Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA | ÑEE ZABANI BINNI DESPUÉ DE MAʼ GUTI LA?

Xiñee zanda guni crenu ziasa cani maʼ guti

Xiñee zanda guni crenu ziasa cani maʼ guti

Nuu tu na ti guendahuati nga guni crenu ziasa gueʼtuʼ. Peru apóstol Pablu qué niníʼ ique zacá, laa guníʼ: «Ne pa nicá lú nu Cristu para ndaani guidxilayú ri si la? ñaana nu jma triste lade irá binni. Peru ndi nga laani: dxandí bibani Cristu de lade gueʼtuʼ, ne nirudóʼ laabe biasa be lade irá xixé cani ma guti» (1 Corintios 15:19, 20). Xiñee biʼniʼ cré Pablu dxandíʼ ziasa cani maʼ guti yaʼ. Purtiʼ nánnabe maʼ biasa Jesús de lade gueʼtuʼ (Hechos 17:31). * Ngue runi, Pablu guníʼ «nirudóʼ» biasa Jesús «lade irá xixé cani ma guti». Nga runi, pa primé Jesús nga biasa de lade gueʼtuʼ la? zanda guiníʼ íquenu ziuuruʼ tu ziasa.

Gudxi Job Dios: «Guizáʼ zápaluʼ gana gúʼyaluʼ ni bizaʼluʼ» (Job 14:14, 15)

Nuu sti razón para guni crenu ziasa cani maʼ guti: Jiobá, Dios ni dxandíʼ «qué rusiguii» (Tito 1:2). Qué huayuu dxi gusiguiibe ne qué ziuu dxi gúnibe ni. Nga runi, ñee raʼbuʼ zudii stiidxaʼ si Dios guindisaʼ cani maʼ guti ne gusihuínnibe nápabe poder para gúnibe ni, peru despué maʼ qué gúnibe ni la? Coʼ.

Cumu nadxii Jiobá binni la? maʼ gudixhe ique guindisaʼ cani maʼ guti. Sicaríʼ gunabadiidxaʼ Job: «Pa gatiʼ ti hombre, ñee zanda guibánibe sti biaje la? [...] Lii zucaa riʼdxuʼ, ne naa zacabeʼ lii. Guizáʼ zápaluʼ gana gúʼyaluʼ ni bizaʼluʼ» (Job 14:14, 15). Biʼniʼ cré Job guizáʼ napa Bixhoze ni nuu guibáʼ gana guindisaʼ laa de lade gueʼtuʼ. Ñee dede yanna napa Jiobá gana guni nga la? Biblia na: «Naa nga Jiobá; ne qué huachaadiáʼ modo naa» (Malaquías 3:6). Dede yanna napa Dios gana guindisaʼ cani maʼ guti ti guibánicaʼ nayecheʼ. Ngaca nga ni racalaʼdxiʼ tuuxa ni maʼ guti xiiñiʼ. Ni galán nga cadi racalaʼdxiʼ si Dios guni ni,  sínuque nápabe poder para gúnibe ni (Salmo 135:6).

Nabé naroʼbaʼ yuubaʼ rapa binni ora gatiʼ binnilidxi, peru Dios zandisaʼ laacabe

Zudii Jiobá poder Xiiñiʼ para gusibani cani maʼ guti, ne nga zusiecheʼ guiráʼ cani maʼ guti ti binnilidxi. Ne Jesús laaca racalaʼdxiʼ guni ni. Ximodo nánnanu ni yaʼ. Biblia na ante guindisaʼ Jesús Lázaro, xhamigu, «biina» ora biʼyaʼ pabiáʼ naná yuubaʼ cadiʼdiʼ ca bizaʼnaʼ Lázaro ne ca xhamigu (Juan 11:35). Sti biaje ora biʼyaʼ Jesús ti viuda gutiʼ tobi lucha xiiñiʼ «biá be laa ne rabi be Iaa: Cadi guʼna luʼ». Ne oraqueca bisibánibe hombrehuiiniʼ que (Lucas 7:13). Lu guiropaʼ relatu riʼ rihuinni pabiáʼ riuubaʼ ladxidóʼ Jesús ora gatiʼ tuuxa. Nga runi, ¡guizáʼ ziéchebe guindísabe cani maʼ guti ti gacanebe binni chuʼ nayecheʼ!

Ñee maʼ guti ti binni ni nadxiiluʼ la? Zándaca guiníʼ íqueluʼ maʼ gastiʼ qué zanda gaca. Peru cadi zacá diʼ nga laani: zaquiiñeʼ Dios Xiiñiʼ para guindisaʼ cani maʼ guti. Bietenalaʼdxiʼ racalaʼdxiʼ Dios chuʼluʼ racá para guidxaagaluluʼ ca binni ni nadxiiluʼ. Bixuiʼlú nuuneluʼ laacabe caguíxhetu xi guiráʼ chigúnitu despué, ra maʼ qué ziuu dxi gátitu.

Sicaríʼ guníʼ Lionel, hombre bizéʼtenu ra bizulú primé tema stiʼ revista riʼ: «Ora guyuu tu gudxi naa ziasa cani maʼ guti, guizáʼ nagana guca para naa guneʼ cré ne guníʼ iqueʼ caguítecabe naa. Peru despué biiyaʼ lu Biblia dxandíʼ ni. ¡Nabé maʼ napaʼ gana guuyaʼ bixhozebiidaʼ!».

Ñuulaʼdxuʼ ñánnaluʼ jma la? Ziuulaʼdxiʼ ca testigu stiʼ Jiobá guluiʼcaʼ lii né Biblia xi racané laacaʼ guni crecaʼ dxandíʼ ziasa cani maʼ guti. *

^ párrafo 3 Lu revista Torre stiʼ ni rapa 1 stiʼ marzo 2013 yaza 3 dede 5 cayeeteʼ dxandíʼ biasa Jesús de lade gueʼtuʼ.

^ párrafo 9 Biiyaʼ capítulo 7 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá. Laaca nuuni lu sitiu