Nielu 13 tripantu müte küme weniyelafiñ ta Jewba. Rakiduamkülefun fente tañi küme rupan tañi pu compañ colegio mu, iñche ka femngechi ayüfun tañi femal. “Tañi pu chaw ka Biblia ñi feypin rume katrütuenew tañi mongen” pilefun. Feymu rume küdawtukefun tañi serfifiel ta Jewba. Kimniefun ñi mülen ta Chaw Ngünechen, welu rüfkünu fülmawkülelafun kidu mu.

Turpu fentekünulafiñ tañi amuldungual, pichin tiempo amuldungukefun. Femkelafun kom tañi pepi femel. Turpu pepikawkülelafun tañi amuldungucheal, feymu rume küdawtufun tañi nütramkayafiel pu che. Küme tripalay tañi amuldungun küdaw, feymu ayüwülkelaenew. Kafey ramtuwün: “¿Chumngechi am kiñe che amuldungucheafuy fill semana mu?”.

Nielu 17 tripantu ayüfun kidu ngüneniewal, fey elkünun tañi ruka ka wiñamtuwün Australia mapu mu. Tañi femün weñangküleyew tañi pu chaw. Müna rakiduamkülelu rume engu, maneluwingu tañi fentekünunoal tañi poyefiel ta Jewba.

 Australia mapu mu doy famtriparpun ta Jewba mu. Kiñeke mu müten amukefun trawün mu. Weniyekefiñ kiñeke wechekeche iñche reke femkelu. Amukefuiñ trawün mu, welu pun mew tripakefuiñ taiñ küme rupaleal, fey failaiñ ka pütokeiñ. Feychi antü mu, koneltulefun Jewba tañi trokiñche mu, welu ka inayentukefun ñi femün pu poyekenofilu ta Jewba. Chem no rume ayüwül-laenew.

Rupalu epu tripantu kimfiñ kiñe lamngen, kidu küme yeniefuy tañi mongen. Tüfa rakiduamelenew chumngechi iñche yenien tañi mongen. Feychi mu mülekefun kechu lamngen kiñe ruka mu. Fey mangelfiyiñ tati witran-ngepakechi longkolelu tañi domo engu, Tamara pingelu, ñi umañpayal taiñ ruka kiñe semana mu. Petu küdawmekefulu tañi füta, Tamara rulpaantülefuy iñchiñ mu ka trür ayekakefuiñ. Ñi femün ayüwülkeenew. Tamara küme yeniekefuy tañi mongen ka weniyefalngefuy. Afmatulenew fente ñi ayüfalngen ka ñi weniyekefiel ta Jewba.

Tamara ayüwün-ngefuy. Afmatufali fente tañi piwkeyefiel ta Jewba ka tañi amuldungun küdaw. Rume ayüwülkeeyew kom newen mu küdawelafiel ta Jewba. Welu iñche femngechi femlan, müte küme küdawel-lafiñ ta Jewba, feymu ayüwkülelafun. Tamara tañi ayüwün ka tañi küme femün puwi tañi piwke mu. Tañi küme femün rakiduamelenew kiñe falin dungu tripalu Biblia mu, Jewba ayüniey “fütra ayüwün mu” taiñ poyeafiel (Sal. 100:⁠2).

Iñche ayüniefun ayüwküleal Tamara reke, welu duamniefun küme elkünutual tañi mongen. Küdawtukefun, welu ñochikechi femün. Eluwün tañi pepikawal tañi amuldungucheal. Kiñeke küyen mu eluwün ñi wüneleal amuldungun mu. Tüfa kelluenew tañi yewenchengenoal. Doy pünekefiñ Biblia amuldungun mu, fey tüfa doy ayüwülkeenew. Pichi rupalu, 50 hora amuldungukefun fill küyen mu.

 Doyümfiñ kümeke weni kakerume tripantu nielu, tüfa engün küme weniyefingün ta Jewba ka küdawelkefingün ayüwün mu. Pefiel tañi küme femün engün, kelluenew tañi doyümafiel Jewba ñi dungu tañi mongen mu. Doy ayüwülkeenew amuldungucheal, fey wüla amuldungun 70 hora fill küyen mu. Ayüwkülekefun ka küme duamkülefun trawünche mu, fütra kuyfi tañi femngechi duamkülenon.

Kiñe tripantu rupalu kimfiñ ta Alex, kidu küme piwkengey ka rume piwkeyefi ta Jewba ka tati amuldungun. Alex siervo ministerialngefuy ka kayu tripantu wünelekefuy amuldungun mu. Alex kiñeke küyen wiñamtuwi Malawi mu ñi doy kellucheal. Üye mu kidu kimfi kiñeke misionero tañi kelluetew ñi doyümafiel Jewba ñi dungu tañi mongen mu.

2003 tripantu mu, Alex iñchiw niewiyu ka fentekünuwkelayu ñi serfiafiel ta Jewba fill antü. Fentren falinke dungu kimürpuyu ka Chaw Jewba kümelkakeeyumu.

2009 tripantu mu elfalkünungeyu misionerongerpual Timor Oriental wapi mu. Pichi llükalekefuyu, welu rumeñma ayüwküleyu ka afmatulewiyu. Kechu küyen rupalu, wiñamtuwiyu Dili pingechi waria.

Fütra dungu tayu wiñamtuwal üye mu. Mülefuy tayu wimtual weke iyael mu, we mongen mu, weke wimtun mu ka kimürpual kiñe we kewün. Amuldungun mu pefiyiñ pu che rume pofrengelu, pichin educacion nielu ka rume kayñetungelu. Tati fütrake kewan ñi duam mu, fentren che allfülefuy ka weñangkülefuy.⁠ *

 Müna küme amulefuy tayu amuldungun. Kiñe rupa kimfiñ kiñe üllcha domo rume weñangkülelu, María pingelu ka nielu 13 tripantu.⁠ * Kiñeke tripantu dewma perdey tañi ñuke, müte pekelafuy tañi chaw. María kimlafuy chem chumal tañi mongen mu. Kiñe rupa nütramkaenew tañi chum duamkülen, rume ngümakawi. Welu iñche adümlan chem no rume tañi feypietew, petu kimnolu kay tañi kewün. Feymu llellipufiñ ta Jewba tañi kelluaetew tañi yafülduamelafiel, fey wüla papeltulelfiñ kiñeke texto tañi yafülduamküleal. Rupalu ta tripantu pen chumngechi tati kümeke dungu küme elkünutueyew María tañi mongen. Fautizangey ka kimeltulelfi ta kakelu che tañi kimürpuel. María konküley Jewba tañi fütra familia mu, ka rume piwkeyeniengelu trokiwkey.

Chaw Jewba rume kümelkakefi pu lamngen ñi küdaw Timor Oriental mapu mu. Epe kom pu amuldungukelu fautizangey mari rupachi tripantu mu. Fentren engün wünelekey amuldungun mu, kelluchekey ka longkolerkey trawünche mu. Kakelu kay küdawkeyngün chew ñi rupaldungungekeel fillke papel kiñeke kewün ñi dungungekeel üye mu. Rume ayüwülkeenew pefiel tañi ülkantumeken trawün mu, tañi ayüwküleken engün ka pefiel ñi serfikefiel ta Jewba.

Tayu mongen Timor Oriental mu trürlay tayu mongen ñi niekefel Australia mapu mu. Turpu rakiduamkelafun fente tayu ayüwkülen üye mu. Kiñeke mu amufuiñ pichike micro mu apolelu pu che mu. Tüfa mu pu che yeniekefuy challwa ka fentren tukukan. Kiñeke che taiñ enseñalelkefiel Biblia rume pofrelefuy, nielafuy piso tañi ruka mu ka tati pu achawall lefkiyawkefuy ruka mu. Femngelu rume, müna ayüwülkeenew müleal üye mu.

Rakiduamkülelu tañi mongen kuyfi mu, rume mañumtufiñ tañi pu chaw tañi kimeltuetew Jewba mu, ka tañi kelluetew üllcha domongelu iñche. Rüf femtripakey tañi mongen mu ñi feypin Proverbios 22:⁠6. Tañi chaw ka tañi ñuke rumeñma ayüwküleyngu Alex iñchiw tayu serfifiel ta Jewba. 2016 tripantu mu elfalkünungeyu ñi witrañmameafiel kiñeke trawünche Australia ka Nueva Zelanda mapu mu.

Kuyfi mu iñche ayüwül-laenew amuldungual, welu fewla ayüwülkeenew tati. Kimürpun kiñe falin dungu: chem dungu rume rupaliyiñ taiñ mongen mu, serfifiel ta Jewba müten rüf ayüwülkeeiñmu. 18 rupachi tripantu ñi serfifiel ta Jewba Alex iñchiw, fey tati doy ayüwün-ngechi tripantu tañi mongen mu. Rüfngey David ñi feypifiel ta Jewba: “Kom tati maneluwkelu ta eymi mu ayüwküleayngün, fey fente tañi ayüwkülen mew wirawirangeayngün [...]. Pu piwkeyefilu tami üy ayüwküleayngün eymi mu” (Sal. 5:⁠11).