1. 1) Xi guníʼ apóstol Juan naquiiñeʼ gúninu. 2) Xiñee naquiiñeʼ guiníʼ íquenu pabiáʼ nadxii Jiobá laanu.

APÓSTOL Juan guníʼ: «Laguuya si pabiáʼ nadxii Dios laanu dede rabi laanu xiiñiʼ» (1 Juan 3:1). Né ca diidxaʼ riʼ cayabi apóstol ca laanu guiníʼ íquenu pabiáʼ nadxii Jiobá laanu ne ximodo rusihuínnibe ni. Pa guiníʼ íquenu ndiʼ jma zaca xhamígunu Dios ne jma zannaxhiinu laa.

2. Xiñee raca nagana para chupa chonna binni guni crecaʼ nadxii Dios laacaʼ.

² Triste guininu ni, peru nuu binni qué runi cré pa nadxii Jiobá laa. Riníʼ íquecaʼ qué rizaalaʼdxiʼ Dios laacaʼ. Runi crecaʼ riguixhe si Dios ley ne runi castigar cani qué rinanda ca ley stiʼ. Nuu religión rusiidiʼ nabé malu Dios. Nga runi stale binni riníʼ ique qué zanda gannaxhiinu laabe. Peru xcaadxi riníʼ ique nadxii Dios guiráʼ binni neca gúnicaʼ intiica cosa. Peru cumu laanu ridúʼndanu Biblia la? nánnanu ni dxandíʼ de Jiobá. Biblia na laabe nga guendarannaxhii ne pur nga biseendabe Xiiñibe beeda gati pur laanu (Juan 3:16; 1 Juan 4:8). Neca zacá, zándaca gaca nagana para chupa chonna xpinni Jiobá guni crecaʼ nadxiibe laacaʼ. Zándaca guiníʼ  íquecabe zacá pur xiixa ni bizaacacabe.

3. Xiñee zanda guininu nadxii Jiobá laanu.

³ Xiñee zanda guininu nadxii Jiobá laanu yaʼ. Purtiʼ laabe bizaʼbe laanu ne bidiibe laanu guendanabani. Biblia na: «Laganna Jiobá nga Dios. Laabe bizaʼbe laanu, ne cadi laca laanu. Nácanu xpínnibe, ne dendxuʼ ni rápabe» (Salmo 100:3). Nga runi lu Biblia rieeteʼ guca Adán «xiiñi Dios» (Lucas 3:38). Ne ora bisiidiʼ Jesús laanu guni orarnu, bisiidibe Jiobá nga Bixhózenu (Mateo 6:9). Nga runi nadxii Jiobá laanu cásica nadxii ti hombre ca xiiñiʼ.

4. 1) Xiñee zanda guininu Jiobá nga ni jma zanda gaca xhamígunu. 2) Xi zadúʼyanu lu tema riʼ ne lu stobi ca.

⁴ Nuu binni nabé bininá bixhózecaʼ laacaʼ dxi nahuiinicaʼ. Nga runi zándaca gaca nagana para laacabe guiníʼ íquecabe zanda gannaxhii ti hombre ca xiiñiʼ. Peru Jiobá qué ziuu dxi guniná laanu. Laabe nga binni ni jma zanda gaca Bixhózenu (Salmo 27:10). Nabé nadxiibe laanu ne rápabe laanu de stale modo. Ne ora guni sentirnu nadxiibe laanu jma la? jma zannaxhiinu laabe (Santiago 4:8). Lu tema riʼ zadúʼyanu tapa modo rusihuinni Jiobá nadxii laanu. Ne lu sti tema ca zadúʼyanu tapa modo zanda gusihuínninu nadxiinu laabe.

5. Xi rudii Jiobá laanu.

⁵ Ti biaje guyé apóstol Pablu ndaaniʼ guidxi Atenas. Biiyabe napa ca binni que stale bidóʼ ne runi crecaʼ ca dios sticaʼ nga rudii laacaʼ guendanabani. Nga runi Pablu guníʼ «bizáʼ [Jiobá] guidxilayú ne irá ni nuu ndaani ni». Ne laaca nabe «rudii [Dios] laanu enda nabani ne irá ni caquiʼñe nu» ne «pur laabe nabani nu ne rizá nu» (Hechos 17:24, 25, 28). Jiobá rudii laanu guiráʼ ni caquiiñenu para guibáninu ne chuʼnu nayecheʼ. Guidúʼyanu caadxi de ca cosa ni maʼ bidiibe laanu purtiʼ nadxiibe laanu.

6. Ximodo nga lugar bidii Jiobá laanu para guibáninu. (Biiyaʼ foto ni zeeda ra ruzulú tema riʼ.)

⁶ Bizáʼ Jiobá ti lugar guizáʼ galán para guibáninu (Salmo 115:15, 16). De guiráʼ planeta ni bizaʼbe, Guidxilayú riʼ nga biáʼsipeʼ para guibani binni lu. Ca científicu ca maʼ bidxélacaʼ stale planeta lu espaciu. Peru qué huadxélacabe nin tobi ni gapa guiráʼ ni caquiiñeʼ binni para guibani. Bizáʼ Jiobá Guidxilayú riʼ ne guiráʼ ni caquiiñenu para guibáninu, peru laaca bíʼnibe ni para gácani ti lugar sicarú, guibani binni galán luni, ra guirutiʼ guchibi laa ne guibani nayecheʼ (Isaías 45:18). Ora riníʼ íquenu pabiáʼ sicarú Guidxilayú stinu, rudiʼnu cuenta dxandíʼ nadxii Jiobá laanu (Job 38:4, 7). Biblia na: «Ora guuyaʼ guibáʼ stiluʼ, ca dxiiñaʼ ni bizáʼ ca bicuini naluʼ, beeu ne ca beleguí ni bizaʼluʼ, tuu nga binni guidxilayú para guietenalaʼdxuʼ laa, ne tuu nga xiiñiʼ binni guidxilayú para gápaluʼ laa yaʼ» (Salmo 8:3, 4).

7. Xi sti modo maʼ bisihuinni Jiobá nadxii laanu.

⁷ Laaca bisihuinni Jiobá nadxii laanu ra bizáʼ laanu para ganda gusihuínninu ca guenda stiʼ (Génesis 1:27). Nga runi zanda guni sentirnu nadxiibe laanu ne zanda gannaxhiinu laabe. Dios nanna dxandíʼ rusiecheʼ nga laanu, purtiʼ nayecheʼ riuu binni ora runi sentir nadxii jñaa ne bixhoze laa. Ne laaca bisiidiʼ Jesús laanu ziuʼnu nayecheʼ pa chuʼnu gaxha de Jiobá (Mateo 5:3). Biblia na  laabe rudiibe laanu «irá ni usieche laanu» (1 Timoteo 6:17). Rihuinni dxíchicaʼ rudii Jiobá laanu guiráʼ ni caquiiñenu ne nadxii laanu (Salmo 145:16).

8. Xiñee racaláʼdxinu gusiidiʼ Jiobá laanu.

⁸ Ti hombre ni nadxii xiiñiʼ runi stipa pur gusiidiʼ laacabe ti guibánicabe galán. Peru ca dxi stinu riʼ, stale binni ni napa xiiñiʼ qué runi respetarcaʼ ni na Biblia. Nga runi qué zanda gusiidicabe xiiñicabe xipeʼ nga ni jneza ne ni cadi jneza. Nga runi qué ridxela ca xiiñicabe xi gúnicaʼ ne qué ribánicaʼ nayecheʼ (Proverbios 14:12). Peru Jiobá riguu jneza ca xiiñiʼ, purtiʼ laa nga «Dios ni dxandíʼ» (Salmo 31:5). Rusiidibe laanu ni dxandíʼ de laabe ne rábibe laanu ximodo guni adorarnu laabe. Ne laaca rusiidibe laanu ximodo nga jma galán guibáninu. Biblia na: «Biseendaʼ biaaniʼ stiluʼ ne bisiidiʼ naa ni naquiiñeʼ gannaʼ. Laacani gábicani naa xi naquiiñeʼ guneʼ. Chinécani naa lu dani nayá stiluʼ ne ra nuu tabernáculo naroʼbaʼ stiluʼ» (Salmo 43:3). Guidúʼyanu xii nga cani maʼ bisiidiʼ Jiobá laanu ra rusihuinni guizáʼ nadxii laanu.

9, 10. 1) Xiñee rusiidiʼ Jiobá laanu de laa. 2) Xi rusiidiʼ Jiobá de laanu.

⁹ Primé, rusiidiʼ Jiobá laanu caadxi cosa nabé risaca de laa purtiʼ racaláʼdxibe gunibiaʼnu laabe (Santiago 4:8). Nga runi rusiidibe laanu labe o xlabe. Jma stale biaje rieeteʼ labe lu Biblia que sti lá. Laaca rusiidiʼ Jiobá laanu ximodo nga laa. Casi pa guidúʼyanu ca cosa ni maʼ bizaʼbe, zudiʼnu cuenta nuu xpiaanibe ne nápabe stale poder (Romanos 1:20). Ne ora ridúʼndanu Biblia, ridúʼyanu rúnibe ni jneza ne nadxiibe laanu. Ora jma gunibiaʼnu Jiobá, jma ziuʼnu gaxha de laa.

¹⁰ Laaca rusiidiʼ Jiobá laanu caadxi cosa nabé risaca de laanu. Rábibe laanu nuunu lade familia stibe. Ne laaca rusiénebe laanu xi naquiiñeʼ gúninu para chuʼnu tobi si ora gúninu ni nabe. Biblia na ora bizáʼ Jiobá laanu qué nudiibe derechu laanu guininu xii nga ni jneza ne ni cadi jneza (Jeremías 10:23). Laabe nánnabe xii nga ni jma galán para laanu. Nga runi pa guzúʼbanu stiidxabe ne guni respetarnu laabe ziuʼnu nayecheʼ ne zabáninu né guendariuudxí. Ndiʼ nga ti cosa nabé risaca ni maʼ bisiidiʼ Jiobá laanu ne bíʼnibe ni purtiʼ nadxiibe laanu.

11. Xi maʼ bidii stiidxaʼ Jiobá zudii laanu despué.

¹¹ Ti binni ni dxandíʼ nadxii xiiñiʼ riuu xizaa pur modo guibánicabe despué ne racalaʼdxiʼ chúʼcabe nayecheʼ. Peru ni dxandíʼ nga stale binni qué ganna xi zazaaca de laacaʼ despué. Riquiiñecabe guidubi naca xquendanabánicabe para gúnicabe xiixa ni qué risaca (Salmo 90:10). Peru laanu cani rúninu ni na Jiobá rudiʼnu xquíxepeʼ laabe purtiʼ maʼ bisiidibe laanu ximodo guibáninu nayecheʼ yanna ne maʼ bidii stiidxabe laanu zabáninu galán despué.

12. Ximodo gucalaʼdxiʼ Jiobá ñacané Caín ne Baruc.

¹² Ora biiyaʼ Jiobá mayaca guni Caín xiixa cosa malu, gucaláʼdxibe ñacanebe laa. Gúdxibe laa gucueeza guendaridxiichi stiʼ ne guchaa xpiaʼ. Pa gúnibe ni gudxi Jiobá laabe, zaguu ndaayaʼ laabe (Génesis 4:6, 7). Peru Caín qué nulabi laabe ne gupa stale guendanagana (Génesis  4:11-13). Sti dxi, biiyaʼ Jiobá ti xpinni ni láʼ Baruc, maʼ bidxaga ne maʼ gastiʼ gana gapa purtiʼ feu xpiaʼ. Ngue runi gudxi Jiobá laabe naquiiñeʼ guchaabe modo riníʼ íquebe. Baruc biʼniʼ ni gudxi Jiobá laa, ne pur ngue bilá xquendanabani (Jeremías 45:2-5).

13. Xi biziidiʼ ca xpinni Jiobá de dxiqué ora gúpacaʼ guendanagana.

¹³ Jiobá rabi laanu xi gúninu ne rulidxe laanu purtiʼ nadxii laanu. Rulídxebe laanu ora caquiiñeʼ gúnibe ni, peru laaca racanebe laanu gácanu binni nachaʼhuiʼ (Hebreos 12:6). Gucané Jiobá ca xpinni de dxiqué para guchaacaʼ xpiaʼcaʼ. Bidiibe lugar gapa José, Moisés ne David guendanagana naroobaʼ. Ca guendanagana ni gúpacabe que gucanécani laacabe gúnicabe xcaadxi dxiiñaʼ ni bidii Jiobá laacabe despué. Ora ridúʼndanu lu Biblia racané Jiobá ca xpinni guchaacaʼ modo laacaʼ, ridúʼyanu pabiáʼ nadxiibe laanu. Biblia na: «Guendarulidxi stiʼ Jiobá, xiiñehuiineʼ, cadi gudxiidécheluʼ; ne cadi guixhacaláʼdxiluʼ ora uguu jnézabe lii. Purtiʼ riguu jneza Jiobá ca binni ni nadxii, cásica runi bixhoze binni né ti xiiñiʼ ni rusiecheʼ laa» (Proverbios 3:11, 12).

14. Ximodo rusihuinni Jiobá nadxii laanu ora rucheʼnu.

¹⁴ Ora guchéʼnenu Jiobá, rusihuínnibe nadxiibe laanu pa gudiʼnu lugar gulídxebe laanu. Ximodo rúnibe ni yaʼ. Profeta Isaías guníʼ zutiidilaʼdxiʼ Jiobá «guiráʼ donda» stinu (Isaías 55:7). Ne rey David na Jiobá nga «ni cutiidilaʼdxiʼ guiráʼ ra maʼ bicheeluʼ, ni cusianda guiráʼ  yuubaʼ stiluʼ, ni culá xquendanabániluʼ de ndaaniʼ yu, ni qué rusaana de gannaxhii lii ne rilaselaʼdxiʼ lii» (Salmo 103:3, 4, 12). Racá ridúʼyanu nuuca Jiobá listu para gutiidilaʼdxiʼ guiráʼ stóndanu. Peru naquiiñeʼ gudiʼnu lugar gábibe laanu xi gúninu, gulídxebe laanu ne guchaʼnu modo laanu. Cadi guiaandaʼ laanu rulidxe Jiobá laanu purtiʼ nadxii laanu (Salmo 30:5).

15. Xi sti modo rusihuinni Jiobá nadxii laanu.

¹⁵ Ti hombre ni nadxii xiiñiʼ rulá laacabe ora nuu xquendanabánicabe ra naxoo. Ne ngapeʼ nga ni runi Jiobá né laanu. Salmo 97:10 na rapa Jiobá ca xpinni ni ruzuubaʼ diidxaʼ ne rulabe laacaʼ de lu naʼ binni qué iquiiñeʼ. Guníʼ ique ndiʼ. Ora ridúʼyanu nuu xiixa ni zanda guniná bezalunu, nagueendaca ruseegunu cani. Zaqueca nga runi Jiobá, nagueendaca rulabe laanu ora nuu xiixa ni zanda guniná laanu. Rúnibe ni purtiʼ nadxiibe laanu. Biblia na: «Purtiʼ ndiʼ nga ni guníʼ Jiobá xaíque stiʼ guiráʼ ángel: “Para guisaca labe nga biseendabe naa ca guidxi ni raxha laatu guiráʼ ni nápatu; ni cagaʼnaʼ laatu cagaʼnaʼ guié bezaluaʼ[”]» (Zacarías 2:8).

16, 17. Ximodo rapa Jiobá ca xpinni.

¹⁶ Nabé riquiiñeʼ Jiobá ca ángel stiʼ para gapa ca xpinni (Salmo 91:11). Ti gueelaʼ biquiiñebe ti ángel si stibe para biiti 185,000 soldadu para bilabe xquídxibe (2 Reyes 19:35). Ca dxi bibani ca primé xpinni Cristu, gulee ca ángel Pedru ne xcaadxi xpinni Cristu de ndaaniʼ lidxi guiibaʼ (Hechos 5:18-20; 12:6-11). Cadi xadxí guca ti guerra ndaaniʼ tobi de ca guidxi stiʼ África. Lu guidubi guidxi que gudíndecabe, guláʼnacabe, gulaxoocabe ne biiticabe binni. Neca qué ñati nin ti Testigu, stale de laacaʼ biníticaʼ guiráʼ ni nápacaʼ. Neca zaqué biʼniʼ sentírcabe cayapa Jiobá laacabe. Neca nabé gucanácabe peru guyuucabe nayecheʼ. Ora yeganna ti hermanu de Betel stiʼ Brooklyn laacabe, gunabadiidxaʼ laacabe ximodo nuucabe. Laacabe guníʼcabe nuucabe galán xquíxepeʼ Jiobá.

¹⁷ Dxandíʼ, chupa chonna xpinni Dios maʼ guti purtiʼ qué ninacaʼ nucheenecaʼ laabe. Nga nga ni bizaaca discípulo Esteban ne xcaadxi xpinni Cristu. Nga runi cadi guiráʼ diʼ ora rulá Jiobá ca xpinni. Peru rapa Jiobá laacabe casi grupu ora riguixhená laacabe de ca trampa stiʼ Binidxabaʼ (Efesios 6:10-12). Riquiiñeʼ Jiobá Biblia ne ca libru ne ca revista ni ribee xquídxibe para quixhenabe laanu. Riguixhená Jiobá laanu de ca cosa malu ni nuu lu Internet, casi ca película, libru ne videujuegu ra rihuinni nexhenécabe tuuxa, ra ridíndecabe ne gannaxhiinu bidxichi. Rihuinni dxíchica nadxii Jiobá laanu ne racalaʼdxiʼ gapa laanu.

18. Xi runi sentirnu ora gánnanu nadxii Jiobá laanu.

¹⁸ Ora guníʼ ique Moisés guiráʼ iza biʼniʼ ni na Jiobá, gunna dxíchibe nadxii Dios laabe. Nga runi nabe: «Guiráʼ siadóʼ bisihuinni nadxiiluʼ laadu ti gúʼndadu ne chuʼdu nayecheʼ guiráʼ dxi» (Salmo 90:14). Guietenaláʼdxinu ca diidxaʼ guníʼ apóstol Juan: «Laguuya si pabiáʼ nadxii Dios laanu dede rabi laanu xiiñiʼ» (1 Juan 3:1). Cadi dxandíʼ ti ndaayaʼ naroʼbaʼ nga gánnanu ne guni sentirnu nadxii Jiobá laanu la?