Ñee nannuʼ ni la?

Xi xcaadxi nisa dxuʼniʼ aparte de vinu guyuu tiempu stiʼ ca binni ni ruzeeteʼ Biblia

▪ Ca diidxaʼ «vinu ne licor ni ruxhudxi» nabé rieeteʼ cani lu Biblia (Deuteronomio 14:26; Lucas 1:15). Diidxaʼ licor ni rieeteʼ lu ca textu ca cadi caníʼdini de modo runi binni nisa dxuʼniʼ yanna. Ca nisa dxuʼniʼ ca rúnicabe ni ora rusindaabicabe xiixa biidxiʼ casi cebada ne rusiándacabe gubá stini ti gaca gubá ca nisa dxuʼniʼ. Peru gupa xidé gudiʼdiʼ stale siglu para bidxélacabe modo gácani zacá. Ca tiempu que biʼniʼ binni nisa dxuʼniʼ ra biquiiñeʼ cuananaxhi casi uva, dátil, duʼgaʼ, manzana, granada, o dxiña yaga.

Diidxaʼ hebreu ni rutiixhicabe casi «licor ni ruxhudxi» laaca zanda guiénenu ni casi cerveza. Lu diidxaʼ acadiu nuu ti diidxaʼ casi laani ne riquiiñecabe ni ora ruzeetecabe de cerveza ni guca de cebada lugar ni rábicabe Mesopotamia. Nécapeʼ qué gapa cerveza que stale alcohol la? zanda guxhúdxini binni pa gueʼ xhaataʼ ni (Proverbios 20:1). Binni de xcaadxi lugar laaca nabé güeʼ ni. Ndaaniʼ guidxi Babilonia, güeʼ ca ricu ne ca pobre cerveza; ca filisteu laaca güeʼcaʼ ti nisa dxuʼniʼ casi laani. Ne ndaaniʼ caadxi baʼ yooxhoʼ stiʼ ca egipciu bidxélacabe caadxi arcilla ni bíʼnicabe de caadxi fábrica de cerveza, ne laaca bidxélacabe pintura ra cá caadxi binni ni cayuni cerveza. Ne guidubi lugar ni runibiáʼcabe casi Palestina laaca maʼ bidxélacabe caadxi jarra de cerveza ndaaniʼ yú, laacani nápacani ti filtru para cadi gabi binni ca guixi huiiniʼ stiʼ cebada ni riaana ndaaniʼ ni.

Xiñee maca nuusi beeu nga zanda guireenécabe barcu lu nisadóʼ tiempu bibani apóstol Pablu

▪ Ti biaje gudxiʼbaʼ Pablu lu ti barcu ne guyé neza ra riaaziʼ Gubidxa lu nisadóʼ stiʼ Asia Menor. Peru nabé bindaa para yendá barcu que, purtiʼ nabé reciu cundubi ti bi ni bidxaagalúcabe. Pablu gudxi ca binni ni ziné ndaaniʼ barcu que xi zándaca gueeda guizaaca pa guni seguírcabe viaje que, laabe guniʼbe: «Zaniti barcu riʼ ne irá ni dxá ndaaniʼ. Ne cadi nga si, zándaca dede ne laanu». Xiñee yaʼ. Relatu stiʼ Biblia na maʼ naxoo saʼ binni lu nisa purtiʼ «ma bidxiña dxi uzulú tiempu nanda» (Hechos 27:4-10).

Tiempu riaba nanda ca riaana binni sin gó ne ruzuluni ra maʼ ziluxe septiembre o ra ruzulú octubre. Peru xiñee nabé naxoo guiree binni lu nisadóʼ ca dxi que yaʼ. Ca marineru de Roma nánnacaʼ zanda checaʼ lu nisadóʼ dede 27 stiʼ mayo hasta 14 stiʼ septiembre. Peru dede dxi que hasta 11 stiʼ noviembre, jma naxoo para cheʼ binni lu nisa, ne dede 11 stiʼ noviembre hasta 10 stiʼ marzo maʼ guirutiʼ qué runi viaje lu nisadóʼ. Tobi de ca razón que nga purtiʼ nabé nagueenda ruchaa ca tiempu que, zacá rihuínnini lu relatu ra na binitilú barcu ra zeʼ Pablu (Hechos 27:13-44). Ca binni ni guni viaje lu nisa ca beeu que ridxaagalucaʼ bi yooxho ne nisaguié ne rápacaʼ xcaadxi guendanagana. Qué randa diʼ ruuyacabe paladu zécabe purtiʼ ruchii stale za lu Gubidxa ne lu ca beleguí que. Laaca huaxiéʼ ruuyacabe xiixa cosa ni zándaca guidxelasaacabe purtiʼ nabé riaba stale gupa ne nisaguié.

[Dibuju/foto ni zeeda lu yaza 27]

CAADXI BOTELLA DE YAGA NI BIZÁʼ CA EGIPCIU RA BIDAA CERVEZA

[Credit Line 27]

Erich Lessing/Art Resource, NY

[Dibuju/foto ni zeeda lu yaza 27]

BARCU DE ROMA NI RINÉ STALE COSA

[Credit Line 27]

Pictorial Archive (Near Eastern History) Est.