Maghuhukom 10:1-18
10 Karon sunod kang Abimelek dihay mitindog aron sa pagluwas+ sa Israel, si Tola nga anak nga lalaki ni Pua, anak nga lalaki ni Dodo, usa ka tawo sa Isacar, ug nagpuyo siya sa Samir sa bukirong rehiyon sa Epraim.+
2 Ug siya nagpadayon sa paghukom sa Israel sulod sa kawhaag-tulo ka tuig, nga human niana siya namatay ug gilubong sa Samir.
3 Unya sunod kaniya mitindog si Jair nga Gileadnon,+ ug siya nagpadayon sa paghukom sa Israel sulod sa kawhaag-duha ka tuig.
4 Ug siya adunay katloan ka anak nga lalaki nga nagsakay sa katloan ka hingkod nga asno,+ ug sila may katloan ka siyudad. Gitawag nila kini nga Havot-jair+ hangtod niining adlawa; anaa kini sa yuta sa Gilead.
5 Human niadto si Jair namatay ug gilubong sa Kamon.
6 Ug ang mga anak sa Israel mibuhat na usab ug daotan sa mga mata ni Jehova,+ ug mialagad sila sa mga Baal+ ug sa mga larawan ni Astoret+ ug sa mga diyos sa Sirya+ ug sa mga diyos sa Sidon+ ug sa mga diyos sa Moab+ ug sa mga diyos sa mga anak sa Ammon+ ug sa mga diyos sa mga Filistehanon.+ Ug sila mibiya kang Jehova ug wala mag-alagad kaniya.+
7 Niini ang kasuko ni Jehova misilaob batok sa Israel,+ mao nga iyang gibaligya+ sila ngadto sa kamot sa mga Filistehanon+ ug sa kamot sa mga anak sa Ammon.+
8 Busa ilang gidaot ug gilupigan pag-ayo ang mga anak sa Israel niadtong tuiga—sulod sa napulog-walo ka tuig ang tanang anak sa Israel sa kiliran sa Jordan sa yuta sa mga Amorihanon nga didto sa Gilead.
9 Ug ang mga anak sa Ammon mitabok sa Jordan aron sa pagpakig-away bisan batok sa Juda ug sa Benjamin ug sa banay ni Epraim; ug ang Israel naguol sa hilabihan.+
10 Ug ang mga anak sa Israel mituaw kang Jehova alang sa tabang,+ nga nag-ingon: “Nakasala kami+ batok kanimo, tungod kay kami mibiya sa among Diyos ug kami nag-alagad sa mga Baal.”+
11 Unya si Jehova miingon sa mga anak sa Israel: “Dili ba gikan sa Ehipto+ ug gikan sa mga Amorihanon+ ug gikan sa mga anak sa Ammon+ ug gikan sa mga Filistehanon+
12 ug sa mga taga-Sidon+ ug sa Amalek+ ug sa Midian,+ sa dihang kamo ilang gilupigan+ ug kamo mituaw kanako, nga ako nagluwas kaninyo gikan sa ilang kamot?
13 Kon bahin kaninyo, kamo mibiya kanako+ ug nag-alagad sa laing mga diyos.+ Mao nga ako dili magluwas kaninyo pag-usab.+
14 Lakaw ug sangpita ang mga diyos+ nga inyong gipili.+ Sila ang paluwasa kaninyo sa panahon sa inyong kasakit.”
15 Apan ang mga anak sa Israel miingon kang Jehova: “Nakasala kami.+ Buhata kanamo ang sumala sa bisan unsa nga maayo sa imong mga mata.+ Palihog luwasa lamang kami niining adlawa.”+
16 Ug ilang gikuha ang langyaw nga mga diyos gikan sa ilang taliwala+ ug nag-alagad kang Jehova,+ mao nga ang iyang kalag+ naghigwaos tungod sa kalisdanan sa Israel.+
17 Unya nagtigom ang mga anak sa Ammon+ ug sila nagkampo sa Gilead.+ Busa ang mga anak sa Israel nagtigom ug nagkampo sa Mizpa.+
18 Ug ang katawhan ug ang mga prinsipe sa Gilead miingon sa usag usa: “Kinsay mangulo sa pagpakig-away batok sa mga anak sa Ammon?+ Siya ang mahimong pangulo sa tanang molupyo sa Gilead.”+
