Hebru 7:1-28
7 Melkhizedek cu Salem siangpahrang a si i Cung Nung Bik Pathian tlangbawi a si. Abraham nih raltuknak ah siangpahrang pawl a thah hnanak in a rak kir tikah a va ton i thluachuah a pek.
2 Abraham nih hranchaw a lakmi chung in cheuhra cheukhat kha a pek. Melkhizedek a min sullam cu “Dinnak Siangpahrang” ti a si. Anih cu Salem siangpahrang zong a si i mah cu “Daihnak Siangpahrang” tinak a si.
3 A nu le a pa kong siseh, a chuahkehnak kong siseh ṭialmi zeihmanh a um lo. A chuah ni le a thih ni zong hngalh a si lo. Cuticun Pathian Fapa bantuk a si i zungzal tlangbawi a si.
4 Pupa Abraham nih hranchaw lakin a ṭha bik cheuhra cheukhat a pekmi mah pa cu zeitluk in dah a lianngan lai ti kha ruat hmanh u.
5 Nawlbia nih tlangbawi rian a ṭuanmi Levi mi kha an unau hna sinin cheuhra cheukhat kholh awkah nawl a pek hna. A tak ti ahcun an unau hna cu Abraham tefa an si ve ko.
6 Asinain Levi tefa a si lomi Melkhizedek nih biakam a hmumi Abraham sinin cheuhra cheukhat kha a lak i thluachuah a pek.
7 Thluachuah a petu cu a hmutu nakin a ngan deuh ti cu a fiang ko.
8 Cheuhra cheukhat a hmutu Levi mi cu a thi khomi minung an si. Asinain cheuhra cheukhat a hmutu a dang pakhat tu cu a nungmi a si tiah cathiang nih a ti.
9 Cheuhra cheukhat a hmutu Levi mi hmanh nih Abraham sinin cheuhra cheukhat an pek ve ti khawh a si.
10 Zeicahtiah Melkhizedek nih Abraham a va ton lioah Levi mi hna cu pupa Abraham i a chuak rih lomi tefa an si.
11 Israel mi sin pekmi Nawlbia ah Levi mi hna tlangbawi rian zong aa tel, mah tlangbawi rian nih tlinnak a chuahter khawh ahcun Aaron bantuk si loin Melkhizedek bantuk tlangbawi dang pakhat a hau ti hnga maw?
12 Tlangbawi rian aa thlen tikah Nawlbia zong thlen a herh ve.
13 Cutin a kong a dikthliar in chimmi pa phun chung in biakṭheng ah rian a ṭuanmi ahohmanh an um bal lo.
14 Kan Bawipa cu Judah phun chung in a chuak ti cu a fiang ko, asinain Moses nih Judah phun chung in tlangbawi an chuak lai tiah a chim bal lo.
15 Tlangbawi rian thlennak a um lai timi cu Melkhizedek bantuk tlangbawi dang a chuah tikah a hung fiang chinchin.
16 Anih cu nawlbia ning in thisa chuahkehnak ruang ah tlangbawi a simi a si lo, a rawk kho lomi nunnak a petu ṭhawnnak thawng in a simi a si.
17 Zeicahtiah cathiang nih “Nangmah cu Melkhizedek bantuk in tlangbawi na si zungzal lai” tiah a ti.
18 Cucaah nawlbia hlun cu a derthawm ca le hmual a ngeih lo caah hlawt a si.
19 Nawlbia nih zei thil hmanh a tlinter kho lo, asinain Pathian pekmi a ṭha deuhmi ruahchannak nih cun a tlinter khawh. Mah ruahchannak thawng in Pathian he kan i naih kho.
20 Cun Pathian nih chiatserh biakamnak in Jesuh kha tlangbawi rian a pek.
21 (Chiatserh biakamnak loin tlangbawi a hung simi mi cheukhat an um. Asinain Jesuh tu cu chiatserh biakamnak thawng in tlangbawi a hung si. Amah he aa tlaiin Pathian nih “‘Nangmah cu tlangbawi na si zungzal lai’ tiah keimah Jehovah* nih chiat ka ser i ka lung aa thleng lai lo” tiah a ti.)
22 Jesuh cu a ṭha deuhmi biakamnak i aamah khangtu a hung si.
23 Mah leng ah tlangbawi hna cu an thih caah an rian kha an pehzulh kho ti lo. Cucaah midang nih an rian kha chaan a hau.
24 Jesuh tu cu zungzal in a nun caah tlangbawi rian kha midang nih chaan a hau lo.
25 A min in Pathian sinah thla a cammi paoh kha tling tein a khamh khawh hna. Zeicahtiah an ca i nawlpiak awkah a zungzal in a nung.
26 Zumhawk a tlakmi, sualnak a ngei lomi, a thurhnawm lomi, misual hna he aa lo lomi, vancung nakin a san deuhnak ah hlorhmi amah bantuk tlangbawi ngan kha kan herhmi a si.
27 A dang tlangbawi ngan hna cu a hmasa bik ah anmah sualnak ca, a hnuah midang sualnak caah nifate raithawinak an pek. Asinain anih tu cu amahle amah voikhat ah zungzal ca in aa pek cang caah cutin tuah a hau lo.
28 Nawlbia nih mitlinglo a simi minung kha tlangbawi ngan rian a pek hna. Asinain Nawlbia hnuah a rami chiatserh biakamnak nih cun zungzal in a tlingmi Fapa kha rian a pek.
Footnotes
^ Thlaihhlei A5 ah zoh.
