Hebru 6:1-20
6 Cucaah Khrih he aa tlaimi a hrampi cawnpiaknak kha kaltak in nutling, patling si awkah i zuam hna u sih. A hrampi cawnpiaknak kha hlathlai ṭhan lengmang ti hlah u sih. Mah hna cu thihnak a phanhtermi thil tuahnak in i ngaihchihnak, Pathian zumhnak,
2 tipil innak, kut chuannak, mithi thawhṭhannak le zungzal biaceihnak ti bantuk cawnpiaknak hna an si.
3 Pathian nih nawl a kan awnh ahcun nutling, patling kan si kho lai.
4 A hlanah ceunak chung ah a um balmi, vancung laksawng a tep balmi, thiang thlarau a hmu balmi,
5 Pathian bia a ṭhatnak le a ra laimi chan* ah hmuh dingmi thluachuah* a tep balmi hna cu,
6 zumhnak in an pial ahcun i ngaihchihnak lei ah kirpi ṭhan khawh an si ti lo. Zeicahtiah Pathian Fapa kha tung cung ah an khenh ṭhan i zapi hmaiah a mual an phohmi bantuk a si.
7 Vawlei caah ruahti cu Pathian thluachuah a si, zeicahtiah vawlei nih ruahti kha a dawp tikah a thlotu caah theipar a chuahter.
8 Asinain hling le belh lawng a chuahtermi vawlei tu cu hlawt a si, tlawmpal ah chiatserh a si lai i a donghnak ah khangh a si lai.
9 Asinain ka dawtle hna, hitin chim ko hmanh u sih law nannih tu cu a ṭha deuhmi dirhmun ah nan um i khamhnak a hmuhtermi thil nan tuah ti kha kan zumh.
10 Mithiang mi kha nan bawmhchanh hna i atu zong ah nan bawmhchanh rih ko hna. Pathian cu a dingmi a si caah nan rianṭuannak le a min ruang ah nan langhtermi dawtnak kha a philh lai lo.
11 Asinain nan i ruahchanmi kha a dongh tiang fek tein nan zumh khawh nakhnga a hramthawk tein nan ngeihmi teimaknak kha ngei peng u ti kan in duh hna.
12 Nan thathu hlah u ti kan in duh hna. Zumhnak le lungsaunak thawng in biakam a comi kha i zohchunh hna u.
13 Pathian nih Abraham bia a kamh lioah amah nakin a ngan deuhmi an um ti lo caah amahle amah chalh in chiat a ser.
14 “Thluachuah kaan pek hrimhrim lai i na tefa cu ka karhter hrimhrim hna lai” tiah a ti.
15 Abraham nih lungsau tein a hngah hnuah mah biakam kha a hmuh.
16 Mi nih anmah nakin a ngan deuhmi kha chalh in chiat an ser tawn, mah nih an bia kha phung ning in a fehter caah bia alnak kha a donghter.
17 Cu bantuk in Pathian nih aa thleng kho lomi aa tinhnak kha biakammi rocotu hna sinah fiang tein langhter ding in bia a khiah tikah a biakamnak cu chiatserhnak in a fehter.
18 Aa thleng kho lomi thil pahnih cu biakamnak le chiatserhnak an si i mah kong ah Pathian cu lih a chim kho lo. Cucaah Pathian sinah aa dormi kannih cu kan hmaiah chiahpiakmi ruahchannak kha fek tein i tlaih awkah thazaang ṭhawng kan ngei kho.
19 Kan ngeihmi ruahchannak cu kan nunnak caah a fiang i a fekmi thir cangai bantuk a si, mah ruahchannak nih puanzar chung ah a kan luhpi.
20 Jesuh cu kanmah hlan in puanzar chung ah a lut i lam a kan hunpiak. Anih cu Melkhizedek bantuk in zungzal tlangbawi ngan a hung si.
