Hebru 8:1-13
8 Atu kan chimmi kong ah a biapi bikmi cu hihi a si: Kannih cu, cu bantuk tlangbawi ngan kha kan ngei. Anih cu vancung ah a Liannganmi Pathian bawiṭhutdan orhlei kam ah a ṭhu.
2 Minung sakmi si loin Jehovah* sakmi thlam taktak le hmunthiang bik ah rian a ṭuan.
3 Tlangbawi ngan cu laksawng le raithawinak pek awkah rian an ngei; cucaah anih zong pakhatkhat a pek a hau ve.
4 Vawleicung ah um seh law cu tlangbawi a si hnga lo, zeicahtiah Nawlbia ning in laksawng a petu ding tlangbawi an um cang caah a si.
5 Mah tlangbawi hna ṭuanmi a thiangmi rian nih vancung he aa tlaimi thil kha a aiawh, an rian cu vancung he aa tlaimi thil muithlam a si. Moses nih thlam a sak lai ah Pathian nih hitin nawl a pek: “Tlang cung i kaan hmuhsakmi muisam ning tein zeizong vialte kha na tuah dih lai.”
6 Jesuh cu a ṭha deuhmi biakamnak i remnak sertu zong a si caah a ṭha deuhmi rian a hmu. Mah biakamnak cu a ṭha deuhmi biakam cung ah hrambunh in phung ning in fehter a si.
7 A pakhatnak biakamnak cu tlinlonak rak um hlah seh law a pahnihnak biakamnak a herh hnga lo.
8 Pathian nih a mi hna an tlinlonak kha a hmuh caah hitin a ti: “‘Israel mi le Judah mi he biakamnak thar ka ser lai caan a ra lio’ tiah Jehovah* nih a ti.
9 ‘Mah biakamnak cu Izipt ram in chuahpi awkah an kut in ka hruai hna lioah an pupa hna he ka rak sermi biakamnak he aa lo lai lo. Annih nih ka biakamnak kha an zulh lo caah zei ah ka rel ti hna lai lo’ tiah Jehovah* nih a ti.
10 “‘A hnuah Israel mi he hi biakamnak hi ka ser lai. Ka nawlbia kha an ruahnak chung ah ka chiah lai i an lungthin chung ah ka ṭial lai. Keimah cu an Pathian ka si lai i annih cu ka miphun an si lai’ tiah Jehovah* nih a ti.
11 “‘A hme bik in a ngan bik tiang nih an ka hngalh lai caah “Jehovah* kha hngalh i zuam u!” tiah an khuami hna le an unau hna kha cawnpiak a hau ti lai lo.
12 A ding lomi an tuahsernak kha ka ngaihthiam hna lai i an sualnak cu kaa cinken ti lai lo’ ti zong in a ti.”
13 Pathian nih “biakamnak thar” kong a chimmi nih a hmasa ta kha a hlunhter. A hlunmi le a ṭetmi cu an lo zau lai.
Footnotes
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
