“Diosatï taqe amuyunakajsa ukat kuntï munkta ukanaksa ukat taqe kunsa sum yatjjchejja, ¿kunatsa mayisiñajajj wakisispa?” sasin inas maynejj jisktʼaschispa. Cheqas ukham jisktʼasiñajj walikïskiwa. Kunattejj Jesús pachpaw akham säna: “Awkimajj janïr arsupktas ukkhaw yatjje kuntï jumanakajj mayipkäta ukjja” sasa (Mateo 6:8). Nayra Israel marka apnaqeri rey Davitajj uka toqet amuytʼasajj akham sarakïnwa: “Tatay, janïraw lakajampis arskti ukkhaw jumajj taqpach yatjjtajja” sasa (Salmo 139:4). Ukhamasti, ¿oración mayisiñajj wakisiskaspati? Uka jisktʼar  qhanañchañatakejja, Bibliajj kamsisa uk yatjjatañäni. *

Cheqas Jehová * Diosajj taqe kunwa yatjje, ukampis sapa mayni servirinakapajj kunjamapunis jikjjatasipjje uk yatiñwa muni sasaw Bibliajj qhanañchi (Salmo 139:6; Romanos 11:33). Mä computadorajja, mä jaqejj khitisa, kawkitasa ukat kunanaksa luri ukanakakwa imjjasi; ukampis Jehová Diosajj sapa maynejj kunjamsa jikjjatastan ukwa yatiñ wal muni. Kunattejj sapa maynimpiw Jupajj sum apasiñ muni (Salmo 139:23, 24; Santiago 4:8). Ukatwa Jesusajj kuntï munapkta uk Diosajj yatkchisa orasipjjapunim sasin ewjjtʼistu (Mateo 6:6-8). Jiwasatï Diosamp parlasipuniñäni ukhajja, jukʼampwa Jupar munasiñäni.

Diosar mayisisktan ukhajja, inas awisajj jan kamsirjamäjjstanti. Ukhaman uñjasktan ukhajja, kuntï sañ munktan ukat kunjamas jikjjatastan ukanakjja Jehová Diosajj sum yatjje, ukat ukarjamaw yanaptʼistu (Romanos 8:26, 27; Efesios 3:20). Awisajja, Diosajj jan amuykayakwa mayisitanakas istʼistu, ukham yanaptʼatap amuyastan ukhajja, jukʼampiw Jupar jakʼachastanjja.

Jehová Diosajj taqe chuyma servirinakaparojj istʼiwa sasaw Bibliajj qhanañchi, ukat kunatsa yaqhep mayisitanak jan istʼki uksa qhanañcharakiwa. Amuytʼañäni, kunapachatï Israel markan jan walinakajj sinti utj-jjäna ukhajja, Diosajj akham yatiyañapatakiw Isaías profetar khitäna: “Oracionanaka walja lurasipkäta [ukhas], janiw nayajj istʼapkämati. Amparanakamajj wilararkamakiwa” sasa (Isaías 1:15). Ukhamasti khitinakatï Diosan leyinakap jan istʼapki, ukat jan wali amtanakampi mayisipki ukanakarojj Diosajj janiw istʼkiti (Proverbios 28:9; Santiago 4:3).

Biblianjja akham sarakiwa: “Kuntejj Diosarojj mayiñäni munañaparjama ukjja jupajj istʼistuwa” sasa (1 Juan 5:14). Ukhamasti, ¿Jehová Diosajj taqe servirinakapan mayisitanakaparojj ukaratpachat istʼpacha? Janiwa. Apóstol Pablot amuytʼañäni, jupajj “tʼaqhesiñajjay” apaqtʼita sasaw kims kuti mayisïna (2 Corintios 12:7, 8). Inas nayrapat usutächïna ukat jan qollañjamarakïchïna. Amuytʼañäni, Pablojj usutanakar qollañatak chʼamanïnwa, mä kutejja, jiwatarus jaktayänwa, ukampis janiw jupa pachpajj qollasirjamäkänti ukaw wal llakisiypachäna (Hechos 19:11, 12; 20:9, 10). Diosajj janis Pablon mayisitapar kunjamtï munkän ukhamarupun istʼkchïnjja, altʼat chuymampiw Diosan yanaptʼap katoqasïna (2 Corintios 12:9, 10).

Biblia qellqaskäna uka tiemponakanjja, Diosajj yaqhep servirinakaparojj kuntï mayipkäna ukarjamaw istʼirïna (2 Reyes 20:1-7). Ukampis janiw sapa kutejj ukhampunïkänti. Awisajja, Jehová Diosajj janis mayisitanakap istʼkaspa ukham amuyasisaw servirinakapajj llakisipjjerïna. Ukanakat maynïrejj David reyïnwa, jupajj akham sänwa: “Tatay, ¿kunapachkamarak nayat armasitätasti? ¿Wiñayapunit armasitäta?” sasa (Salmo 13:1). Jehová Diosajj walja kuti  yanaptʼatap amtasajja, Davitajj jukʼampiw Diosar confiyäna. Ukatwa akham sarakïna: “Khuyapayasiñamaruw taqe chuymamp iyawsta” sasa (Salmo 13:5). Jichhürunakanjja, ukhamarakiw Diosan servirinakapajj oracionanakap istʼayasiñkam kutin kutini inas mayisipjjañap wakischispa (Romanos 12:12).

Kunatï jiwasatak wakiskirïki ukwa churistu.

Mä awkejj wawanakapar walsa munaskchejja, janiw kunanaktï mayipki ukanak ukaratpach churkiti. Jehová Diosajj janirakiw munañasaruk taqe kun istʼkistuti, ni ukaratpachas churkarakistuti. Antisas munasir awkjamaw kuna ratutï yanaptʼap munktan ukhajj mayisitanakas istʼistu ukat kunatï jiwasatak askïki ukwa churarakistu (Lucas 11:11-13).

Jan amuykayakwa mayisitanakas istʼistaspa.

Llakinakas askichasjjañapataki mayisiskstan ukat uka llakinakasajj jan askichasjjchi ukhajja, ‘Diosajj janiw istʼkituti’ sañajj ¿walikïspati? Janiwa. Antisas kunjamsa Diosajj uka mayisitas istʼpachïstu uk amuyañatakiw chʼamachasiñasa. Inas munat mä amigosajj wakiskäna ukhapun yanaptʼawaychistu (Proverbios 17:17). ¿Jehová Diosat uka amigosampi yanaptʼaypachïstu? Awisajj Biblia toqew Diosajj mayisitanakas istʼarakistaspa. Inas amuyumpi mä jan waltʼäw askichañatak yanaptʼawaychistu (2 Timoteo 3:16, 17).

Taqe llakinakas askichañat sipansa, aguantañatakiw Jehová Diosajj chʼam churistu (2 Corintios 4:7). Mä kutejja, “aka tʼaqhesiñajat qhespiyita” sasaw Jesusajj Awkipar mayisïna, kunattejj janiw Awkipar jan walit uñtʼayañ munkänti. Uka mayisitapar istʼasaw Jehová Diosajj mä angelar chʼamañchtʼañapatak khitäna (Lucas 22:42, 43). Ukhamarakiw munat amigos toqejj suma arunakamp wakiski ukhapun Diosajj yanaptʼistaspa (Proverbios 12:25). Ukham yanaptʼanakajj jan amuykayakispawa, ukatwa Jehová Diosajj kunjamsa mayisitanakas istʼistu uk sum amuytʼasiñasa.

Horasaparuw kuntï mayktan uk churistani.

Taqe chʼamani Jehová Diosajj horasaparuw altʼat chuymaninakan mayisitanakap istʼi sasaw Bibliajj qhanañchi (1 Pedro 5:6). Diosajj janis mayisitanakas istʼkistaspa ukham amuyastan ukhajja, janis jiwasat llakiskaspa ukham janiw amuyañasäkiti. Niyakejjay Taqe Kunjjar Munañani Diosächejja, kunas jiwasatak askïspa ukjja Jupaw jukʼamp sum amuyaspa, ukat ukarjamaw istʼistaspa.

Mä jiskʼa wawanïkasmas ukham amuytʼañäni. Mä bicicleta mayiristam ukhajja, ¿ukaratpachati alarapisma? Inas apnaqerjamati janicha uk sum amuytʼasajj jan alarapkchismati. Jan ukasti kunapachas alarapiñajj wakisispa uk suytʼchisma. Ukhamarakiw mayisitanakasajj walikïskani ukat mayisiskakiñäni ukhajja, horasapar Diosajj istʼistani (Salmo 37:4).

Diosajj oración mayisitanakaj istʼitaniwa sasin confiyañasatakiw Bibliajj yanaptʼistu. Inas maynejj “confiyañajj chʼamawa” sischispa. Cheqas walja tiempo tʼaqhesisktan jan ukajj ina chʼusat tʼaqhesisktan ukhajja, Diosajj mayisitanakaj qhepat istʼaskitani sasin suyañajj chʼamakïspawa. Ukhamäkchisa, mayisiskakiñ toqet Jesusajj kamsänsa ukanak amtañaw yanaptʼistani.

 Jesusajj pisinkir mä viuda warmitwa amuytʼayäna, jupajj jan wali juezaruw kutin kutini yanaptʼa mayir sarirïna (Lucas 18:1-3). Qalltan janis juezajj istʼañ munkchïnjja, qhepat akham sänwa: “Aka ijma warmin nayar sinti jutatap laykojja, istʼäw quejapjja jan jukʼamp colerayir jutaskañapataki” sasa (Lucas 18:4, 5). Biblia qellqaskäna uka griego arurjamajja, “jan jukʼampi colerayir jutaskañapataki” siski ukajja, jan “nayrat chʼakhuyasiñataki”, mä arunjja, “jan walit jan uñjayasiñataki” sañwa munaspa. * Uka juezajj jaqenakamp jan walit jan uñtʼayasiñ laykukis viuda warmir yanaptʼkchïnjja, Jehová Diosajj khitinakatï “arumay uru arnaqasipki” jan ukajj mayisipki ukanakarojj jukʼampiw istʼani. Jesusajj akham sänwa: ‘Cheqapar uñjasiñapatakejj ratukiw Diosajj yanaptʼani’ sasa (Lucas 18:6-8, NM).

Inamayakis Diosat mayisisksna ukhamsa awisajj amuyaskstanjja, mayisiskakiñasawa. Ukhamtï lurañänejja, Diosampi istʼayasiñ munatasajj qhanäniwa. Ukat kunjamsa Diosajj oracionanakas istʼistu uksa amuyjjarakiñäniwa. Jehová Diosar jukʼamp jakʼachasiñatakis yanaptʼarakistaniwa. Ukhamajj kunjamtï Diosajj munki ukarjam taqe chuyma mayisiskakiñäni ukhajja, Jupajj istʼistaniwa (Lucas 11:9).