1, 2. Pwata iótek a kon aúchea? Pwata a lamot sipwe silei met ewe Paipel a apasa usun iótek?

A FÓKKUN kúkkún fénúfan ika sia aléllé ngeni unuselapen láng. Me ren Jiowa, “ewe mi föri läng me fanüfan,” ekkewe mwúún fénúfan ra usun chék echchi konik lón eú pwekit. (Kölfel 115:15; Aisea 40:15) Iwe nge, iei alon Paipel pwe Jiowa “a arap ngeni ir meinisin mi köri, a arap ngeniir meinisin mi köri fän wenechar. A föri mochenin ir meinisin mi niuokusiti i, a rong ar siö.” (Kölfel 145:18, 19) Ekieki mwo weween ena pwóróus! Ewe Chón Fératá mi unusen manaman a arap ngenikich, iwe epwe aúselingakich ika sia “köri fän wenechar.” A ifa me watteen feiéchúch pwe sia tongeni ikkiótek ngeni Kot!

² Iwe nge, ika sia mochen Jiowa epwe aúselingakich, ach kewe iótek repwe tipeeú ngeni letipan. Nge epwe ifa usun sipwe tongeni féri ena ika sise weweiti met Paipel a apasa usun iótek? A fókkun lamot ach sipwe silei met ewe Paipel  a apasa usun iótek pún a álisikich le arap ngeni Jiowa.

3. Ifa eú popun a lamot sipwe iótek ngeni Jiowa?

³ Iei eú popun sipwe iótek ngeni Jiowa pún ina met a pese ngenikich sipwe féri. An we Kapas a éúréúrakich: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.” (Filipi 4:6, 7) Sipwe aúcheani liffangach na mi pop seni kirekiréchún ewe Sounemenem mi Unusen Tekia lón unuselapen láng me fénúfan!

4. Ifa usun ach ikkiótek ngeni Jiowa a apéchékkúla ach riri ngeni?

⁴ Pwal eú popun sipwe ikkiótek ngeni Jiowa pún ina met epwe apéchékkúla ach riri ngeni. Chiechi mi enlet ese chék wewe ngeni fósfengen atun a wor osupwang. Nge ra chúngúfengeniir iteitan me ar chiechi a péchékkúleló atun ra pwárfengeni ar kewe ekiek, aúrek me memmeef. A pwal ina usun ach riri ngeni Jiowa Kot. Lón ei puk, ka fen káé met Paipel a apasa usun Jiowa, napanapan kewe me minne a tipeni. Iei ka silei pwe Jiowa, i wesewesen Emén ka tongeni chiechi ngeni. Ka tongeni pwár ngeni Jiowa, Semom lón láng óm kewe ekiek me memmeef seni leutum. Iwe, ina atun a tongeni lapóló óm arap ngeni Jiowa.​—James 4:8.

5. Met a pwáraatá pwe Jiowa ese aúselinga iótek meinisin?

⁵ Jiowa a itá aúseling ngeni iótek meinisin? Ekieki mwo met a ereni ekkewe chón Israel mi ú ngeni lón fansoun soufós Aisea we: “Nge lupwen oua fen kapaspat lon ämi iotek, üsap fokun aüseling, pun oua lepöücha ren ämi niela aramas.” (Aisea 1:15) A ffat pwe a wor ekkóch féffér ra tongeni efisi án Kot esap aúselinga ach kewe iótek. Ina minne, a wor ekkóch mettóch sipwe féri pwe Kot epwe aúselingakich.

6. Met sipwe ákkáeúin féri pwe Kot epwe aúselinga ach kewe iótek? Iwe, ifa usun sipwe féri ena?

⁶ Sipwe ákkáeúin anganga ach lúkú. (Álleani Markus 11:24.) Ewe aposel Paulus a makkeei: “Esap wor eman a tongeni apwapwai Kot are esap wor an lükü. Pun iö a feito ren Kot epwe fokun lükü pwe mi wor Kot, nge epwe ngeni chokewe mi kütta i liwiniir.” (Ipru 11:6) Ach eáni lúkú mi enlet ese  chék wewe ngeni ach silei pwe a wor emén Kot mi akkaúseling me péppélúweni iótek. Lúkú a leteló ren ach kewe féffér. Sipwe ánnetatá pwe a wor ach lúkú ren napanapen manawach iteiten rán.​—James 2:26.

7. (a) Pwata sipwe iótek ngeni Jiowa fán súfél? (b) Ifa usun sipwe pwári tipetekison me letipwenechar atun sia iótek ngeni Kot?

⁷ Jiowa a pwal mochen pwe chókkewe mi arap ngeni repwe iótek fán tipetekison me letipwenechar. Esap pwe a wor chómmóng popun sipwe tipetekison atun sia fós ngeni Jiowa? Aramas ra kan fóffós fán súfél atun ra tufichin chuuri emén king are preseten pún ra mirititi pwe a tekia wisan. Nge epwele fen ifa me watteen ach súfél atun sia fós ngeni Jiowa! (Kölfel 138:6) Popun, pún i ewe “Kot mi Unusen Manaman.” (Keneses 17:1) Atun sia iótek ngeni Kot, napanapen ach fós ngeni epwe pwári ach mirititi fiti tipetekison pwe i a fókkun lapalap senikich. Ena esin tipetekison epwe pwal amwékútúkich le iótek seni wesewesen letipach me esap eú chék eéreni are sisap epini me epini.​—Mateus 6:7, 8.

8. Ifa usun sipwe anganga minne sia ióteki?

⁸ Pwal eú mettóch mi lamot ren án Kot epwe aúselingakich, féfférúch kewe repwe tipeeú ngeni ach iótek. Jiowa a mochen pwe sipwe achocho le anganga minne sia ióteki. Áwewe chék, ika sia iótek: “Kopwe ngenikem anem mongö ikenai,” iwe sipwe achocho le angang weires lón met sókkun angang sia tufich ngeni. (Mateus 6:11; 2 Tesalonika 3:10) Pwal eú, ika sia tingor álillis pwe sipwe okkufu ach apwangapwang, iwe a lamot sipwe túmúnú pwe  site pwisin atolongakich lón sóssót. (Kolose 3:5) Me lúkún ekkeei mettóch sipwe féri, a wor pwal ekkóch kapas eis usun iótek a lamot sipwe silei pélúwan.

9. Sipwe chék iótek ngeni ié, me ren iten ié?

⁹ Sipwe iótek ngeni ié? Jesus a ereni néún kewe chón káé pwe repwe iótek: “Semem lon läng.” (Mateus 6:9) Ina minne, sipwe chék iótek ngeni Jiowa Kot. Iwe nge, letipen Jiowa pwe sipwe etiwa wisen Néún we áláemén, Jesus Kraist. Sia fen káé lón Sópwun 5 pwe Jesus a titiitiw fénúfan pwe epwe angasakich seni tipis me máló ren an méén kepich. (Johannes 3:16; Rom 5:12) A fen seikitá pwe epwe Souasor mi Lap me Soukapwúng. (Johannes 5:22; Ipru 6:20) Ina minne, ewe Paipel a apasa pwe sipwe iótek me ren iten Jesus. Iei alon Jesus: “Ngang ewe al me ewe let me ewe manau. Esap wor eman epwe tongeni feila ren Semei me lüki.” (Johannes 14:6) Sipwe iótek ngeni Jiowa chék nge me ren iten Néún we, iwe epwe aúselingakich.

10. Pwata Jiowa ese apasa ika ifa ewe pwomwen inis sipwe eáni atun iótek?

¹⁰ Itá sipwe eáni och pwomwen inis atun sia iótek? Aapw. Jiowa ese apasa ika ifa ewe pwomwen inis are paw sipwe eáni atun sia iótek. Ewe Paipel a áiti ngenikich pwe sia tongeni iótek lón sókkopaten pwomwen inis kapachelong móót, rootiw, fótopwúkú are útá. (1 Kronika 17:16; Nehemia 8:6; Taniel 6:10; Markus 11:25) Iwe nge met epwe  fen lamot, epwe pwúng masouen letipach nge esap pwomwen inisich ewe mi pwá ngeni mesen aramas. Ren enletin ese lifilifil ia sia nóm ie, sia tongeni iótekilong lón letipach atun och osukosuk a weiweitá are atun sia féfféri ach angang iteiten rán. Inaamwo ika aramas rese silei pwe sia iótek nge Jiowa a rong.​—Nehemia 2:1-6.

11. Ikkefa ekkóch mettóch lón manawach mi fich ach sipwe ióteki?

¹¹ Met sia tongeni ióteki? Iei alon Paipel: “Are sia tüngor och mine a fich ngeni letipan, a aüselingakich.” (1 Johannes 5:14) Iwe, sia tongeni ióteki mettóch meinisin mi tipeeú ngeni letipen Kot. Itá letipan pwe sipwe iótek usun pwisin ach kewe aúrek? Ewer! Ach iótek ngeni Jiowa a usun ach fós ngeni emén chiechiach. Sia tongeni pwár ngeni ‘masouen letipach.’ (Kölfel 62:8, TF) A múrinné ach sipwe tingor án Kot we manaman mi fel pwe epwe álisikich le féri minne mi pwúng. (Lukas 11:13) Sia pwal tongeni tingor emmwen pwe sipwe filiéch me péchékkúl le likiitú fán weires. (James 1:5) Atun sia tipis, sipwe tingor omusomus ren manamanen án Jesus we asor. (Efisos 1:3, 7) Pwúngún, sisap chék ióteki pwisin kich. Nge sipwe pwal apachaalong aramas, áwewe chék chón ach famili me chienach kewe Chón Kraist.​—Föför 12:5; Kolose 4:12.

12. Ifa usun sipwe akkomwa Semach we lón láng lón ach kewe iótek?

¹² Sipwe akkomwa met a aúchea ngeni Jiowa Kot lón ach kewe iótek. A wor chómmóng popun sipwe enletin mwareiti me kilisou ngeni ren múrinnéén. (1 Kronika 29:10-13) Án Jesus iótek lón Mateus 6: 9-13 a áiti ngenikich ach sipwe ióteki pwe iten Kot epwe piniló. (Álleani.) Mwúún epwe waroto me letipan epwe pwénútá wóón fénúfan usun chék lón láng. Jesus a akkomwa met a lamot ngeni Jiowa, iwe mwirin, epwap ióteki minne a lamot ngeni aramas. Iwe, atun sia pwal akkomwa Kot lón ach kewe iótek, sia pwári pwe sise chék ekieki pwisin kich.

13. Met ewe Paipel a affata usun ttamen ach kewe iótek?

¹³ Epwe ifa ttamen ach kewe iótek? Ewe Paipel ese aúkú ttamen pwisin ach iótek are ach iótek fán iten aramas. Áwewe chék, ach ióteki anach a tongeni mwoch nge ach kewe iótekin sié ngeni Jiowa ra tongeni ttam. (1 Samuel 1:12, 15) Iwe nge, Jesus a apwúngú án aramas elingepin lón ar iótekittam. (Lukas 20:46, 47) Jiowa ese mwaar ren ena sókkun iótek. Nge iei ewe mettóch a lamot, ach sipwe iótek seni letipach. Iwe, ttamen iótek mi pwúng epwe fichiiti eú me eú fansoun.

14. Met weween án Paipel pesekich pwe sipwe “iotek fansoun meinisin”? Pwata a oururu letipach?

¹⁴ Fán fite sipwe iótek? Ewe Paipel a pesekich pwe sipwe “iotek fansoun meinisin.” (Lukas 18:1; Rom 12:12; 1 Tesalonika 5:17) Sap weween pwe sipwe iótek ngeni Jiowa unusen rán. Nge Paipel a pesekich pwe sipwe iótek iteitan ren ach akkapasa ach kilisou ngeni Jiowa ren múrinnéén ngenikich, tittingor an emmwen, ourur me péchékkúl. Esap pwe a oururukich le silei pwe Jiowa ese aúkú ttamen ach iótek are fán fite sipwe fós ngeni? Ika sia enletin kilisou ren ei liffang mi aúchea, iwe sipwe iótek fán chómmóng ngeni Semach we lón láng.

15. Pwata sipwe apasa “Amen” lesópwólóón pwisin ach iótek are atun emén a tupunikich lón iótek?

 ¹⁵ Met popun sipwe apasa “Amen” lesópwólóón ach iótek? “Amen” a wewe ngeni “fókkun ina,” are “amwo epwe ina usun.” Ekkóch pwóróus lón Paipel ra affata pwúngún ach apasa “Amen” lemuchúlóón ach kewe iótek meinisin. (1 Kronika 16:36; Kölfel 41:13) Ach apasa “Amen” lesópwólóón pwisin ach iótek a affata pwe sia iótek seni wenecharen letipach. Iwe, ach apasa “Amen” lón letipach are ren awach lesópwólóón án emén tupunikich lón iótek a affata pwe sia tipeeú ngeni minne a apasa.​—1 Korint 14:16.

16. Met sia lúkúlúkú usun iótek?

¹⁶ Jiowa a wesewesen pélúweni iótek? Fókkun ewer! Sia lúkúlúk pwe ewe Chón Aúselinga iótek a pélúweni iótekin fite million aramas. (Kölfel 65:2) Jiowa a tongeni pélúweni ach kewe iótek lón sókkopaten napanap.

17. Pwata sia lúkú pwe Kot a néúnéú chónláng me néún kewe chón angang le pélúweni ach kewe iótek?

¹⁷ Jiowa a néúnéú néún kewe chónláng me néún kewe chón angang le pélúweni iótek. (Ipru 1:13, 14) Mei wor chómmóng pwóróusen aramas mi tingor án Kot álillis pwe repwe weweiti Paipel, mwirin chék néún Jiowa kewe chón afalafal ra chuuriir. Ekkena pwóróus ra affata pwe chónláng ra ekkemmweni ewe angangen afalafala ewe Mwú. (Pwärätä 14:6) Atun sia osupwang, Jiowa a tongeni pélúweni ach kewe iótek ren an amwékútú emén  Chón Kraist an epwe álisikich.​—Än Salomon Fos 12:25; James 2:16.

18. Ifa usun Jiowa a áeá an we manaman mi fel me ewe Paipel le pélúweni iótekin néún kewe chón angang?

¹⁸ Jiowa Kot a pwal áeá an we manaman mi fel me ewe Paipel le pélúweni iótekin néún kewe chón angang. A tongeni pélúweni ach kewe tingoren álillis fansoun sóssót ren an awora emmwen me péchékkúl ren an we manaman mi fel.  (2 Korint 4:7) Fán chómmóng, sipwe kúna pélúwen ach kewe tingoren emmwen me lón ewe Paipel, ina ewe mettóch Jiowa a néúnéú le álisikich pwe sipwe kefiliéch. Sia tongeni kúnékún wokisin mi álisikich atun sia pwisin káé Paipel me álleani néúch kewe puk, pachelong ei puk. Sia pwal tongeni rong pwóróus mi weneitikich seni Paipel lón ach kewe mwich are ren alon emén mwán mi ásimaw mi chúngúkich lón ach we mwichefel.​—Kalatia 6:1.

19. Met sipwe chechchemeni ika sia meefi pwe ese pélú ach kewe iótek?

¹⁹ Nge ika usun itá a mmang án Jiowa pélúweni ach kewe iótek, sap weween pwe ese tufichin pélúweniir. Nge sipwe chechchemeni pwe Jiowa a pélúweni iótek me ren letipan me pwal lón pwisin an fansoun. A silei ach kewe osupwang me ifa usun epwe ataweer lap senikich. Fán chómmóng, a mut ngenikich ach sipwe tittingor, kúkkútta me fiffichifich. (Lukas 11:5-10) Ach tittingor a affata ngeni Kot pwe sia wesewesen mochen met sia eáni tingor me sia enletin lúkú pwe epwe pélúweni ach iótek. Jiowa  a pwal tongeni pélúweni ach iótek lón eú napanap sise tepereni. Áwewe chék, ika sia iótek usun och sóssót, eli Jiowa esap amóeló ewe osukosuk nge epwe apéchékkúlakich pwe sipwe likiitú fan.​—Álleani Aisea 12:2.

20. Pwata sipwe alamota iótek, ewe liffang mi aúchea?

²⁰ A ifa me kilisouch pwe ewe Chón Fératá unuselapen láng me fénúfan a arap ngeni meinisin mi kékkéri lón ewe sókkun iótek mi pwúng me ren! (Álleani Kölfel 145:18.) Sipwe ikkiótek iteitan pún ina eú liffang mi fókkun aúchea. Ika sia ina usun, epwe suuk ngenikich ewe ápilúkúlúkéch pwe sipwe akkarap ngeni Jiowa, ewe Chón Aúselinga iótek.