1, 2. Jesus amutulu wenu mapu mew, ¿chem ramtuwingün chi tañi pu inanieetew?

JESUS tañi pu apostol witraleyngün Olifu wingkul mu, ka adkintuleyngün chumngechi ñi yengetun Jesus wenu mapu mew ka ellkangey kiñe tromü mu (Hecho 1:9, 10). Epu tripantu mu peno, Jesus kimeltufi, yafültukufi, ka adniefi engün. Welu tañi weni ka tañi kimelfe fewla ngewetulay kidu engün mew. Feymu pu apostol, ¿chem chumafuyngün?

² Petu ñi amutunon wenu mapu mew, Jesus feypifi tañi pu inanieetew: “Tripayaymün tamün nütramyemuafiel ta iñche Jerusalen waria mew, kom ti lof mülelu Judea mapu mew, ka Samaria trokiñ mapu mew, ka fütra kamapu amuaymün tuntepu ñi mülen ta mapu” (Hecho 1:8). Ñi wechurpual tüfa, Jesus feypikünufi Jewba ñi newen tañi kelluaetew engün (Hecho 1:5). Welu, ¿iney am longkoleay kidu engün mu ka adkünuafi ti amuldungun? Pu apostol kimniefuyngün kuyfi mew Jewba ñi longkokünufiel tañi pu che mu kiñeke wentru. Feymu ramtuwingün chi:  “Jewba, ¿iney elkünupeay may ñi longkoleal fewla?”.

3. 1) Amutulu Jesus wenu mapu mew, ¿chem falin dungu femingün pu manelfal apostol? 2) ¿Chem ramtun inaduamaiñ tüfachi chillkatun mu?

³ Pichi rupalu ñi amutun Jesus wenu mapu mew, tañi pu inanieetew ngüneduamfingün ti Wirin Chillka, ngillatufingün ta Jewba tañi kelluaetew, fey apostolkünufingün ta Matia, femngechi ñi welukonal ta Juda Iskariote mu (Hecho 1:15-26). Jewba ka pu disipulu, ¿chumngelu (chemu) fente falintufingün ñi femngeal tüfa? Pu disipulu ngüneduamfingün ñi duamfalngen müleal 12 apostol * (inaduamnge ti kimal dungu). Jesus dulli (ngümintubi) pu apostol ka pepikafi ñi femal kiñe falin küdaw Jewba ñi trokiñche mu. ¿Chem küdaw am chi? Jewba ka Jesus engu, ¿chumngechi pepikafi engün? Famülke mu, ¿chumngechi inayentungey tüfa? Ka ¿chumngechi rakiduamtukunieafuiñ “pu longkolelu” doyelchi may ti “kim manelfal kona”? (Ebrew 13:7, TNM; Matew 24:45, TNM).

4. Pu apostol ka pu longkolelu Jerusalen mew, ¿chem küdaw niekefuyngün?

⁴ Pentekoste 33 tripantu mu, pu apostol eluwingün ñi longkoleal pu kristiano mu. Biblia feypiley “Pedro witrapüray kiñentrür ti mari kiñe apostol engün”, fey kimeltufingün fentren che fillke rüf dungu ñi montulal (Hecho 2:14, 15). Fentren che ñi allkütuetew fawtisawingün. Fey tüfachi pu we inaniefilu ta Jesus “amuleyngün ñi kimeltuetew mew ti pu apostol” (Hecho 2:42). Pu apostol adkünukefuyngün ti plata ñi nieel ti kristiano trokiñche (Hecho 4:34, 35). Kafey kimeltukefuyngün pu poyekefilu ta Jewba, ka ngillatuñmakefuyngün feypilen mew: “Iñchiñ ngillatuleaiñ ka wewpinieaiñ Ngünechen tañi werken dungu” (Hecho 6:4). Ka werkükefuyngün adümuwkechi kristiano ñi kimeltucheal chew ñi petu amuldungukenofel (Hecho 8:14, 15). Fey wüla kiñeke longkolelu dullingelu kiñewingün pu apostol engün ñi longkoleal Jewba ñi pu che mew. Kiñewkülechi ngünenielu am, wülkefuyngün ngülam itrokom pu trawünche (Hecho 15:2).

5. Ti kiñewkülechi ngünenielu, ¿chumngechi kellueyew Chaw Ngünechen ñi newen? (Inaduamnge ti adentun pagina 20 mu.)

⁵ Pu kristiano wünen siglo mu küme kimniefuyngün Jewba ñi adkünufiel ti kiñewkülechi ngünenielu Jesus mew. ¿Chumngelu? Wüne, Chaw Ngünechen ñi newen kellufi ti kiñewkülechi ngünenielu (Juan 16:13). Kom pu kristiano dullingelu llowingün Chaw Ngünechen ñi newen, welu doyelchi may tüfa kellufi ti kiñewkülechi ngünenielu.  Kiñe dungu, 49 tripantu mu Jewba ñi newen kellufi engün ñi kimal chem chumal sirkunsision dungu mew. Tati kiñewkülechi ngünenielu wirintukulelfi kiñe karta pu trawünche. Kom inafingün ñi feypietew engün, feymu “doy küme inay engün ñi mupiltun mew” ka “doy alünngey engün” (Hecho 16:4, 5). Tüfachi karta mu pengelngey ti kiñewkülechi ngünenielu ñi niekefel piwkeyewün, mupiltun ka fillke kümeke chumngen, femngechi ka kimfalngefuy ñi llowün Jewba ñi newen (Hecho 15:11, 25-29; Galata 5:22, 23).

6. 1) Pu kümeke püllü, ¿chumngechi kellufingün tati kiñewkülechi ngünenielu? 2) Chaw Ngünechen ñi Dungu, ¿chumngechi adniefi tati kiñewkülechi ngünenielu?

⁶ Epu, pu kümeke püllü kellufingün ti kiñewkülechi ngünenielu. Kiñe dungu, kiñe küme püllü feypifi ta Korneliu ñi kintuafiel ti apostol Pedro. Fey Pedro amuldungueyew ta Korneliu ka tañi pu che, tüfa engün llowingün Chaw Ngünechen ñi newen, sirkunsidalenolu rume pu wentru. Femngechi Korneliu tati wünen kristianongerpuy sirkunsidalenolu ka judio tuwün-ngenolu. Fey pu apostol ka fillke peñi allkütulu tüfa, femingün Jewba ñi ayükeel, feymu llowfingün ti trawünche mew pu judio tuwün-ngenolu sirkunsidalenon mu (Hecho 11:13-18). Feymu ngüneduamfalngey pu kümeke püllü ñi kelluntukukefiel ti amuldungun ñi adkünuel ti kiñewkülechi ngünenielu (Hecho 5:19, 20). Küla, Chaw Ngünechen ñi Dungu adniefi tati kiñewkülechi ngünenielu. Tüfachi pu wentru chillkatukefuyngün ti Wirin Chillka tañi küme elkünutuafiel ti feyentun ka ñi küme adkünuafiel pu trawünche (Hecho 1:20-22; 15:15-20).

7. ¿Chumngelu feypiafuiñ Jesus ñi longkolefel tati kristiano trawünche wünen siglo mu?

⁷ Ti kiñewkülechi ngünenielu adkünufi ti trawünche, welu kimniefuyngün Jesus ñi Longkolen. ¿Chumngelu feypiafuiñ tüfa? Ti apostol Pablo feypi Kristo “dullifi kiñeke che tañi apostolngeael”. Ka feypi Kristo “longkoley” ti trawünche mu (Efesio 4:11, 15). Ka pu trawüluwlu kidutu üytuwlayngün kiñe apostol ñi üy mew, welu may “‘tati pu inaniekefilu Kristo’ feypingeyngün Chaw Ngünechen ñi duam mu” (Hecho 11:26, TNM). Pablo kimniefuy ñi fente falin-ngen inayal ñi kimeltuel pu apostol ka pu longkolelu, welu ka feypi: “Ayülen tamün kimael Cristo tañi longkolen ta kom wentru mew”, tati kiñewkülechi ngünenielu mu kütu. Ka feypi Pablo: “Ngünechen longkoley ta Cristo mew” (1 Korintio 11:2, 3). Kimfalngey Jewba ñi longkokünufiel ta Jesus ti trawünche mew.

8, 9. Taiñ peñi Russell, ¿chem falinke dungu femi?

⁸ Konlu 1870 tripantu, Charles Taze Russell ka kiñeke tañi weni eluwingün ñi inayafiel Biblia ñi feypin tañi küme poyeafiel ta Jewba, ka küpa kellufingün pu che ñi ka femngechi femal, ka kewün dungulu rume. Feymu 1884 tripantu, ley dungu mu dewmangey ti adkünuelchi trokiñche Zion’s Watch Tower Tract Society, ka taiñ peñi Russell longkolerpuy * (inaduamnge ti kimal dungu).  Kidu küme chillkatuy ti Biblia, ka llükalay ñi feypial ñi mülenon Biblia mew kiñeke dungu kimeltukelu pu iglesia, ti trinidad, taiñ nieel kiñe am kam kiñe püllü lakenolu ka kakelu dungu. Ka kimürpuy Jesus ñi wiñotual pewfaluwngenon mu, ka 1914 mu ñi puwal “ti tripantu tañi fentepu legtukünulngeel” itrokom trokiñ mapu (Luka 21:24). Taiñ peñi Russell wüli ñi newen, tañi mongen, ka plata tañi kimeltuafiel tüfachi rüf dungu tati pu che. Kimfalngey Jewba ka Jesus ñi longkokünufiel taiñ peñi Russell feychi falinke antü mu.

⁹ Taiñ peñi Russell pilay kakelu che ñi püramyeaetew. 1896 tripantu mu, wirintukuy kidu ka kakelu longkolelu pilayngün ñi sakingeal chem dungu mu no rume. Ayülayngün ñi elungeal ülmen-ngechi üy, ka kiñe trokiñche ñi üytungeal kidu engün ñi üy mew. Ka feypi: “Tüfachi küdaw, wentru ñi küdaw no tati”.

10. 1) Jesus, ¿chumül am elkünufi ti “kim manelfal kona”? 2) ¿Chumngechi kimfalkünungey ñi trürngenon ti Kiñewkülechi Ngünenielu ka ti trokiñche Watch Tower engu?

¹⁰ Ti tripantu 1919 mu, küla tripantu rupalu taiñ peñi Russell ñi lan mu, Jesus elfalkünufi ti “kim manelfal kona”, femngechi ñi eluafiel tañi pu inanieetew “ñi iyael engün puwchi antü mu” (Matew 24:45, TNM). Kom feychi tripantu mu, kiñeke peñi dullingelu küdawkefuyngün ti ngüneniechi ruka mew Brooklyn, Nueva York mu, femngechi ñi eluafiel Ngünechen ñi kimün tati pu inaniefilu ta Jesus. 1940 mu, eluwi ñi tripayal taiñ papil mew ti feypin “kiñewkülechi ngünenielu”. Feychi mu ti kiñewkülechi ngünenielu koneltulefuy ñi longkoleal ti trokiñche Watch Tower Bible and Tract Society. Welu 1971 mu, kimfalkünungey ñi trürngenon ti Kiñewkülechi Ngünenielu ka ti trokiñche Watch Tower, tüfa eluwkülelu am ley dungu mu müten. Feymu duamfalngelafuy pu peñi koneltulelu ti Kiñewkülechi Ngünenielu mu ñi koneltual ti trokiñche Watch Tower mew. Famülke mu, kiñeke manelfal peñi maneluwkelu ñi müleal Mapu mew, longkoleyngün tati trokiñche Watch Tower mu, kam kakelu trokiñche ñi nieel Jewba ñi pu che ley dungu mu. Femngechi tati Kiñewkülechi Ngünenielu eluwkey müten tañi wülal kimelün dungu ka kümeke ngülam Biblia mu (Juan 10:16; Hecho 6:4). Ti chillka La Atalaya 15 konchi julio 2013 mu, pengeli ti “kim manelfal kona”, fey tati pichi trokiñ wentru dullingelu, Kiñewkülechi Ngünenielu pingelu.

11. Ñi dullial falin-ngechi dungu, ¿chem chumkey ti Kiñewkülechi Ngünenielu?

¹¹ Fill semana mu, ti Kiñewkülechi Ngünenielu trawükey ñi dullial falin-ngechi dungu. Tañi trawüken mu, küme nütramkawkeyngün ka kiñewküleyngün (Proverbios 20:18). Kiñe peñi no rume ti Kiñewkülechi Ngünenielu mu doy  falintungelay kakelu mew, feymu fill tripantu welutukungekey ti adkünukefilu tüfakechi trawün (1 Pedro 5:1). Ka femngechi femkeyngün tati kayu trokiñche ti Kiñewkülechi Ngünenielu ñi adkünufiel. Kiñe peñi no rume ti Kiñewkülechi Ngünenielu mu ñidolkawkelay tañi pu peñi ka lamngen mu. Tüfa engün ka koneltuley ti “kakelu kona” mew, feymu llowkeyngün Ngünechen ñi kimün wülkelu ti manelfal kona ka inakeyngün ñi feypin.

12. ¿Chem ramtun inaduamaiñ?

¹² Ti Kiñewkülechi Ngünenielu llowkelay perimontun ka pewma Ngünechen mu küpalu, ka welulkayafuyngün. Kiñeke rupa, welulkawafuyngün tañi kimeltuel Biblia mu, kam chumngechi ñi adkünufiel Jewba ñi trokiñche. Ti lifru Índice de las publicaciones Watch Tower niey kiñe dungu feypilelu “Aclaración de creencias”, tüfa pengeli chumngechi küme elkünungetuy taiñ feyentun Biblia mu, 1870 tripantu ka fantepu mu. Jesus feypilay ti kim manelfal kona ñi welulkanoal wülfiel Jewba ñi kimün. Feymu ¿“iney am chi kim manelfal kona” Jesus ñi feypiel? (Matew 24:45, TNM). Tüfa tati Kiñewkülechi Ngünenielu, ¿chumngelu feypiafuiñ tüfa? Inaduamaiñ chumngechi famülke mu kellukeeyew ti Kiñewkülechi  Ngünenielu feychi küla dungu ñi kellufiel tati kiñewkülechi ngünenielu wünen siglo mu.   

13. Ngünechen ñi newen, ¿chumngechi kellukefi tati Kiñewkülechi Ngünenielu?

¹³ Ngünechen ñi newen kellukefi tati Kiñewkülechi Ngünenielu. Femngechi kimürpuy fillke rüf dungu Biblia mew, kuyfi ñi kimnofel. Kiñe dungu, ngüneduamafuymi tati feyentun ñi küme elkünungetuel feypilelu ti lifru Índice. ¡Iney no rume kidutu küme kimtukulayafuy “Ngünechen tañi kimngekenofelchi dungu”! (Papeltunge 1 Korintio 2:10.) Tati Kiñewkülechi Ngünenielu, rakiduamkey Pablo reke, kidu wirintukuy: ‘Tüfachi dungu taiñ feypikeel, Ngünechen ñi newen küme kimeleiñmew, fey kisuke iñchiñ taiñ adümelchi kimün no’ (1 Korintio 2:13). Fentreñma mu küme adkünungekelafuy tati pu che, ka weda kimeltungekefuy, welu 1919 mu eluwngey ñi küme kimtukuafiel fentren dungu Biblia mu, ¿chumngelu am? Jewba kellukelu kay kidu ñi newen mu.

14. Apokalipsi 14:6, 7 ñi feypilen mu, pu kümeke püllü, ¿chumngechi kellukefingün tati Kiñewkülechi Ngünenielu ka Jewba ñi pu che, famülke mu?

¹⁴ Pu kümeke püllü kellukefingün tati Kiñewkülechi Ngünenielu. Tüfachi pu peñi nieyngün kiñe fütra küdaw ñi adkünuafiel doy pura millon amuldungukelu. ¿Chumngelu fente küme tripakey tüfachi küdaw? Kiñe dungu, pu kümeke püllü ñi kellun mew (papeltunge Apokalipsi 14:6, 7). Fentren rupa, pu kümeke püllü ñi kellun mew, ¡pu amuldungukelu pemeyngün kiñe che ngillatumekelu ta Jewba ñi kelluaetew! * (Inaduamnge ti kimal dungu.) Kayñetungele rume taiñ amuldungun ka taiñ kimeltucheken, küme tripakey pu kümeke püllü ñi kellun mew.

15. Ti Kiñewkülechi Ngünenielu, ¿chem dungu mu trürlayngün kakelu religion ñi longko mu? Feypinge kiñe pengelün dungu.

¹⁵ Chaw Ngünechen ñi Dungu adkünukefi tati Kiñewkülechi Ngünenielu (papeltunge Juan 17:17). Inaduamnge ti chillka La Atalaya 1 konchi junio 1973 mu ñi ramtuel: “¿Fawtisangeafuyngün tati pu che putremtukelu?”. ‘¡Femlayafuy!’, pi ti chillka ngüneduamfiel mu Biblia ñi ngülam. Tüfa pengeli fillke versikulo ka feypi chumngelu ñi wemünentungeal ti trawünche mu ti fentekünukenolu tañi putremtuken (1 Korintio 5:7; 2 Korintio 7:1). Ka feypi tüfachi werkün dungu duamfalngelu ñi inangeal, küpalay pu wentru mu, welu may Jewba mew küpay, ka müley tañi wirintukulechi Dungu mu. Jewba ñi pu che müten eluwkey tañi fente maneluwal Chaw Ngünechen ñi Dungu mu, küdawngefule rume kiñeke tañi pu inaniekeetew mu. Kiñe lifru nütramlu pu religion Estados Unidos mew, feypi pu longko kristianofaluwkelu chi iglesia mu, rumel ngüneduamkeyngün tañi feyentun femngechi ñi trürküleal ti feyentun ka rakiduam mu ñi nieel tañi pu inanieetew ka fentren che. Ti Kiñewkülechi Ngünenielu inakelafi ñi ayükeel ta fentren che. Welu may inakefingün Biblia, femngechi kimfalngekey Jewba ñi Ñidolkülen tañi pu che mu.

16. ¿Chumngechi rakiduamtukunieafuiñ ti Kiñewkülechi Ngünenielu?

¹⁶ Biblia feypi: “Rakiduamtukuniefimün tati pu longkolelu eymün mew, tüfa engün tamün kimeltuetew Chaw Ngünechen ñi dungu, ka tamün ngüneduamfiel chumngechi tripay tañi femken engün, inayentuñmayafimün ñi mupiltun” (Ebrew 13:7, TNM). ¿Chumngechi rakiduamtukunieafuiñ ti Kiñewkülechi Ngünenielu? Kiñe dungu, ngillatuñmayafiyiñ kidu engün (Efesio 6:18). Fentren küdaw nieyngün, wülkeyngün Ngünechen ñi kimün, adkünukefingün ti amuldungun wall Mapu püle, ka adniefingün ti plata ñi llowngeel. Feymu duamnieyngün taiñ ngillatual kidu engün mew.

17. ¿Chumngechi inakeiñ taiñ feypietew ti Kiñewkülechi Ngünenielu?

¹⁷ Kafey rakiduamtukunieafuiñ ti Kiñewkülechi Ngünenielu inafiliyiñ taiñ feypietew. Fillke papil mu, tati trawün ka fütrake trawün mu, ti Kiñewkülechi Ngünenielu elukeeiñmew fillke ngülam. Kafey elfalkünukefingün pu witran-ngepakechi longkolelu, ka tüfa engün elfalkünukefingün pu longkolelu ti trawünche mew. Inafile engün ñi feypietew ti Kiñewkülechi Ngünenielu, pengelayngün ñi rakiduamtukuniefiel. Ka kom iñchiñ inafiliyiñ taiñ feypietew pu longkolelu ti trawünche mu, pengelaiñ taiñ yamniefiel taiñ longkolelu Jesus (Ebrew 13:17).

18. ¿Chumngechi kellukefiyiñ ti Kiñewkülechi Ngünenielu ka Jesus?

¹⁸ Kafey yafüluwliyiñ ti amuldungun mew, ka femngechi rakiduamtukunieafiyiñ tati Kiñewkülechi Ngünenielu. Pablo ngülamtuy taiñ inayentuñmayafiel pu longkolelu ñi mupiltun. Ti Kiñewkülechi Ngünenielu, kom ñi newen mu amuldungukey ka amultukuniefi ñi kimeltungeal Chaw Ngünechen ñi kümeke dungu, femngechi pengelkeyngün ñi nieel fentren mupiltun. ¿Kelluntukukefiyiñ ti Kiñewkülechi Ngünenielu tüfachi amuldungun küdaw mu? Femngechi femliyiñ, ayüwküleaiñ Jesus feypieliyiñmu: “Rüf dungu ta feypiwayiñ kom tamün femel kiñeke tüfa engün mew iñche tañi pu peñi doy duamlu ñi kellungeael, iñche ta fürenemun” (Matew 25:34-40).

19. ¿Chumngelu eluwküleymi tami inayal taiñ Longko Jesus?

¹⁹ Jesus wiñotulu wenu mapu mew, kidukünulafi tañi pu inaniekeetew (Matew 28:20). Kimniefuy Chaw Ngünechen ñi newen, ñi Dungu ka pu kümeke püllü kellueyew ñi longkoleal mülepalu Mapu mew. Famülke mew ka femngechi kellukefi ti Kiñewkülechi Ngünenielu. Kidu engün inaniekey ta Jesus “chew rume ñi amuken” (Apokalipsi 14:4, TNM). Feymu inafiliyiñ ti Kiñewkülechi Ngünenielu, fey inayaiñ taiñ Longko Jesus, pichiñma mu taiñ yeaetew ñi nieal afnoachi mongen (Apokalipsi 7:14-17). ¡Chem wentru no rume turpu elulayafeiñmu tüfa!