1, 2. Songon dia do Jahowa patuduhon na pardenggan basa do Ibana?

PARDENGGAN basa do Debata Jahowa. Nasa na adong sian Ibana do sasudena. Ibana do nampunasa sude na adong di portibi on. Jala dilehon do sudena i tu hita asa boi hita mangolu. (Ps. 104:13-15; Hag. 2:8) Sian Bibel taboto, sipata dipangke Jahowa do sude na di portibi on laho mangurupi naposoNa marhite huasoNa.

² Umpamana, saleleng 40 taon dilehon Jahowa do manna dohot aek tu halak Israel tingki di halongonan. (2 Mus. 16:35) Alani i, rade do sude haporluon ni nasida. (Neh. 9:20, 21) Di tingki na asing, marhite panurirang Elisa, dibahen Jahowa do asa lam godang miak ni sahalak borua na mabalu. I ma na mangurupi ibana asa boi tongtong mangolu dohot ianakhonna, jala manggarar sude utangna. (2 Raj. 4:1-7) Asing ni i, marhite huaso sian Jahowa, boi ma diparade Jesus sipanganon dohot  hepeng tingki dihaporluhon.​—Mat. 15:35-38; 17:27.

3. Aha do na laho taulas di parsiajaran on?

³ Boi do dipangke Jahowa manang aha pe laho mangurupi angka tompaanNa. Nang pe songon i, dijujui Ibana do angka naposoNa mangalehon nasa tolap ni nasida laho mangurupi organisasiNa. (2 Mus. 36:3-7; jaha Poda 3:9.) Boasa dijujui Jahowa hita asa mulak mangalehon tu Ibana? Songon dia do angka naposo ni Debata na disurat di Bibel mangurupi ulaonNa? Songon dia organisasiNa saonari on mamangke hepeng sian sumbangan? Di parsiajaran on, taulas ma sungkunsungkun on.

4. Na patuduhon aha do molo olo hita mangalehon tu Jahowa?

⁴ Alani holongta jala mangargai Jahowa, gabe las ma rohanta mangalehon tu Ibana. Molo tarimangi sude naung dilehon Jahowa tu hita, gabe taronjar do rohanta laho mangargai Ibana. I do na dihilala Raja Daud. Sada tingki dipatorang ibana angka aha na dihaporluhon laho pajongjongkon bagas joro. Ibana mandok, sude na adong di hita, na sian Jahowa do i. Alani i, sude na talehon tu Jahowa, sian Ibana do i sasintongna.​—Jaha 1 Kronika 29:11-14.

5. Songon dia Bibel mangajari hita na ringkot do mangalehon di ulaon panombaon?

⁵ Di sada parnidaan ni apostel Johannes, dibege ibana angka naposo ni Debata na di surgo mandok, ”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” (Pgk. 4:11) Tontu, tama do Jahowa mandapot hamuliaon dohot hasangapon. Alani i, lomo do rohanta mangalehon na dumenggan tu Ibana. On ma sada caranta laho manomba Ibana. Dos songon halak Israel, dipangido Jahowa do tu halak Israel asa mangulahon ulaon na ringkot tolu hali di bagasan sataon. Ingkon diboan nasida do silehonlehon tu Jahowa tingki mangulahon i. (5 Mus. 16:16) Tangkas ma sian tudosan on, mansai ringkot do mangalehon tu Jahowa sian ias ni rohanta di panombaonta saonari. Molo taulahon on, na patuduhon pangargaionta jala pangurupionta do tu ulaon ni organisasi ni Jahowa.

6. Boasa denggan molo sian ias ni roha hita mangalehon? (Ida gombar di mula ni parsiajaran.)

⁶ Ingkon las do rohanta mangalehon, ndang holan manjalo. Jala i do na dumenggan. (Jaha Ulaon ni Apostel 20:35) Rimangi ma molo adong sada dakdanak dilehon natuatuana hepeng laho jajan. Dung i, dipangke ibana ma deba hepeng na i laho manuhor hadiah tu natuatuana. Boi ma tabayangkon songon dia pangkilalaan ni natuatuana. Manang, tarimangi ma muse molo adong sahalak perintis na poso na  rap tading dohot natuatuana. Diurupi ibana ma natuatuana laho manuhor sipanganon manang manggarar sewa ni jabu. Sasintongna ndang na dipangido natuatuana asa dibahen ibana songon i. Alai las do roha ni nasida manjalo pangurupionna. Boasa? Alana, diargai natuatuana do sude na dibahen ibana tu nasida. Suang songon i ma hita. Diboto Jahowa do, denggan do molo sian ias ni rohanta mangalehon tu Ibana.

7, 8. Songon dia do naposo ni Debata najolo gabe sitiruon taringot mangalehon tu (a) angka ulaon ni Debata? (b) angka na marhobas tu Jahowa?

⁷ Sian Bibel boi do taparsiajari songon dia naposo ni Jahowa mangalehon sumbangan laho mangurupi ulaonNa. Umpamana, dijujui si Musa do halak Israel mangalehon sumbangan laho pajongjongkon tabernakel. Dos songon i ma na diulahon Raja Daud tingki laho pajongjongkon bagas joro. (2 Mus. 35:5; 1 Kron. 29:5-9) Di tingki pamarentaon ni Raja Joas, dipangke angka malim do hepeng sian sumbangan laho paturehon bagas joro. (2 Raj. 12:5, 6) Asing ni i, tingki masa haraparon di Judea di abad na parjolo, diurupi halak Kristen do angka dongan na tading disi.​—Ul. 11:27-30.

⁸ Asing ni i, dilehon naposo ni Debata do hepeng laho mangurupi angka na manguluhon di ulaonNa. Umpamana, songon na dipaboa di Patik ni si Musa, ndang adong bagian manang warisan ni halak Lepi. Alani i, halak Israel na asing mangalehon parpuluan tu halak Lepi. Gabe boi ma halak Lepi tongtong karejo di tabernakel. (4 Mus. 18:21) Suang songon i ma na diulahon angka borua na marlas ni roha mangalehon laho mangurupi Jesus dohot angka apostelna.​—Luk. 8:1-3.

9. Sian dia do haroroan ni angka sumbangan di tingki najolo?

⁹ Marragam do haroroan ni sumbangan. Songon tingki pajongjongkon tabernakel, dilehon halak Israel do angka arta ni nasida na diboan sian Misir. (2 Mus. 3:21, 22; 35:22-24) Asing ni i, pigapiga halak Kristen di abad na parjolo, manggadis angka hauma dohot jabu ni nasida. Jala hepeng na didapot dilehon tu angka apostel laho mangurupi angka dongan na mangkaporluhon. (Ul. 4:34, 35) Adong do muse halak Kristen na asing, na papulikhon hepengna laho mangalehon sumbangan tu ulaon na disuru ni Debata. (1 Kor. 16:2) Boi do na mora nang na pogos mangalehon sumbangan.​—Luk. 21:1-4.

10, 11. (a) Songon dia do hita maniru angka dongan na disurat di Bibel taringot mangalehon sumbangan? (b) Boha do pangkilalaanmuna tingki mangalehon sumbangan?

¹⁰ Saonari, dihaporluhon do angka sumbangan tu marragam ulaon. Ra,  hurianta laho paturehon Bale Harajaon manang pajongjongkon Bale na baru. Asing ni i, ra kantor cabangmuna porlu ingkon dipature. Jala boi do hita mangurupi angka biaya tu ulaon kebaktian. Sipata, huriamuna boi do mangalehon sumbangan laho pajongjongkon Bale Kebaktian dohot Bale Harajaon ni angka dongan di liat portibi on. Sumbanganta pe boi do mangurupi angka misionaris, perintis istimewa, sintua kaliling, dohot na di kantor pusat manang kantor cabang di liat portibi on. Manang, mangurupi angka donganta di inganan na hona mara.

¹¹ Di tingki parpudi on, sude do hita boi mangalehon sumbangan tu ulaon organisasi ni Jahowa. Angka na mangalehon sumbangan i, godang do na so dipaboa goarna. Ndang olo tapaboa tu na asing sadia godang hepeng na tapamasuk tu kotak sumbangan manang na talehon marhite jw.org. Alai olo do tahilala paotikhu na talehon. Sasintongna, umgodang do na mangalehon sumbangan na otik sian na mangalehon sumbangan na balga. Nang pe otik hepeng ni donganta, ditiru nasida do angka halak Kristen na di Makedonia. Mansai pogos do nasida, alai dipangido nasida do asa dohot nasida mangalehon sumbangan. Jala dilehon nasida do sumbangan i sian ias ni roha.​—2 Kor. 8:1-4.

12. Songon dia do organisasinta mangalului cara na dumenggan laho mamangke sumbangan?

¹² Marbisuk do Punguan Na Mangaradoti Organisasi laho mamangke angka sumbangan na talehon. (Mat. 24:45) Martangiang do nasida jala manat do tingki mambahen haputusan laho mamangke sumbangan i. (Luk. 14:28) Angka naposo ni Debata na disurat di Bibel pe mamangke sumbangan holan tu ulaon panombaon. Umpamana, tingki mulak si Esra tu Jerusalem, diboan ibana do angka sumbangan sian raja Persia. I ma angka mas, perak, dohot angka arta na asing. Godangna hirahira lobi sian 1,3 triliun rupiah. Tu Jahowa do sude sumbangan i. Alani i, dilehon ibana do tudutudu asa boi denggan diboan angka sumbangan i sahat tu Jerusalem. (Esr. 8:24-34) Asing ni i, dipapungu apostel Paulus do hepeng laho mangurupi angka dongan na di Judea. Dipastihon do ise na pasahathon hepeng i. Dipingkirhon nasida do ”na patut ingoton di jolo ni Tuhan i, nang di jolo ni jolma”. (Jaha 2 Korint 8:18-21.) Saonari, ditiru organisasinta do si Esra dohot si Paulus na marbisuk mamangke sumbangan.

13. Boasa marragam cara dibahen organisasi laho mangatur parhepengon?

¹³ Boi do dibahen sada keluarga cara na denggan laho mangatur parhepengon ni nasida. Asa boi nasida mangalehon gumodang tingki tu Jahowa, sipata ingkon diorui do angka situhoron na so porlu. I ma na diulahon organisasi ni Jahowa. Godang do ulaon ni organisasi ni Jahowa di tingki parpudi on. Alani i, dihaporluhon do godang biaya. Asa marbisuk mamangke sumbangan na dilehon, marragam do cara dibahen laho mangatur parhepengon.

14-16. (a) Tu angka ulaon aha do sumbanganmuna dipangke? (b) Songon dia angka ulaon i mangurupi hamu sandiri?

¹⁴ Angka dongan naung leleng gabe Sitindangi Ni Jahowa mandok, godang do silehonlehon na tadapot sian organisasi. Saonari, nunga adong be jw.org dohot JW Broadcasting. Nunga diterjemahon be Bibel di godangan bahasa. Jala di taon 2014/2015 dibahen do sada kebaktian Internasional, na marjudul ”Teruslah Cari Dahulu Kerajaan Allah!”. Saleleng tolu ari do dibahen acara on. Jala adong 14 kota di liat portibi on na mangihuthon acara i jala dibahen di stadion na bolak. Las do roha ni angka halak na ro di tingki i!

¹⁵ Godang do na mandok mauliate alani sude na dibahen organisasi. Adong donganta na mardongansaripe na tading di Asia. Didok nasida, ”Di daerah na pinjil do hami ditugashon. Sipata lungun do dihilala hami. Jala ndang huingot hami godang do ulaon ni organisasi di liat portibi on. Alai, tingki ditonton hami JW Broadcasting, huingot hami ma godang do angka dongan sahaporseaonnami di liat portibi on. Las do roha ni angka dongan na di inganannami ala nunga adong JW Broadcasting. Ganup bulan do ditonton nasida acara on. Jala dihilala nasida, gabe songon na jonok ma nasida tu Punguan Na Mangaradoti Organisasi. Las hian ma roha ni nasida alani gabe bagian ni organisasi ni Debata.”

¹⁶ Saonari on, hirahira 2.500 godang ni Bale Harajaon na dipature manang dipajongjong di liat portibi on. Hirim do roha ni angka dongan di sada huria di Honduras asa adong Bale Harajaon ni nasida. Saut do na dihirim ni nasida i. Jala didok nasida do muse, ”Las hian do rohanami ala boi gabe bagian ni  organisasi ni Jahowa na marsada di liat ni portibi on.” Godang do na mangkilala na sarupa tingki parjolo sahali mandapot Bibel dohot angka sijahaon di bahasa ni nasida sandiri. Songon i nang tingki nasida diurupi angka dongan tingki masa mara. Manang tingki adong barita na denggan sian ulaon marbarita di inganan na ribur dohot tingki marbarita mamangke rak beroda.

17. Sian dia do taboto na diurupi Jahowa do organisasiNa?

¹⁷ Godang do na so Sitindangi Ni Jahowa gabe longang, alana sude ulaon na tabahen holan sian sumbangan do i. Hea do ro sahalak direktur perusahaan mangida kantor percetakan organisasinta. Longang hian do rohana alani sude ulaonta holan sian sumbangan do. Jala ndang hea hita diida mangidoido hepeng sian na asing. Jala ibana mandok, ndang mungkin boi masa i. Tutu do na didokna i! Taboto do, holan alani na diurupi Jahowa do umbahen boi masa sude ulaon on.​—Job 42:2.

18. (a) Pasupasu aha do na boi tadapot alani mangurupi ulaon ni Jahowa? (b) Songon dia do hita mangajari ianakhonta dohot halak na baru asa mangulahon na sarupa?

¹⁸ Sada hasangapon do di hita laho mangurupi ulaon na mansai ringkot sian Jahowa. Dipasupasu Ibana do hita molo taulahon i. (Mal. 3:10) Marjanji do Ibana, molo sian ias ni roha do hita mangalehon, gabe tadapot ma na denggan. (Jaha Poda 11:24, 25.) Didok Ibana do muse, ”Martuaan do na mangalehon sian na manjalo.” (Ul. 20:35) Sian pangkataion dohot parniulaon, boi do taajari ianakhonta dohot angka halak na baru marsiajar, asa mangalehon sumbangan. Jala dapot nasida ma las ni roha dohot godang pasupasu ala mangulahon i.

19. Songon dia parsiajaran on boi patoguhon hamu?

¹⁹ Tangkas ma, sian Jahowa do sude na tadapot. Alani i, tingki talehon muse tu Ibana, na patuduhon holongta do hita tu Ibana jala na taargai do sude na diulahon Ibana tu hita. (1 Kron. 29:17) Tingki halak Israel mangalehon sumbangan laho pajongjongkon joro, ”marlas ni roha be situan na torop i ala ringgas nasida margugu, ai sian nasa rohana mangaringgas be margugu tu Jahowa”. (1 Kron. 29:9) Tongtong ma hita mandapot las ni roha ala mulak mangalehon tu Jahowa.