Hebru 10:1-39
-
Saram raithawinak i a derthawmnak (1-4)
-
Nawlbia, muithlam (1)
-
-
Voikhat ah zungzal ca in pekmi Khrih raithawinak (5-18)
-
Nunnak ah a hruaimi lam thar (19-25)
-
Hmunkhat ah i pumh kha daithlang hlah u (24, 25)
-
-
Hramhram in sualnak tuahnak kong ralrin peknak (26-31)
-
Inkhawhnak ngeih awkah zumhnak a herh (32-39)
10 Nawlbia cu a ra laimi thilṭha muithlam a si. Thilṭha taktak kha cu a si lo. Nawlbia* le kum fatin pek lengmangmi raithawinak nih Pathian a biami hna kha zeitik hmanh ah mitling a siter kho hna lo.
2 Rak siter kho hna seh law rai a thawitu* cu voikhat ah zungzal ca in an thiang lai i sual phuhrunnak an ngeih ti lai lo caah raithawinak pek lengmang a hau ti lai lo.
3 Asinain raithawinak cu kum fatin an sualnak hngalhter ṭhantu a si.
4 Zeicahtiah cawtum thi le meheh thi nih cun sualnak kha a hlo kho lo.
5 Cucaah Khrih nih hi vawlei a rat tikah “‘Raithawinak le pekchanhnak hi na duhmi an si lo. Asinain ka caah taksa pum kha na ka timhpiak cang.
6 A pum ning in khangh thawinak le sual thawinak hna zong hi na lawmhmi an si lo.’
7 Cun ‘Maw Pathian, (cazual ah ka kong aa ṭial bang in) na duhnak tuah awkah ka ra’” tiah a ti.
8 Nawlbia ning in pekmi “raithawinak, pekchanhnak, a pum ning in khangh thawinak, sual thawinak hna hi na duhmi le na lawmhmi an si lo” tiah a ti hmasa hnuah,
9 “Na duhnak tuah awkah ka ra” tiah a ti. A pahnihnak timhtuahnak kha fehter awkah a pakhatnak timhtuahnak kha a hloh.
10 Pathian “duhnak” ning in Jesuh Khrih nih a pum kha voikhat ah zungzal ca in a peknak thawng in kannih cu thianter kan si cang.
11 Tlangbawi kip nih nifate anmahle hmun ah dir in a thiangmi rian kha an ṭuan i raithawinak kha an pekchanh lengmang. Asinain mah raithawinak nih sualnak kha tling tein a hlo kho lo.
12 Khrih tu cu sualnak caah raithawinak pakhat kha zungzal ca in a pek hnuah Pathian orhlei kam ah a ṭhu i,
13 a ral hna kha a ke tang ah Pathian nih a chiah hna hlan tiang a hngah.
14 Khrih pekmi raithawinak pakhat thawng in thianter a simi hna cu zungzal in a tlingmi an hung si.
15 Cu kong cu thiang thlarau zong nih kan sinah hitin tehte a khaan:
16 “‘A hnuah anmah he hi biakamnak hi ka ser lai. Ka nawlbia kha an ruahnak chung ah ka chiah lai i an lungthin chung ah ka ṭial lai’ tiah Jehovah* nih a ti.”
17 Cun “An sualnak le a ṭhalomi an tuahsernak kha kaa cinken ti lai lo” ti zong in a ti.
18 Sualnak cu ngaihthiam a si cang ahcun sualnak caah raithawinak pek a hau ti lo.
19 Cucaah unau hna, Jesuh thisen thawng in A Thiang Bikmi Khaan chung luhnak lam ah ralṭha tein kan kal kho cang.
20 Jesuh nih puanzar chung ah a luhnak thawng in nunnak ah a hruaimi lam thar kha a kan hunpiak. Mah puanzar cu a taksa pum kha a si.
21 Pathian inn a zohkhenhtu a liannganmi tlangbawi kan ngeih caah,
22 lungtak tein le a fekmi zumhnak he Pathian kha naih hna u sih. A ṭhalomi chiaṭha thleidannak lungthin kan ngeih nakhnga lo kan lungthin kha kan thenh* cang i kan pum kha ti thiang in kan kholh cang.
23 Bia a kan kamhtu Pathian cu zumhawktlakmi a si caah kan i ruahchannak kong kha lungṭe lo tein le teima tein zapi hmaiah thanh hna u sih.
24 Dawtnak langhter awk le rian ṭha ṭuan awkah pakhat le pakhat i forh hna u sih law kan zawn i ruat hna u sih.
25 Mi cheukhat cu hmunkhat ah i pumh kha zei rel loin an um tawn, kannih tu cu hmunkhat ah i pumh kha daithlang hna hlah u sih. Pakhat le pakhat thazaang i pe hna u sih. Pathian Ni cu a nai cang ti kan hngalh caah fakpi in i zuam hna u sih.
26 Biatak kong a hmaanmi hngalhnak kan ngeih hnuah hramhram in sualnak kan tuah peng ahcun sualnak caah raithawinak zeihmanh a um ti lo.
27 Biaceihnak kha ṭihphang ngai in hngah le Pathian a ralchanhmi hna a kangtu ding a thinhunnak mei lawng a taang cang.
28 Moses Nawlbia zei i a rel lomi cu tehte pahnih, pathum bia in zaangfahnak um loin thih dan pek an si.
29 Pathian Fapa a ke in a lamchihmi, amah a thiantertu biakamnak thisen a sunsak lomi, velngeihnak a langhtertu Pathian thiang thlarau zei i a rel lomi cu a fak chinchinmi dantatnak in awkah an i tlak ko lo maw?
30 “Phuhlam cu keimah ta a si; keimah nih ka lehrulh ko lai” tiah a titu Pathian kha kan hngalh. “Jehovah* nih a miphun cu bia a ceih hna lai” ti zong in cathiang ah aa ṭial.
31 A nungmi Pathian sinin dantatnak hmuh cu thil ṭihnung ngaingai a si.
32 Hlanlio caan kong kha i cinken peng u. Ceunak chung nan phanh hnuah harnak tampi nan ing i fakpi in nan rak doh.
33 A caan ah zapi hmaiah* serhsatnak le hremnak hna nan tong. A caan ah cun cu bantuk thil a tongmi hna i an harnak kha nan inpi hna.
34 Thongtlami hna cung ah zawnruahnak nan langhter. Nan thilri an in chuh hna tikah lunglawm tein nan pek hna. Zeicahtiah a ṭha deuhmi le a hmunmi ro nan ngeih kha nan hngalh caah a si.
35 Cucaah nan ralṭhatnak* kha thlau sual hlah u, ralṭhatnak nih laksawng tampi aan hmuhter hna lai.
36 Pathian duhnak nan tuah hnuah biakammi nan co khawh nakhnga inkhawhnak ngeih a herh.
37 Zeicahtiah “a rauhhlan te ah a ra liomi* cu a phan cang lai, a rau ti lai lo.”
38 “Miding mi cu zumhnak thawng in a nung lai, asinain aa let ṭhan ahcun a cung ah ka lung aa lawm lai lo” tiah a ti bang khan a si.
39 Kannih cu aa let ṭhan i hrawh a si dingmi kan si lo. Zumhnak a ngei i nunnak a kilvengmi kan si.
Footnotes
^ Asiloah “Minung” ti zong a si kho. Mah cu tlangbawi hna kha a chim duhmi a si.
^ Asiloah “a thiangmi rian a ṭuantu.”
^ Thlaihhlei A5 ah zoh.
^ A hrampi, “theh.” Jesuh thi in theh kha a chim duhmi a si.
^ Thlaihhlei A5 ah zoh.
^ A hrampi, “puai tuahnak ah.”
^ A hrampi, “zalong tein biachimnak nawl.” Biafang Fianternak ah zoh.
^ Pathian kha a chim duhmi a si kho.
