Jonas 3:1-10
3 Unya ang pulong ni Jehova midangat kang Jonas sa ikaduhang higayon, nga nag-ingon:+
2 “Tindog, adto sa Nineve nga dakong siyudad, ug imantala kaniya ang mensahe+ nga akong gisulti kanimo.”
3 Busa si Jonas mitindog ug miadto sa Nineve sumala sa pulong ni Jehova.+ Karon ang Nineve maoy usa ka siyudad nga dako sa Diyos,+ nga may gilay-ong tulo ka adlaw nga pagbaktas.
4 Sa kataposan, si Jonas misulod sa siyudad nga may gilay-ong usa ka adlaw nga pagbaktas, ug siya nagmantala ug nag-ingon: “Kap-atan ka adlaw na lamang, ug ang Nineve pagalaglagon.”+
5 Ug ang mga tawo sa Nineve nagbutang ug pagtuo sa Diyos,+ ug sila nagmantala ug usa ka pagpuasa ug nagsul-ob ug sakong panapton,+ gikan sa labing dako kanila hangtod sa labing gamay.
6 Sa diha nga ang balita midangat sa hari sa Nineve,+ siya mitindog gikan sa iyang trono ug mihukas sa iyang opisyal nga besti ug misul-ob ug sakong panapton ug milingkod sa abo.+
7 Dugang pa, iyang gihimo ang pahibalo, ug iyang gipasulti sa Nineve, pinaagi sa mando sa hari ug sa mga kadagkoan, nga nag-ingon:
“Walay tawo ug walay binuhing hayop, walay baka ug walay karnero, nga motilaw sa bisan unsa gayod. Walay usa nga mokaon. Bisan tubig dili sila moinom.+
8 Ug pasul-oba sila ug sakong panapton, tawo ug binuhing hayop; ug pasangpita sila sa Diyos sa makusog ug pabiyaa+ ang tagsatagsa gikan sa iyang daotang dalan ug gikan sa kadaotan nga anaa sa ilang mga kamot.
9 Kinsay nasayod kon ang matuod nga Diyos motalikod ug magbasol+ ug mobiya sa iyang nagsilaob nga kasuko, aron kita dili mangamatay?”+
10 Ug nakita sa matuod nga Diyos ang ilang mga buhat,+ nga sila mitalikod sa ilang daotang dalan;+ ug mao nga ang matuod nga Diyos nagbasol+ sa katalagman nga iyang giingon nga ipahinabo kanila; ug kini wala niya ipahinabo.+
