Mika 2:1-13
2 “Lamba kuli waze a kunyonga kulinga yuma yipi,Waze akutesa kulinga yuma yipi muze ali ha mihela yo!
Muze mukucha, mayimanununa,Mumu kali ni ndundo ja kuchilinga.
2 Muze ayo akuzanga minda, kakuyitambula ku tachi,Muze akuzanga mazuwo kakwatambula,Kakulionga hanga atambule zuwo lia umwe mutu,Kakutambula yihinga ya akwo.
3 Kashika, Yehova kanambe ngwenyi:
‘Munguneha lamba hali yenu lize kunuchi kuhasa kuchina.
Yenu kunuchi kenda nawa ni kulizata, mumu mashimbu jacho makapwa mashimbu a lamba.
4 Ha tangwa liacho, atu makanuta mu chishima,Makalinyenga chinji mumu lia yenu,
Ayo makamba ngwo: “Hatunongesa liakulu!
Iye hatambula chihinga chetu hachihana kuli atu akwo!
Iye kakutetela minda yetu kuli atu waze keshi kushishika.”
5 Kashika, yena kuchi kapwa ni mutu niumwe hanga olole lwoji wa kweseka nenyi,Hanga atetele chifuchi chikungulwila cha Yehova.
6 Ayo kakwambujola ngwo: “Kanda nwambujola!”“Kanda nwambujola yuma yino,Tuchi keva sonyi!”
7 Yenu akwa-zuwo lia Yakomba nwakwamba ngwenu:
“Shina spiritu ya Yehova kuyisolo nawa kulihumikiza?
Yino ye yitanga yenyi?”
Shina maliji jami keshi kuyukisa atu waze akwenda mu ululi?
8 Matangwa wano ene atu jami kangukatukilanga ngwe akwa-kole.
Mumu nwakuzula hatoma chikuto chipemaCha waze akwenda mu matapalo ngwe waze anakatuka ku jita.
9 Yenu nwakuhuma mapwo ja atu jami mu mazuwo jo apema,Nwakutambula uhenya wami kuli ana jo ku miaka yeswe.
10 Katukenu nuye, mumu chino hi chihela ko cha kuhwimina.
Mumu lia luchisa, mukukapwa unongeso, unongeso ukalu chinji.
11 Nyi umwe mutu makaula fuji ni kuhanjika mahuza, mba mamba mahuza wano ngwenyi:
“Mungunwambulwila hakutwala ku vinyu ni walwa ukwo usasu,”
Iye mwe watela kwambulwila atu wano!
12 Yena Yakomba, pundu lume yami mungunukunga yenu eswe.Ewa, mungukungulula masalila eswe ja Izalele.
Mungunununga ngwe mapanga mu limba,Ngwe yimuna ku ulilo,Koko mukukapwa zungo lia atu anji.’
13 Yoze wakulokola chituwa makaatetekela,Ayo makalokola chituwa, makatuhukila ku chikolo.
Mwanangana wo makaatetekela,Yehova makapwa kulutwe lio.”
