Mika 4:1-13
4 Ha matangwa a kusula,Mulundu wa zuwo lia YehovaMuukakola helu lia milundu yikwo,Muukapwa usuku kuhiana mindundena,Atu anji makayako.
2 Mavungu anji makayako ni kwamba ngwo:
“Tweyenu tukanduke ku mulundu wa YehovaKu zuwo lia Zambi ya Yakomba.
Iye makatulongesa majila jenyi,Yetu mutukendelamo.”
Mumu ku Zaione mukukakatuka shimbi,*Ku Yerusaleme mukukakatuka liji lia Yehova.
3 Iye makapwa ngaji wa atu esweMakahwisa milonga yeswe ya akwa-mavungu a ndundo waze atwama kusuku.
Ayo makalumuna mikwale yo yipwe matemo a kulima no,Makunga jo makalumuna apwe poko ja kululieka najo mitondo.
Vungu limwe kulichi kalimika ni vungu likwo,Kechi kalilongesa nawa kwasa jita.
4 Mutu ni mutu makatwama mwishi lia mutondo wenyi wa uva ni mwishi lia mukuyu wenyi,Niumwe makaakolesa woma wakuhi,Mumu Yehova wa tujita mwe wachamba.
5 Mumu atu eswe makenda mutu ni mutu mu jina lia kazambi kenyi,Alioze yetu mutukenda mu jina lia Yehova Zambi yetu ku miaka ya mutolo.
6 Yehova kanambe ngwenyi:“Ha tangwa lize, mungukakunga waze te akuchingwinya,Ni kukungulula waze amwanganyine,Hamwe ni waze namwesene lamba.
7 Waze te akuchingwinya mungukaapwisa masalila,Waze atwalile kusuku mungukaapwisa vungu lia ndundo,Yehova makaayula ku mulundu wa Zaione,Chize haliapwila ndo ku miaka ya mutolo.
8 Alioze yena kaposhi wa mapanga,Mulundu wa mwana wa pwo wa Zaione,Chiyulo chitangu muchikahiluka, ewa muchikahiluka kuli yena,Wanangana wa mwana wa pwo wa Yerusaleme.
9 Mumu liaka unatete?
Shina kushi ni mwanangana?Shina yoze wakukwaha yiyulo hafwa,Kashika unevu yikola yipwahaha ngwe pwo yoze unashita?*
10 Yena mwana wa pwo wa Zaione,Lifwite ni kwiva yikola ngwe pwo yoze unashita,Mumu haliapwila mukatuka mu mbonge, muya ni kutwama mu yambu.
Muya ndo ku Babilonia,Kwenako makakutuswila,Kwenako Yehova makakulamwina ku moko ja akwa-kole je.
11 Haliapwila, makakunga mavungu anji hanga alimike ni yena,Ayo makamba ngwo: ‘Zaione ayipihise,Chino chilingiwe kumeso jetu.’
12 Alioze ayo kanyingikine manyonga ja Yehova,Chipwe upale wenyi,Mumu iye makaakunga ngwe yichita ya tiliku mu chizungwilo.
13 Yena mwana wa pwo wa Zaione, katuka uzungule,Mumu mungwalumuna mbinga je, mujipwa mbinga ja utale,Mungwalumuna sende je, mujipwa sende ja unengu,Yena mukafwenyonya mavungu anji.
Upite uze ayo eyile, yena mukauhana kuli Yehova,Ni yikumba yo mukayihana kuli Mwene wamwenemwene wa hashi heswe.”
