Amos 3:1-15
3 “Patalinghogi kining pulong nga gisulti ni Jehova mahitungod kaninyo,+ Oh mga anak sa Israel, mahitungod sa tibuok banay nga akong gipagawas gikan sa yuta sa Ehipto,+ nga nag-ingon,
2 ‘Kamo lamang ang akong nailhan+ sa tanang banay sa yuta.+ Mao nga ako makighusay kaninyo tungod sa tanan ninyong kasaypanan.+
3 “‘Magkuyog ba sa paglakaw ang duha gawas kon sila nagtagbo sumala sa gikasabotan?+
4 Mongulob ba ang leyon diha sa lasang kon kini walay tukbonon?+ Mopatugbaw ba sa tingog ang may-lambungay nga nating leyon gikan sa tagoanan niini kon kini walay nadakpan?
5 Mabitik ba ang langgam diha sa yuta kon walay lit-ag alang niana?+ Molibkas ba ang bitik gikan sa yuta kon kini walay bisan unsang nalit-agan?
6 Kon ang usa ka budyong huypon diha sa usa ka siyudad, dili ba usab mangurog ang katawhan?+ Kon ang usa ka katalagman mahitabo sa siyudad, dili ba usab si Jehova ang nagpahinabo?
7 Kay ang Soberanong Ginoong Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.+
8 Adunay leyon nga mingulob!+ Kinsay dili mahadlok? Ang Soberanong Ginoong Jehova misulti! Kinsay dili managna?’+
9 “‘Imantala ninyo kini sa mga puloy-anang torre sa Asdod ug sa mga puloy-anang torre sa yuta sa Ehipto,+ ug magaingon: “Pagtigom kamo batok sa kabukiran sa Samaria,+ ug tan-awa ang daghang kasamok sa iyang taliwala ug ang mga pagpanikas sa sulod niya.+
10 Ug sila dili mahibalo nga mobuhat sa matul-id,”+ mao ang giingon ni Jehova, “sila nga nagtigom ug kapintasan+ ug pagpangagaw sulod sa ilang mga puloy-anang torre.”’
11 “Busa mao kini ang giingon sa Soberanong Ginoong Jehova, ‘Adunay kaaway nga naglibot mismo sa yuta,+ ug siya tinong magapukan sa imong kusog gikan kanimo, ug pagatulisan ang imong mga puloy-anang torre.’+
12 “Mao kini ang giingon ni Jehova, ‘Ingon nga ang magbalantay sa kahayopan magsakmit gikan sa baba sa leyon sa duha ka tiil o usa ka buok dalunggan,+ sa ingon niini ang mga anak sa Israel pagasakmiton, kadtong naglingkod sa Samaria sa halangdong lingkoranan+ ug sa higdaanan nga gikan sa Damasco.’+
13 “‘Patalinghog kamo ug panaksi+ diha sa balay ni Jacob,’ mao ang giingon sa Soberanong Ginoong Jehova, ang Diyos sa mga panon.
14 ‘Kay, sa adlaw sa akong pagpakighusay+ tungod sa mga pag-alsa sa Israel batok kaniya, ako usab makighusay batok sa mga halaran sa Bethel;+ ug ang mga sungay sa halaran pagaputlon gayod ug mangahulog sa yuta.+
15 Ug lumpagon ko ang balay sa tingtugnaw+ gawas pa sa balay sa ting-init.’+
“‘Ug ang mga balay nga garing mangalaglag,+ ug daghang balay ang mangahanaw,’+ mao ang giingon ni Jehova.”
