RAKIDUAMNGE tami trekalen kiñe dumiñmalechi lelfün konantü mu. Epe konlu rume ti antü llükalelaymi nielu am eymi kiñe linterna tami kuwü mu. Nag pelontufilmi küme peymi chem ñi mülen tami puñma mu. Ka adkiñ pelontufilmi küme peymi ti rüpü.

Ka femngechi ti Biblia feychi linterna reke feley. Chumngechi taiñ ngüneduampeel nga, Biblia kelluafeiñmu taiñ chaftual fillke wedake dungu taiñ rupameken famülke mu. Welu fey ka müten no. Biblia ka feypikeeiñmu chem ñi rupayal küpalechi antü mu ka pengelkeeiñmu chumngechi rumel ayüwküleal (Salmo 119:105). ¿Chumngechi am?

Ngüneduamaiñ epu dungu chumngechi ti Biblia wülkey maneluwün küpalechi antü mu: 1 tüfa kellukeeiñmu taiñ ayüwküleal mongen mu, ka 2 kimeltukeeiñmu chumngechi rumel weniyewküleal Chaw Ngünechen iñchiñ.

Biblia wülkey kümeke ngülam ñi chaftual taiñ weda rupameken, welu kiñe pekan lifru no tati. Biblia kimeltukeeiñmu taiñ kidutu duamuwnoal müten, doy may taiñ kutranpiwkeyeafiel kakelu che. Femngechi femliyiñ, rüf ayüwküleaiñ llemay.

Rakiduamnge tüfachi ngülam tripalu Biblia mu: “Doy kümey ta wülael ta llowün mew” (Hecho 20:35). Müna küme duamelkeeiñmu kelluafiel kiñe che fillañmalelu kam küme allkütuafiel kiñe weni nütramkalu ñi chum duamkülen, ¿ka femngentufimi eymi?

Doy ayüwküleaiñ, fürenecheliyiñ ka rakiduamnoliyiñ ñi wiñoleltuaetew taiñ küme femün. Kiñe wentru feypi: “Rüfkünu llemay, kümelkafilmi ta che, doy wiñolelngetuaymi tami küme femün, welu fürenefilmi ta che, femlayaymi re tami kümelkangeal”.  Feymu fürenefiliyiñ ta che taiñ pepi wiñoleltunoaetew, kümelkangeaiñ llemay. Rüfkünu may fürenecheliyiñ, Chaw Ngünechen kidu ñi arelelkefiel reke trokikey, trür küdawkülelu am fey engu (Proverbios 19:17). Feymu müna falintukey taiñ kümelkakefiel pu duamnielu kellu ka feypikünuy taiñ eluaetew afnoachi mongen kiñe küme mülewe ngetule ti Mapu, ¡afmatufali tüfachi maneluwün! (Salmo 37:29; Luka 14:12-14). *

Doy may, Biblia kimeltukeeiñmu taiñ rüf ayüwküleal poyefiliyiñ taiñ Chaw Ngünechen Jewba. Biblia feypikeeiñmu ñi püramyeafiel, yamnieafiel ka allkütuafiel taiñ Fütra Chaw, kidu am ngen-ngelu tañi llowal (Eclesiastés 12:13; Apokalipsi 4:11). Femngechi femliyiñ diturpuaiñ kiñe afmatufalchi dungu: füreneafiyiñ taiñ Wenu Chaw. Rüfkünu may, kidu feypieiñmu: “Kimchengeaymi, [...] ka ayüwülelman tañi piwke” (Proverbios 27:11). Rakiduamnge, inanieliyiñ Biblia ñi ngülam ayüwülmapiwkeafiyiñ ta Chaw Dios. Kidu am duamnieetew ta iñchiñ ka ayüniey taiñ kümelkaleal ka inayal tañi feypin (Isaías 48:17, 18). Feymu poyefiliyiñ ta Chaw Ngünechen ka ayüwülmapiwkefiliyiñ taiñ femken mu, ¿rüf küme mongen nienoafulu kay iñchiñ?

Biblia ka kimeltukeeiñmu chumngechi weniyewküleal Chaw Ngünechen iñchiñ. Biblia feypi: “Fülkonmün ta Ngünechen mew, fey kisu fülkonay ta eymün mew” (Santiaw 4:8). Kiñeke mu, “¿rüf weniyepeafun may ta Chaw Ngünechen?” piafuiñ. Welu ti Biblia feypikeeiñmu “Ngünechen ñi alü kamapulenon kake kiñeke iñchiñ mew”, feymu ‘kintufiliyiñ ta Ngünechen’, rüf ‘kimafiyiñ ta kidu’ (Hecho 17:27). Biblia ñi ngülam taiñ weniyeafiel ta Chaw Dios ka kümelkayaeiñmu küpalechi antü mu, ¿chumngechi kay?

Rakiduamnge tüfa, chem femliyiñ rume ti lan dungu moll-layaeiñmu, tüfa kiñelewechi kayñe reke felelu (1 Korintio 15:26). Welu Chaw Dios rumel mülekey, kidu turpu lalayay ka ayüniey kom tañi pu weni ñi rumel mongeleal engün. Biblia müna küme feypi Chaw Dios ñi ayükeel kom tañi pu weni mu: “Rumel ayüwkülenge tami mongen mu” (Salmo 22:26).

¿Chumngechi rumel weniyeafuymi ta Chaw Ngünechen? Doy ngüneduamnge Biblia tami kimürpuafiel (Juan 17:3; 2 Timotew 3:16). Ngillatuafimi tami kelluaetew ñi doy adümal Biblia. Chaw Dios ñi Dungu feypieiñmu ngillatufiliyiñ ñi eluaetew kimün, kidu eluaeiñmu llemay * (Santiaw 1:5). Feymu inayaymi tami kimürpuel Biblia mu, fey ‘kiñe küdetuwe reke felepe tami namun mew’ ka ‘kiñe pelon reke felepe tami rüpü mew’, femngechi adnieaeymu fantepu ka rumel mu (Salmo 119:105).