Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA | ÑEE ZABANI BINNI DESPUÉ DE MAʼ GUTI LA?

Ñee riluxe guiráʼ ni ora gatiʼ binni la?

Ñee riluxe guiráʼ ni ora gatiʼ binni la?

Ñee zabani cani maʼ guti sti biaje la?

NI RUSIIDIʼ BIBLIA: «Zadxiña dxi guna diaga irá cani nuu ndaani baʼ stidxi [Jesús], ne zaree caʼ.» (Juan 5:28, 29.)

Jesucristu maca guníʼ dxi guni mandar maʼ nin ti gueʼtuʼ qué ziaana ndaaniʼ baʼ. Sicaríʼ guníʼ Fernando, hombre bizéʼtenu lu tema gudídinu ca: «Guizáʼ bidxagayaaʼ ora biindaʼ Juan 5:28, 29. Bidieeʼ cuenta dxandíʼ zaca ni na ca diidxaʼ ca, ne bichaa modo riníʼ iqueʼ de ni raca binni ora maʼ guti».

Job, ti patriarca ni bizuubaʼ stiidxaʼ Dios, biʼniʼ cré zadxiña dxi zandisaʼ Dios laa de lade gueʼtuʼ. Job gunabadiidxaʼ: «Pa gatiʼ ti hombre, ñee zanda guibánibe sti biaje la?». Ne laca laabe guniʼbe: «Zabezaʼ biaʼ dxi caquiiñeʼ cuezaʼ [ndaaniʼ baʼ], dede ora guiasaʼ. Lii zucaa riʼdxuʼ, ne naa zacabeʼ lii» (Job 14:14, 15).

Ra biasa Lázaro bihuinni nuuruʼ tu ziasa de lade gueʼtuʼ

Maca nanna Marta, bizaʼnaʼ Lázaro, zadxiña dxi guiasa cani maʼ guti. Guti si Lázaro, gudxi Jesús laabe: «Zabani bizaʼna luʼ». Óraque bicabi Marta laabe: «Nanna zabani be dxi iluxe guidxilayú, ra ibani irá binni». Para na Jesús rabi laabe: «Naa nga rusibane gueʼtuʼ, ne naa nga rudiee enda nabani. Tu guni cre naa la? neca ma guti zabani» (Juan 11:23-25). Guca si ngue, bisibani Jesús Lázaro. Relatu riʼ racané laanu guxuíʼlunu xi chigaca despué. ¡Nabé sicarú zuni sentirnu ora guidúʼyanu guiasa millón binni lu guidubi Guidxilayú!

Ñee ziuu tu guibani para cheʼ guibáʼ la?

NI RUSIIDIʼ BIBLIA: Stiidxaʼ Dios rusihuinni gadxé modo biasa Jesucristu de lade gueʼtuʼ de xhono binni ni ruzeeteʼ ni bibani sti biaje. Xiñee yaʼ. Purtiʼ xhono binni ni rieeteʼ ca biásacaʼ ne bibánicaʼ lu Guidxilayú riʼ. Peru Biblia ruzeeteʼ ximodo biasa Jesucristu de lade gueʼtuʼ: «Nuu Cristu ibáʼ zuba cueʼ Dios» (1 Pedro 3:21, 22). Ñee Jesucristu si nga zabani para cheʼ guibáʼ la? Ante gátibe maca gúdxibe ca discípulo stibe: «Ora ma uyaa ne ma bine chaahue [ti lugar] la? zabigueta gueda caa laatu, ti ra chuaa la? laca chuʼ tu» (Juan 14:3).

Guyé Jesucristu guibáʼ yeguni chaahuiʼ ti lugar para caadxi de ca discípulo stiʼ. Biblia na  144,000 binni nga cheʼ guibáʼ (Apocalipsis 14:1, 3). Peru, xi chiguni ca xpinni Cristu riʼ racá yaʼ.

Stale cosa nga chigúnicabe. Biblia na: «Dichoso cani ibani primé que. Ma bia ladxidóʼ caʼ. Ma qué zanda guniná rairopa enda guti laacabe, sínuque zaca cabe sacerdote para guni cabe xhiiña Dios ne xhiiña Cristu, ne zuni mandar né cabe laa ti mil iza» (Apocalipsis 20:6). Guirácabe zácacabe rey ne sacerdote, ne zuni mandarnécabe Jesús lu guidubi Guidxilayú.

Ñee nuu tu ziasa para guibani lu Guidxilayú la?

NI RUSIIDIʼ BIBLIA: Lu Stiidxaʼ Dios zeeda caadxi diidxaʼ guníʼ apóstol Pablu: «Naa rune cre zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ. Ne nga ca runi cre cabe» (Hechos 24:15).

Biblia cayabi laanu ziasa mil millón binni de lade gueʼtuʼ

Tuu nga cani «nachaʼhui» ca yaʼ. Guininu de Daniel, ti hombre biʼniʼ ni jneza. Gúcabe ti profeta biʼniʼ ni na Dios ne dxi mayaca gátibe, gudxi Dios laabe: «Zaziiláʼdxiluʼ, peru ziásaluʼ para guicaaluʼ ni maʼ nexheʼ guicaaluʼ ora maʼ guiluxe ca dxi ca» (Daniel 12:13). Paraa guibani Daniel ora guiasa yaʼ. Biblia na: «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (Salmo 37:29). Jesús laaca guníʼ: «Dichoso ni nadóʼ purti zudii Dios laaca guidxilayú» (Mateo 5:5). Daniel ne xcaadxi xpinni Dios ziásacaʼ de lade gueʼtuʼ ne zanda guibánicaʼ lu Guidxilayú sin gáticaʼ.

Yanna, tuu nga cani «cadi nachaʼhuiʼ» ca yaʼ. Laacabe nga ca mil millón de binni ni gutiʼ sin ñanna xi rusiidiʼ Biblia ne qué ñúnicaʼ ni nani. Ora guiásacabe de lade gueʼtuʼ zaziidicabe tuu nga Jiobá * ne Jesucristu, ne zanda gannaxhiicabe laacaʼ (Juan 17:3). Cani quixhe ique guni ni na Dios zabánicaʼ sin gáticaʼ.

Ca binni quixhe ique guni ni na Dios zanda guibánicaʼ nayecheʼ sin gáticaʼ

Ximodo zabani binni lu Guidxilayú

NI RUSIIDIʼ BIBLIA: «Zuchaa [Dios] nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ.» (Apocalipsis 21:4.) «Zucuícabe yoo ne zabézacabe ndaaniʼ ni ne zudxiibacabe lubáʼ uva ne zócabe cuananaxhi stini.» (Isaías 65:21.)

¡Bixuiʼlú guibániluʼ zacá ne ca binni ni nadxiiluʼ! Peru nuuruʼ sti guendarinabadiidxaʼ ni zacábinu: Xi razón nápanu para guni crenu ziasa cani maʼ guti yaʼ.