Usa sa mga kinutaang siyudad nga may toril nga mga bato nga gitukod o kaha gitukod pag-usab sa mga Gadhanon una pa sila motabok sa Jordan aron motabang sa pagsakop sa Canaan. (Num 32:34-36) Sa ulahing yugto ang kasundalohan ni Maghuhukom Gideon miagi sa Jogbeha una pa sa ilang kalit nga pag-atake sa Midianhong kampo didto sa Karkor. (Huk 8:​10, 11) Ang Jogbeha gituohan nga mao ang el-Jubeihat, nga nahimutang mga 1,050 m (3,440 p) ibabaw sa lebel sa dagat ug mga 10 km (6 mi) sa AK sa modernong ʽAmman (Raba).