Modo bibani binni tiempu guyuu ca primé xpinni Cristu

Ca dxiiñaʼ ni raca ndaaniʼ yoo

«De raqué biree Jesús zeʼ, yendá ti guidxi huiiniʼ, xquidxi ti gunaa lá Marta. Ne bini invitar Marta laabe che be ralidxi. Napa Marta ti benda lá María, ne gurí María xañee be cucaa diaga. Peru Marta la? nisi canaree xieque raqué, tantu cá ique xhiiñaʼ. Para bidxiña ra nuu be ne na rabi laabe: Señor, ñee nouʼ jneza cayuni bendaʼ, cudii lugar cayune irá ndi stube la? Gudxi laabe gueda acané be naa. Ah Marta, Marta, rabi be laa. Aque stale ni naguu xaíque luʼ, ne nuu lu xizaa pur laa. Peru tobi si nga ni naquiiñe uyubi binni ne María ma ulí ni jma risaca. Ne iruti zaxha ni laa.» (LUCAS 10:38-42)

RIHUINNI dxíchica guca Marta ti gunaa ni nabé runi dxiiñaʼ. Ne zándaca nabé guyuulaʼdxiʼ ca judíu que modo laabe, purtiʼ gúpacaʼ costumbre de gusisácacaʼ ca gunaa ni ruuyaʼ familia stiʼ ne ni runi tender guiráʼ dxiiñaʼ napa ralidxi.

Ca gunaa xpinni Cristu que laaca bíʼnicaʼ «xhiiña ca jneza» (Tito 2:5). Peru laaca gucuaa ca gunaa que sti dxiiñaʼ jma risaca aparte de cani maca rúnicaʼ, laani nga gusiidicaʼ binni ni runi crecaʼ (Mateo 28:19, 20; Hechos 2:18). Gunáʼ nga caadxi de ca dxiiñaʼ ni biʼniʼ ca gunaa judía ni bibani lu primé siglu  que yaʼ. Ne xi rizíʼdinu de conseju bidii Jesús Marta.

Guiráʼ dxiiñaʼ rúnicabe Ca gunaa judía que ruzulucaʼ dxiiñaʼ sticaʼ ante guirá gueelaʼ (Proverbios 31:15). Primeru la? rugaaguícabe caadxi harina para guené familia stícabe, de raqué maʼ risaanacabe ca hombrehuiiniʼ stícabe ra scuela ni nuu ndaaniʼ ca sinagoga que. Ca dxaapahuiiniʼ stícabe riaanacaʼ para guiziidicaʼ gúnicaʼ guiráʼ dxiiñaʼ raca ndaaniʼ yoo para ora guidxiña dxi guichaganacaʼ.

Ca gunaa que ne ca dxaapahuiiniʼ sticaʼ rúnicaʼ guiráʼ ca dxiiñaʼ que juntu. Primé la? rigaacabe aceite ndaaniʼ ca lámpara que (1), runduubacabe lu pisu (2) ne ruxhiicabe ca chiva que (3). Despué maʼ rúnicabe pan. Para gácani la? riguibi ca dxaapahuiiniʼ que ca biidxiʼ que (4), de raqué maʼ riquiiñecabe ti molinu de manu para gúʼtucabe ca biidxiʼ que dede gácani harina raayaʼ (5). Ora maʼ guca nga maʼ rigaa jñaacabe nisa lu harina que ne riguu levadura luni. Óraque maʼ ruguuchanabe cuba que (6) ne últimu la? rusaanabe ni para guiasa ni laga gúnibe xcaadxi dxiiñaʼ. Xi runi ca dxaapahuiiniʼ que óraque yaʼ. Rusábacabe cuaju lu leche yaa stiʼ chiva para gaca quesu o ruchaahuicabe leche que para gaca mantequiá (7).

Ante ganda galaa dxi, riné jñaa ca dxaapahuiiniʼ que laacaʼ luguiaa. Cásipeʼ guiuucabe raqué riuuxiicabe modo rindáʼ naxhi guiráʼ guixi guendaró ridoo raqué, ruuyacabe ca maniʼ cadoo raqué ne runadiágacabe ora maʼ canabaʼ ca binni ni cazíʼ que guieeteʼ lu sticaʼ. Raqué rizíʼcabe guendaró ni zaquiiñecabe guidubi dxi (8), lade cani nuu verdura ne benda bidxi. Pa xpinni Cristu gunaa que la? zuyúbibe modo guiníʼnebe ca vecinu stibe de ni runi crebe (Hechos 17:17).

Ca gunaa ni runi adorar Dios que zándaca rusiidicaʼ ca dxaapahuiiniʼ sticaʼ ca conseju galán ni zeeda lu Stiidxaʼ Dios ora maʼ zecaʼ ne ora maʼ zeedacaʼ de luguiaa (Deuteronomio 6:6, 7). Ne laaca rusiidicabe laacaʼ modo sicaʼ ti gánnacaʼ ximodo gúnicaʼ ni (Proverbios 31:14, 18).

Stobi de ca dxiiñaʼ runi ca gunaa que nga checaʼ ra bizé (9), raqué ridxaagacabe ca vecina stícabe ne ribeecabe nisa para iquiiñeʼ binnilídxicabe. Ora maʼ guiuucabe yoo la? laacabe ne ca dxaapahuiiniʼ stícabe rugaaguicabe pan. Rúnicabe caadxi torta huiiniʼ nabata ne despué maʼ riguucabe cani ndaaniʼ ti horno ndaʼ (10), ni nuu fuera de ndaaniʼ lídxicabe. Laga cabézacabe gaguiʼ ca pan que la? nayecheʼ riuucabe ora maʼ cayuíʼcabe diidxaʼ ne riuuxiicabe modo rindáʼ naxhi ca pan ni cayaʼguiʼ que.

Jma maʼ huadxí que riécabe ra guiiguʼ para quíʼbicabe lari (11). Primeru riguiibicabe ca lari que ne ti xabú de carbunatu de sodio o de potasio ni raca né dé stiʼ caadxi guixi. Despué maʼ ruzaanísacabe ca lari que, ruxhiicabe cani, ne últimu la? ruchiaacabe cani lu caadxi yagahuiiniʼ o lu ca guié nuu gaxha nuu gaxha de raqué.

 Ora guibiguétacabe ralídxicabe, ca gunaa que ne ca dxaapahuiiniʼ sticaʼ riguíʼbanecaʼ ca lari biaʼriʼ que ique yoo para guni chaahuicaʼ cani gureza (12) ante cuʼ chaahuicabe cani. Guiluxesícabe dxiiñaʼ que maʼ randa ora para gusiidicabe ca dxaapahuiiniʼ que gúnicaʼ lari ne quíbacaʼ (13). De raqué maʼ redandá hora gúnicabe guendaroxhi, ne riguíxhecabe pan, verdura, quesu, benda bidxi ne rúnicabe nagaʼndaʼ o nisa gaʼndaʼ (14). Cumu nabé riuulaʼdxiʼ ca binni que chigánnacabe laacaʼ la? ngue runi qué riaadxaʼ biuuzaʼ ruaa mexaʼ sticaʼ.

Nin bixhinni maca nanna ca baʼduʼ que maʼ naquiiñeʼ chigásicaʼ. Peru pa gucaná xibi tobi de laacabe la? zándaca naquiiñeʼ guixubi ni ti ndaa pomada. De raqué maʼ riquiiñecabe biaaniʼ stiʼ ti lámpara para guʼndanécabe ca xiiñicabe xiixa relatu zeeda lu Stiidxaʼ Dios ne guni orarnécabe laacaʼ. Ora maʼ biluxe dxi ca la? hombre ca maʼ biiyaʼ guiráʼ dxiiñaʼ maʼ biʼniʼ xheelaʼ, nga runi napa stale razón para gabi laabe ca diidxaʼ riʼ: «Ti gunaa nuu xpiaaniʼ, tu zanda guidxela laabe. Risácabe jma que ca coral ca» (Proverbios 31:10).

«Ni jma risaca» Casi maʼ bidúʼyanu ca, nabé stale dxiiñaʼ nga biʼniʼ ca gunaa bibani lu primé siglu que (Lucas 10:40). Ngaca nga ca dxiiñaʼ runi stale gunaa ca dxi stinu riʼ, jmaruʼ si pa nápacabe xiiñicabe. Peru yanna riʼ maʼ nuu stale aparatu ni zanda iquiiñecabe para gúnicabe dxiiñaʼ stícabe jma nagueenda. Neca zaca la? stale gunaa ni napa xiiñiʼ naquiiñeʼ chigúnicaʼ dxiiñaʼ sti ladu para gacanecaʼ familia sticaʼ.

Nécapeʼ stale dxiiñaʼ nga runi ca gunaa xpinni Cristu la? laaca ribeecabe tiempu para gúnicabe xhiiñaʼ Dios, cásica biʼniʼ María, gunaa bizéʼtenu ra bizulú tema riʼ (Mateo 5:3). Ne nabé riguixhe íquecabe gápacabe ca binnilídxicabe casi na Biblia (Proverbios 31:11-31). Peru laaca rúnicabe ni bisiidiʼ Jesús Marta, ora gúdxibe laa risaca nga chuʼ gaxha de Dios, ne nánnanu biʼniʼ Marta ni na conseju bidii Jesús laa que. Ca gunaa xpinni Cristu ruyúbicaʼ ximodo gúnicaʼ ca dxiiñaʼ sticaʼ ndaaniʼ lídxicaʼ, ti cadi cueeni tiempu ni riquiiñecaʼ para guiziidicaʼ de Dios (15) ne gusiidicaʼ binni de ni runi crecaʼ (Mateo 24:14; Hebreos 10:24, 25). Rúnicabe stipa pur cuícabe xii nga «ni jma risaca», cásica biʼniʼ María (Lucas 10:42). Ne pur ni rúnicabe riʼ rannaxhii familia stícabe laacabe, ne laaca rannaxhii Cristu ne Dios laacabe (Proverbios 18:22).