Biiyaʼ guiraʼ ni nuu lu sitiu riʼ

guyé lu índice

 HISTORIA STINNEʼ

Maʼ bidii Jiobá naa jma de ni caquiiñeʼ guicaaʼ

Maʼ bidii Jiobá naa jma de ni caquiiñeʼ guicaaʼ

Dxi nahuiineʼ, nabé gucuá iqueʼ guneʼ ni runi cani napa 17 iza, casi naa. Riuuladxeʼ guidxaagaʼ ca xhamiguaʼ, chixhúʼbadu ne chichítedu fútbol. Peru ti dxi bichaa modo nabaneʼ. Gupaʼ ti accidente lu moto ne pur ngue maʼ qué ñanda niniibeʼ, yannesiáʼ gunda biniibi. Raca treinta iza bizaaca nga ne dede yanna néxheruaʼ lu cama.

Biniiseʼ ndaaniʼ ti guidxi ni láʼ Alicante, España, ruaa nisadóʼ Mediterráneo. Nabé ridíndecabe ra lidxeʼ, ngue runi nisi lu calle maʼ canazayaʼ. Gaxha de ra lidxeʼ nuu ti lugar ra runi chaahuicabe llanta, raqué guca xhamiguaʼ José María, tobi de cani runi dxiiñaʼ raqué. Gúcabe nachaʼhuiʼ né naa ne jmápeca bilábibe naa que binnilidxeʼ. Neca gande iza jma huaniisibe que naa, bidiinabe naa ora bidxaagaluáʼ guendanagana, casi runi biʼchiʼ binni o ti xhamigu.

Bizulú José María cayuundaʼ Biblia né ca testigu stiʼ Jiobá. Bihuinni dxichi riuuláʼdxibe guiráʼ ni caziidibe, purtiʼ stale biaje ruiʼnebe naa ni caziidibe. Neca rucaadiaʼgaʼ pur respetu, qué riuuladxeʼ guiráʼ ni rábibe naa. Cumu nahuiineʼ la? jma ricá iqueʼ guneʼ xcaadxi cosa. Peru qué nindaa bichaa modo riníʼ iqueʼ.

ACCIDENTE GUPAʼ

Qué riuuladxepiáʼ guiniéʼ de accidente gupaʼ; ni zanda si guiniéʼ nga bineʼ ti guendahuati. Ti ratu si bichaa xquendanabaneʼ. Despué de gucaʼ ti hombrehuiiniʼ daʼ gana, beeda guiluxeʼ lu ti cama ndaaniʼ ti hospital. Guizáʼ guca nagana para naa guiníʼ iqueʼ dxandíʼ bizaacaʼ ngue. Gatigá riníʼ iqueʼ maʼ xi para nabaneʼ.

Ora gunna José María ni bizaacaʼ que oraqueca beeda ganna naa ne gúdxibe ca testigu stiʼ Jiobá de ti congregación nuu gaxha de ra hospital que chigánnacaʼ naa. Cumu gatigá guyécabe la? biniibicabe ladxiduáʼ. Despué de gudideʼ ca dxi jma naxoo, bizuluáʼ biindaʼ Biblia. Gunnaʼ chaahueʼ xiñee racaná ne rati binni ne xiñee rudii Dios lugar gaca cosa malu. Ne laaca biindaʼ xi guiráʼ chiguni Dios ne ximodo guibani binni ni qué gapa donda lu Guidxilayú riʼ ra «guirutiʼ tu [zaníʼ]: “Huaraʼyaʼ”» (Isaías 33:24). Ngue nga primé biaje guníʼ iqueʼ caquiiñeʼ guneʼ stipa pur guibaneʼ.

Bireesiáʼ de ra hospital que, jma maʼ biindaʼ Biblia. Dede gunda guyaaʼ chupa chonna guendaridagulisaa ni rapa ca testigu stiʼ Jiobá ne bicheecheʼ diidxaʼ lu ti silla de rueda. Dxi napaʼ 20 iza, 5 stiʼ noviembre, iza 1988, guyuaanisaʼ ndaaniʼ ti tina. Gucané Jiobá naa para gusisacaʼ xquendanabaneʼ. Ximodo zanda gusihuinneʼ cudieeʼ xquíxepeʼ laabe yaʼ.

 CAYUNEʼ NI NA DIOS NECA HUARAʼYAʼ

Qué racaladxeʼ chuʼ xiixa ni gucueeza naa de guneʼ ni na Jiobá; gudixheʼ iqueʼ guneʼ biaʼ gándatiʼ (1 Timoteo 4:15). Primeru ga que gúcani nagana para naa purtiʼ qué riuulaʼdxiʼ binnilidxeʼ religión stinneʼ. Peru ca Testigu beeda gácacaʼ casi familia stinneʼ ne gucanecaʼ naa. Biyúbicabe modo cadi guiaadxaʼ nin ti reunión ne cadi gusaanaʼ de gucheecheʼ diidxaʼ.

Despué bihuinni dxichi caquiiñeʼ chuʼ tu guʼyaʼ naa guiráʼ ora. Biyubeʼ chaahuesiáʼ, bidxelaʼ ti lugar ra ruuyacabe ca discapacitado ndaaniʼ guidxi Valencia, ni riaana biaʼ 160 kilómetru ladu guiaʼ de Alicante. Dede nagasi nabezaʼ raríʼ.

Neca nexheʼ lu cama, qué rusaanaʼ de guinieniáʼ binni cani runeʼ cré

Neca qué randa riasaʼ de lu cama, maʼ gudixheʼ iqueʼ cadi gusaanaʼ de guneʼ ni na Jiobá. Pur guendahuará stinneʼ bidiicabe naa ti pensión ne xcaadxi nabiuxehuiiniʼ ne pur ngue gunda guziéʼ ti computadora ne guluucabe ni cueʼ cama stinneʼ. Laaca guziéʼ ti teléfono celular. Guiráʼ siadóʼ tobi de ca binni ni ruuyaʼ naa rucaaguí computadora ne celular stinneʼ. Para ganda iquiiñeʼ computadora ca la? ricá ti palanca xa xhigueʼ ne ruguaaruaa ti varahuiiniʼ ni racané naa para ganda gucaaʼ lu computadora ne lu teléfono stinneʼ.

Né ti varahuiiniʼ runeʼ marcar númeru de teléfono

Ximodo huayacané aparatu riʼ naa yaʼ. Randa riuaaʼ lu sitiu jw.org ne lu BIBLIOTECA NI NUU LU INTERNET stiʼ Watchtower. Nabé riquiiñeʼ ca sitiu riʼ. Casi guiráʼ dxi riuaaʼ lúcani xadxí para guundaʼ ca publicación ni cusiene de Biblia ne huayacanécani naa guiziideʼ jma de Dios ne ca guenda sicarú ni napa. Ora runeʼ sentir nuaaʼ stubeʼ o nuaaʼ triste huadxelaʼ tema ni huaguu gana naa lu sitiu riʼ.

Ne laaca racané aparatu riʼ naa para gucaadiaʼgaʼ ca reunión ni rápadu ca testigu stiʼ Jiobá. Peru qué rucaadiáʼgasiaʼ, sínuque laaca randa ricabeʼ, guneʼ orar, gudieeʼ libana ne guundaʼ ca párrafo stiʼ Torre stiʼ ni rapa dede ra nexheʼ. Neca maʼ qué randa riaaʼ ca reunión ca, runeʼ sentir nuaaʼ ndaaniʼ congregación ca.

Racané computadora ne teléfono riʼ naa cadi gusaanaʼ de gucheecheʼ diidxaʼ. Neca qué randa riaaʼ de yoo pur yoo casi runi xcaadxi xpinni Cristu, peru rucheecheʼ diidxaʼ. Né ca aparatu riʼ randa rueniáʼ xcaadxi binni ni runeʼ cré. Guizáʼ riuuladxeʼ gucheecheʼ diidxaʼ pur teléfono, pur nga gunabaʼ ca binnigola de congregación stinneʼ naa quixhe chaahueʼ ximodo guni xcaadxi ni. Nga runi, randa rucheeche xcaadxi hermanu diidxaʼ ni qué randa riree de ra lidxi.

Cusiideʼ binni de lu Biblia

 Peru cadi puru si lú ca aparatu riʼ maʼ nuaaʼ. Guiráʼ dxi reeda ganna ca xhamiguaʼ naa. Nuu tiru maʼ zeedanécabe binnilídxicabe o cani ridxaagacabe ni racalaʼdxiʼ guiziidiʼ de lu Biblia. Stale biaje rinábacabe naa guundaniáʼ ca binni ca. Xcaadxi biaje reeda ti familia ra nuaaʼ para chuaaʼ lu adoración en familia sticaʼ. Nabé riuuladxeʼ cuiʼ ca xcuidi cueʼ cama stinneʼ ne gábicaʼ naa xi pur nadxiicaʼ Jiobá.

Guizáʼ riuuladxeʼ gapaʼ adoración en familia

Rudieeʼ xquíxepeʼ gueeda gánnacabe naa ne cadi chuaaʼ stubeʼ. De guiráʼ ladu reeda ganna ca xhamiguaʼ naa. Nga runi, nabé ridxagayaa ca binni runi dxiiñaʼ ra nuaaʼ riʼ. Guiráʼ dxi rudieeʼ xquíxepeʼ Jiobá purtiʼ cudii lugar nuaaʼ ndaaniʼ xquidxi.

«CUDXIEELUAʼRUAʼ»

Ora guinabadiidxaʼ tuuxa naa ximodo nuaaʼ, ricabeʼ laa: «Pue, cudxieeluaʼruaʼ». Nannaʼ cadi naasiaʼ napaʼ guendanagana. Intiica si guendanagana cadxaagalunu, guiráʼ ca xpinni Cristu naquiiñeʼ gudxiilucaʼ pur ni runi crecaʼ (1 Timoteo 6:12). Xi huayacané naa guiráʼ ca iza riʼ ti ganda guneʼ huantar yaʼ. Guiráʼ dxi runeʼ orar Jiobá para gudieeʼ xquixe laa purtiʼ maʼ nannaʼ xi pur nabaneʼ. Runeʼ stipa pur cadi gusaanaʼ de guneʼ xhiiñaʼ Dios, sin gusaanaʼ de guicá luaʼ ni chigudiibe laanu.

José María

Guiráʼ ora riníʼ iqueʼ Paraísu ni chichuu ndaaniʼ Guidxilayú riʼ ne pabiáʼ galán zuneʼ sentir ora guxooñeʼ ne guichesaʼ sti biaje. Nuu tiru riguiteniáʼ xhamiguaʼ José María, laa huará de poliomielitis. Rinabadiidxaʼ laabe tu laa ñuni ganar pa niguítedu ti carrera. Laabe ricábibe naa: «Tutiica guni ganar, ni jma risaca nga guxóʼñenu ndaaniʼ Paraísu».

Raca nagana para naa guiníʼ iqueʼ dxandíʼ ni bizaacaʼ riʼ. Nannaʼ bineʼ ti guendahuati dxi nahuiineʼ ne pur nga nuaaʼ sicaríʼ. Rudieeʼ xquíxepeʼ Jiobá purtiʼ qué huasaana naa. Huadiibe naa stale bicheʼ ne bizanaʼ, huayacanebe naa chuuladxeʼ guibaneʼ, gacaniáʼ xcaadxi binni ne guiníʼ iqueʼ ni chigudiibe naa despué. Pa ñaca nuyubeʼ chupa chonna diidxaʼ si para niniéʼ ximodo runeʼ sentir la? ñanda niniéʼ maʼ bidii Jiobá naa jma de ni caquiiñeʼ guicaaʼ.