Mika 6:1-16
6 Lisesa, panjikenu yize Yehova anambe.
Katukenu nwambulule milonga yenu kuli milundu.Mindundena yive maliji jenu.
2 Yenu milundu, ni yenu fundamentu jikolo ja hashi,Panjikenu chikuma cha Yehova,Mumu Yehova kali ni chitela cha kulimika ni atu jenyi,Iye mahanjika hanga alimike ni A-Izalele ngwenyi:
3 “Yika nanulinga atu jami?
Kuchi nanuhongesa?
Lumbununenu chikuma chenu.
4 Mumu yami nanuchijile mu chifuchi cha Engitu,Nanulamwinyine mu chifuchi cha undungo,Natumine Mose, Arone ni Miriame hanga anusongwele.
5 Atu jami, lisesa, iwulukenu yize Mbalake mwanangana wa Moape ambile,Ni chize Mbalau mwana wa Mbeore amukumbulwile,Iwulukenu yuma yize yalingiwile ku Shitime ndo ku Ngilingali,Hanga nunyingike yilinga ya ululi ya Yehova.”
6 Yika natamba kuya nayo kumeso ja Yehova?
Yika natamba kufulamana nayo kumeso ja Zambi yoze watwama homa hanangama?
Shina munguya kumeso jenyi ni milambu ya kulumba,Hanji ana-ngombe a mwaka umuwika?
7 Shina Yehova mawahilila ni tununu twa kuji a mapanga?Shina mawahilila ni makumi a tununu a ngiji ja maji?
Shina munguhana mwanami mutangu mumu lia uhulia wami,Munguhana mwanami mutangu mumu lia shili yami?
8 Yena mutu, iye hanakulweze yuma yipema,
Yika yize Yehova akwita kuli yena?
Iye kakukwita wika hanga ulinge yuma ya ululi ni kuzanga ushishiko,Ni kwenda ni kulikehesa cheswe kumeso ja Zambi ye!
9 Liji lia Yehova linakololoka mu mbonge,Waze akwete mana makevila woma jina lienyi.
Panjikenu kanawa mulumbu ni yoze watongwele mulumbu wacho.
10 Shina mu zuwo lia mutu mupi muchili upite uze apichile mu ungulungulu wenyi,Ni cheseko cha efa cha kutepulula cha uzelwokeso?
11 Shina munguhasa kupwa walinanga nyi nakukalakala ni cheseko cha mahuza,Ni njeke muze muli mawe a kweseka no a kwonga no?
12 Mumu pichi jenyi kanazala too ni upupilo,Atu jenyi kakuhanjika mahuza,Malimi jo kakwonga.
13 “Kashika, yami mungukulamba ni kukulemeka,Mungukuhichika mokomoko mumu lia shili ye.
14 Yenu munukalia, alioze kunuchi kakuta,Mu majimo jenu mumukapwa mwamokomoko.
Munukasa tachi hanga nuswekele upite wenu ha chihela chipema, alioze kunuchi kahasa kuufunga,Yize mukahasa kumbata, yami mungukaayikunjika ku mukwale.
15 Yena mukakuwa, alioze kuchi kacha.
Mukaliata-liata mihuko ya ulevwe, alioze kuchi kalia maji jako,Mukaliata-liata uva, alioze kuchi kanwa vinyu yako.
16 Yenu nwakukaula shimbi ja Omiri ni yitanga yeswe ya akwa-zuwo lia Ahabe,Nwakwenda kulita ni yiyulo yo.
Kashika, mungunupwisa chuma cha kukolesa woma,Atu waze atwamamo mungwapwisa chuma cha kwimbila muluzu.Munukanyongonona muze makanulelesa kuli atu eka ni eka.”
