońaki bo̱ngo̱ ponda te̱ o tongwe̱le̱no̱ o mama tanga diwo̱.
BETE̱SEDI BA BIBE̱L: “Dutea na ngiń’ebolo ba matombwane̱.”—Minia 21:5.
