¿Chem raquiduamqueimi ñi rupayal cüpalechi antü mu? Fentren che, rupale rume huesaque dungu, maneluucülei ñi doi cümelcaletual ti dungu. ¿Rüf maneluhuafuimi tüfa mu? ¡Mai! Biblia eluqueiñmu rüfngechi maneluhun.

•  ¿Chem maneluhun hulquei ti Biblia?

•  ¿Rüf feyentupeafuiñ mai ñi feipin Biblia?

•  ¿Chumngechi femtripayai tüfachi maneluhun?

•  ¿Chumül rupayai tüfa?

•  ¿Chumngechi quelluafeiñmu fachantü quimal tüfachi dungu?

 ¿Chem maneluhun hulquei ti Biblia?

 Ti Biblia cafei pengeli ti huesaque dungu taiñ rupamequen fachantü. Huelu feipicünueiñmu taiñ cutrancauhuenoal cüpalechi antü mu. Peaiñ quiñeque dungu ñi feipicünuel Biblia.

•   Huesa dungu: Nienoal cheu ñi müleal

   Chem pilei Biblia: “Deumarucayaingün, ca fei mu müleaingün” (Isaías 65:21).

   Chumngechi cümelcayafeiñmu: Quisuque iñchiñ nieaiñ taiñ ruca.

•   Huesa dungu: Nienoal cüdau cam plata

   ¿Chem pilei Biblia?: “Tañi dullinche ayühuaingün ñi deumael quisu ñi cuhu mu” (Isaías 65:22).

   Chumngechi cümelcayafeiñmu: Com pu che nieaingün cümeque cüdau ca ayühun-ngechi cüdahuaingün.

•   Huesa dungu: Norngenochi dungu

   ¿Chem pilei Biblia?: ‘Nor dungu mu ngünenieai pu principe’ (Isaías 32:1).

   Chumngechi cümelcayafeiñmu: Inei no rume huesalcangelayai tañi tuhun mu cam tunten plata mu tañi nieel. Inei no rume pofrengelayai. Com pu che nor dungu femngeai.

•   Huesa dungu: Ngüñün ca entrin

   Chem pilei Biblia: “Fentren iyael müleai tüfachi mapu meu; huente huincul cütu huefpayai ti fün” (Salmos 72:16).

   Chumngechi cümelcayafeiñmu: Com che nieai fentren cüme iyael. Inei no rume ngüñühuelayai ca entrihuelayai.

•   Huesa dungu: Quehuan dungu ca huesalcan

   Chem pilei Biblia: “Anücünuhuaingün miñche quisuque ñi anüm ofad meu, ca miñche ñi higuera engün, ca inei no rume llicalcalayaeyu engün” (Miqueas 4:4).

   Chumngechi cümelcayafeiñmu: Mülehuelayai huesaque che feimu llicalehuelayaiñ, cüme duamcületuaiñ, ca “tati pu norngechi che llohuai ti mapu ñi ngen-ngeal engün” (Salmos 37:10, 29).

•   Huesa dungu: Hueichan

   Chem pilei Biblia: “Quiñe troquiñ mapu huitrañpüramlayai tañi fütra cuchillo cangelu troquiñ mapu engu, ca quimhuelayaingün hueichan” (Isaías 2:4).

   Chumngechi cümelcayafeiñmu: Tati pu che rüf tüngcüleai huall mapu mu (Salmos 72:7). Inei no rume hueñancülehuelayai lalu cai quiñe tañi pu che hueichan mu. Ca inei no rume quintuhuelayai cheu ñi ellcahuam hueichan mu.

•   Huesa dungu: Cutran dungu

   Chem pilei Biblia: “Inei no rume feipilayai: ‘Iñche cutrancülen’” (Isaías 33:24).

   Chumngechi cümelcayafeiñmu: Inei no rume cutrancülehuelayai (Isaías 35:5, 6). Cafei Biblia feipicünui ñi ngehuenoal lan (Apocalipsis 21:4).

•   Huesa dungu: Huesalcangei ta mapu

   Chem pilei Biblia: “Tati desierto ca tati anquen mapu rume ayühun nieai, ca tati laf mapu ayüucületuai ca rume rayületuai” (Isaías 35:1).

   Chumngechi cümelcayafeiñmu: Cüme elcünungetuai ti mapu taiñ cümelcaleal iñchiñ. Fei tañi ayüniefel Chau Dios ellaca mu (Génesis 2:15; Isaías 45:18).

 ¿Rüf feyentupeafuiñ mai ñi feipin Biblia?

 Fentren che feyentuquelai. Huelu falin-ngei tami ngüneduamal chem pi ti Biblia ñi rupayal cüpalechi antü mu. Pu che fill pimequei chem ñi rupayal, huelu Biblia ñi feipicünuel Chau Jehová mu cüpai feimu doi manelfali, ¿chumngelu? Peafiyiñ.

•   Chau Dios manelfali. Tati Biblia feipi Chau Dios “coilatuquelai” (Tito 1:2). Cafei Chau Dios müten quimniei chem ñi rupayal (Isaías 46:10). Biblia mu mülei fillque nütram pengelquelu com ñi feipicünuel Chau Dios femtripaquei. Tami doi quimal, peafimi chi video ¿Chumngechi quimafuiñ ñi rüfngen Biblia ñi feipilen?

•   Chau Dios niei chi nehuen taiñ quelluaeteu. Tati Biblia feipi Chau Dios niei com nehuen ñi femal chem ñi ayüqueel (Salmos 135:5, 6). Feimu chem no rume catrütulayafui Chau Dios ñi femal tañi ayüel. Doyelchi mai Chau Dios, fente taiñ piuqueyenieteu, ayüniei taiñ quelluaeteu (Juan 3:16).

 Huelu “Chau Dios ayüle taiñ quelluaeteu ca niele ti nehuen ñi femngechi femal ¿chumngelu petu rupaqueiñ cüdaungechi dungu?” piafuimi. Tami huiñoldungual feichi ramtun peafimi chi video ¿Chumngelu Ngünechen petu catrütulafi ñi mülehuenoal cutrancahun?

 ¿Chumngechi femtripayai tüfachi maneluhun?

 Chau Dios ñi gobierno ngünenietule hula tüfachi mapu femtripayai com tañi feipicünuel. Quisu elfalcünufi ta Jesús ñi lonco ülmencüleal tañi gobierno mu ca ñi cuidayafiel tati pu che ca tati mapu. Mülepalu mapu mu, Jesús tremoltufi pu cutrancülelu, elufi iyael ti pu fillalelu, tüngcünutui quiñe cürüftucu mahun ca huiñomongeltufi quiñeque che layelu (Marcos 4:39; 6:41-44; Lucas 4:40; Juan 11:43, 44). Femngechi pengeleiñmu ñi chumal ngünenietule hula Chau Dios ñi gobierno.

 Tami quimal chumngechi quelluafeimu Chau Dios ñi gobierno peafimi chi video ¿Chem am ta Chau Dios ñi Reino?

 ¿Chumül rupayai tüfa?

 ¡Müchai müten! Huelu, ¿rüfcünu llemai? Tati Biblia feipicünui quiñeque dungu ñi rupayafel. Femngechi quimafuiñ ñi fülcülepan Chau Dios ñi ngünenietual mapu (Lucas 21:10, 11). Fachantü adquintuquei ñi femtripaquen tüfachi dungu.

 Tami doi quimal papeltuafuimi ti troquiñ “Chau Dios, ¿chumül ngünenietuafi ta mapu?”

 ¿Chumngechi quelluafeiñmu fachantü quimal tüfachi dungu?

 Quiñe huentru huirintucufilu Biblia feipi taiñ maneluhun quiñe “nülcühue farcu reque felei” (Hebreos 6:19). Quiñe nülcühue quellufi ti farcu ñi cañpüle amunoal mülele cürüftucu mahun. Ca femngechi, rupalu inchiñ huesaque dungu mu, Biblia ñi feipin eluqueiñmu maneluhun. Feichi maneluhun quelluqueiñmu taiñ tüngcüleal, cüme raquiduam nieal ca taiñ tremoleal cütu (1 Tesalonicenses 5:8).