Hebru 5:1-14
5 Minung aiawh in Pathian rian ṭuan awkah minung lakin thimmi tlangbawi ngan nih laksawng le sualnak caah raithawinak kha a pek.
2 Zei hngal loin sualnak a tuahmi hna cung ah zawnruahnak a ngei kho. Zeicahtiah amah theng zong derthawmnak a ngeimi a si.
3 Cucaah midang sualnak caah raithawinak a pek bantuk in amah ca zong ah a pek a hau ve.
4 Mi pakhat cu amah tein tlangbawi ngan ah aa ser kho lo. Aaron bantuk in Pathian nih a thim lawng ah tlangbawi ngan a si kho.
5 Cu bantuk in Khrih zong tlangbawi ngan ah i ser in amahle amah aa hlorh lo. Mah canah “Nangmah cu ka fapa na si; nihin ah keimah cu na pa ka hung si” tiah a titu Pathian nih a hlorhmi a si.
6 Cun a dang cacaang zong ah “Nangmah cu Melkhizedek bantuk in tlangbawi na si zungzal lai” tiah Pathian nih a ti.
7 Khrih cu vawleicung a rak nun lioah thihnak in a khamh khotu Pathian sinah fakpi in a ṭap i mitthli he thla a cam i a nawl. Pathian a ṭih caah a thlacamnak cu ngaihpiak a si.
8 Pathian fapa a si ko nain sifah harnak a innak thawng in nawlngaih awkah a cawn.
9 Sining a tlinh dih cikcek hnuah a nawl a ngaimi hna cu amah thawng in zungzal khamhnak an hmu kho.
10 Zeicahtiah Pathian nih Melkhizedek bantuk in tlangbawi ngan si awkah rian a pek caah a si.
11 Amah kong he aa tlaiin chim ding tampi kan ngei. Asinain hngalhthiam awkah nan i zuam lo caah* fianter awkah a har ko.
12 Atu ah hin cun cawnpiaktu hmanh nan si awk a si cang. Asinain Pathian bia chung i a hrampi a kong hna kha pakhatkhat nih cawnpiak ṭhan nan herh. Rawl hak kha ei loin hnuk tu nan ding rih ko.
13 Hnuk ṭheo a ding rih komi cu ngakchia a si caah dinnak he aa tlaimi Pathian bia kha a hngalthiam lo.
14 Asinain rawl hak cu nutling, patling a simi nih an ei. Annih nih a hmaan le hmaan lo thleidan khawh awkah an khuaruah khawhnak kha an hmannak thawng in an cawnpiak.
Footnotes
^ Asiloah “ngaihnak lei ah nan khul a nuarh caah.”
