Tremün quiñe pichi huaria mu Warialda pingelu. Tüfachi pichi lof mu mülefui fentren culliñ ca tucungequei cachilla ca fentren tucucan. Fau rume lifcülequefui ca müte ngelai huesaque che.

Iñche hunen-ngen tañi mari peñi ca lamngen mu, feimu nielu mari cüla tripantu müten tripan tañi cüdahual taiñ nieal iyael. Iñche müte amunolu am colegio mu, feimu conün ñi cüdahual quiñe rancho mu. Nielu mari quechu tripantu ñomümquefun aucan cahuellu.

Ayüquefun ñi cüdahual ti rancho mu. Pun mu cütraltuquefun huecuntu, feimu anücünuuquefun. Püraquintuquefun ti cüyen ca ti huangülen, rume ayühuelquefeneu. Raquiduamquefun, ¿mülepelai quiñe tañi com deumafiel? Huelu tañi cüdaucülen rancho mu ca mülefui cuñihun-ngechi dungu. Tañi pu compañ rume pütremtuquefuingün ca huesa entuquefuingün ñi hun, feimu iñche ca femngechi femürpun.

Nierpulu mari pura tripantu, amutun Sydney huaria mu. Cüpa confun ejercito mu, huelu nienolu am estudio pepi conlan. Pen cüdau, quiñe tripantu mülenagün ti huaria mu. Feichi ngei ñi nütramcaeteu pu Dunguquelu Ineingen Jehová. Mangelngen quiñe antü amual Trahunhue Ruca mu. Fei amulu, pürüm inaduamün ñi rüf cristianongen engün.

Huelu rupachi antü, ayün ñi huiñotual campo mu. Mülenagün Goondiwindi pingechi lof. Pen cüdau, curengen, huelu ca eluhun ñi putufengeal.

Tañi domo engu epu yall nieyu. Deu nielu tayu epu pichiqueche, raquiduamün chumngechi yenierpun tañi mongen. Fei acordan chem ñi allcütuel pu Dunguquelu Ineingen Jehová ñi trahun mu. Eluhun tañi quintuafiel engün.

Fei pen ti chillca Ti Huerquen. Feiti mu huiriconcülerquei cheu ñi mülen pu Dunguquelu Ineingen Jehová ñi Betel ruca Australia mu. Fei huirintuculelfiñ quiñe carta tañi quelluaeteu engün. Feimu huercüngei quiñe Dunguquelu Ineingen Jehová tañi quelluaeteu. Rume piuqueyechefengei, fei quimeltueneu ti Biblia.

Amulelu ñi chillcatufiel Biblia, ngüneduamün ñi cüme elcünutual ñi mongen. Ñi chem feipin 2 Corintios 7:1, puhui tañi piuque mu. Feipilelu: “Liftuhuaiñ chem ñi huesalcaquefiel taiñ cuerpo”.

Eluhun ñi putuhuenoal ca pütremtuhuenoal. Cüdautun ñi elcünuafiel, fentren tripantu huimtulefulu am iñche ñi pütremtual ca putucahual. Huelu eluucülefun cüme yenieal ñi mongen ñi ayühuelafiel ta Chau Dios. Rume quellueneu inafiel ñi feipin Romanos 12:2, feipilelu: “Inayentuhuelayafimün fantepu meu mülechi pu che. Doi mai huecünutumün tamün raquiduam, fei cüme elcünutumün tamün mongen”. Ngüneduamün: ñi cüme elcünutual ñi mongen, mülefui ñi cüme elcünutuafiel ñi raquiduam ca peafiel chi huesaque dungu chumngechi pequefi Chau Ngünechen. Jehová ñi quellun mu hueutripan.

Huelu doi cüdautun ñi huesa entunoal ñi hun. Quimniefun ñi chem feipin Efesios 4:29: “Huesa entulayaimün tamün feipin”. Huelu alüñman ñi elcünutuafiel feichi huimtun. Raquiduamlu iñche ñi feipin Isaías 40:26, rume quellueneu. Feipilei: “Püraquintumün callfü huenu meu. ¿Inei am ta deumai com feichi dungu? Feichi entuquelu ñi raquingen mu tati pu huangülen, quiñe troquiñ hueichafe reque, ca com mütrümquefi tañi üi meu. Fütra pepiluhun-ngelu am ca afmatufali ñi nehuen, fei quiñe no rume ñamcülelai”. Feimu raquiduamün: “Chau Dios fentren nehuen niei ñi deumafiel com tati mülelu, ¿quellupelayafeneu mai iñche tañi cüme elcünutual tañi mongen?”. Femngechi fentren llellipun mu ca nehuentun mu, hueutripan ñi huesa entuhuenoal tañi hun.

Cüdaucülelu iñche rancho mu, müte pequelafun che ca cüme quimlafun chumngechi ñi nütramcayafiel. Huelu pu Dunguquelu Ineingen Jehová ñi trahun mu pepicangen tañi doi cüme nütramcacheal. Tañi quellungen mu trahunche mu, doi cüme nütramcaquefiñ pu che tati cümeque dungu mülelu Biblia mu (Mateo 6:9, 10; 24:14).

Quiñeque tripantu yenien ñi loncolen ti trahunche mu. Rume falintuquefiñ tañi quelluafiel tañi pu peñi ca lamngen trahunche mu.

Iñche pichin educacion nielu rume, Jehová elueneu tañi quimafiel, feimu rume mañumquefiñ (Isaías 54:13). Rüf tripai iñche mu ñi feipin Proverbios 10:22: “Jehová tañi cümelcan feita riculchequei”.