FALINQUE QUELLUN TATI PU LAYELUUCÜLELU

Tati doi cüme quellu ñi nieafel pu layeluulu

AMULCÜNUNGEAL

RUPACHI TRIPANTU MU DOI ESTUDIANGEQUEI ÑI RUPAQUEN PU LAYELUULU. Chumngechi deu ngüneduamiyiñ, pu quimche ñi feipin fentren rupa pengeli ñi manelfalngen Biblia ñi quimün. Biblia ñi feipin amulei ñi quelluchequen. Tüfachi lifru niei cümeque ngülam, huelu fei ca müten no. Cafei quimeltueiñmu falinque rüf dungu, tüfa yafültucuquefi pu layeluulu.

Taiñ pu che lalu cutrancaucülelai

Biblia feipi “pu layelu chem dungu no rume quimhuetuquelaingün” ca raquiduamhuequelaingün (Eclesiastés 9:5; Salmo 146:4). Feimu ti Biblia ca feipi pu lalu umaucülei reque (Juan 11:11).
Feyentuqueiñ Chau Dios taiñ piuqueyenieteu

Biblia feipi: “Jehová a tañi nge puquintuquefi tati pu nor piuquengelu, ca tañi pilun allcütuquei ñi eyütulequen engün” (Salmo 34:15). Llellipuafiel ta Chau Dios quelluaimu tami doi cüme elcünutuafiel tami raquiduam ca tami cüme duamcületual. Huelu fei ca müten no, cafei quelluqueiñmu taiñ hueniyeafiel ta Chau Dios, fei eluqueiñmu tañi nehuen taiñ yafüluucüleal.
Doi cüme mongen nieaiñ

Fentren rupa ti Biblia nütramcai ñi huiñomongetual pu lalu. Nütramcalu ñi chumletual ta mongen cüpalechi antü meu, feipi: “Chau Ngünechen com liftuñmayafi tati pu che ñi cülleñu. Ngehuelayai lan, afai ta hueñancün, ngüman ca cutrantun” (Apocalipsis 21:3, 4). ¡Afmatufalngeai!

Fentren che feyentulelu Chau Jehová mu, yafüluuquei quimlu ñi huiñomongetual pu layelu. Femngechi rupai quiñe domo Ann pingelu. Yeniefui 65 tripantu tañi curehuen-ngen, huelu tañi füta lai. Fei feipi: “Ti Biblia quimeltueneu ñi cutrancaucülenon tañi pu che lalu. Cafei Chau Dios raquiduamtucuniefi engün, fei huiñomongeltuafi. Acordarumelu iñche tañi füta yem, raquiduamquen tüfachi dungu meu, femngechi nehuencontuquen”.

Tina, taiñ deu nütramcapeel, feipi: “Lalu tañi füta ta fantepu mu quelluntucunieneu Chau Dios. Hueñancülelu iñche, ngüneduamün fente tañi quellueteu Chau Jehová tañi nehuencüleal. Rüf feyentulen ñi huiñomongetual pu layelu. Tüfa nehuentucuqueneu tañi amuleal puule hula ti antü ñi huiño petuafiel tañi füta yem”.

Ca femngechi raquiduamquei fentren che maneluulu Biblia mu. Eimi cai, ¿epeu müten troquiquefimi Biblia ñi feipin? Femngechi femülmi, ngüneduamnge chem pengelquei ñi manelfalngen Biblia ñi ngülam ca tañi feipicünuel. Fei quimaimi chumngechi ti Biblia rume quelluquefi tati pu layeluulu.