PABLO ñi antü mew, ngelafuy farku yeniefilu ta che müten. Pu che ñi amual kangelu trokiñ mapu mew, ramtukefuyngün ta che ñi mülepen may kiñe farku yenielu fillke chemkün, ka amualu feychi trokiñ mapu chew ñi küpa puwal engün. Welu pu marineru pifule müten, yeafuy feychi che (Hecho 21:2, 3). Kiñeke mu tati farku puwlafuy chew ñi küpa amun ta che, welu puwafuy kangelu puerto mu, fey pu che kintukefuy kangelu farku ñi yeaetew chew ñi küpa amun (Hecho 27:1-6).

Pu marineru kiñeke küyen mu müten miyawkefuyngün lafken mew ka adkünukelafuyngün chem ora ñi tripayal. Weda antü ngele, eluwlafuyngün ñi amultukual farku mew. Kafey kiñeke marineru feypikefuyngün: “Kakarale ta kurü üñüm, kümelay miyawal lafken mew” ka pu marineru adkintule kiñe teyfükangeelchi farku inaltu lafken mew, eluwlayngün miyawal lafken mew. Kürüfkülele chew ñi küpa puwal ti farku, pu marineru eluwingün ñi tripayal puerto mu. Tati che pefile kiñe farku ñi yeafetew chew ñi küpa puwal, üngümkefuy puerto mew, fey ñi wüldungungeal chumül ñi tripayal ti farku.

Kiñe wentru nütramdungukelu, Lionel Casson pingey, feypi: “Roma mew pu che küdawtukelafuy peal kiñe farku amualu chew ñi küpa puwal”. Ka feypi: “Chew ñi trawüken Tiber pingechi lewfü lafken engu, mülefuy kiñe puerto. Ka püllelefuy Ostia pingechi waria, fey mu mülefuy fentren oficina. Pu marineru mülelu fillke puerto mew ngen-ngefuyngün epe kom tüfachi oficina. Fey pu marineru mülelu Narbona pingechi mapu mew ngen-ngefuyngün kiñe oficina ka pu marineru mülelu Cartago pingechi mapu mew ngen-ngefuyngün kangelu oficina [...] ka femngechi kakelu marineru ngen-ngefuy”. Famülke mu Narbona fey ta Francia pingechi mapu ka Cartago fey ta Tunez mapu. Lionel Casson ka feypi: “Fey iney rume kintule kiñe farku tañi amual kangelu trokiñ mapu mew, ramtumeafuy fillke oficina mülelu kakerumechi waria mew”.

Amun mu farku mew pu che doy matu puwkefuy kangelu trokiñ mapu mew, welu ka kuñiwün-ngefuy. Fentren rupa tati farku chew ñi amuleel Pablo llañkoni ti pu lafken mew (2 Kor. 11:25).