Biiyaʼ guiraʼ ni nuu lu sitiu riʼ

guyé lu índice

«Lauzuhuaa chaahui lu ni runi cre tu»

«Lauzuhuaa chaahui lu ni runi cre tu»

«Lauzuhuaa chaahui lu ni runi cre tu.» (1 CORINTIOS 16:13)

DIIDXAʼ RIUUNDAʼ: 23 NE 34

1. 1) Xi bizaaca Pedru ora gunaaze ti nisaguié naroʼbaʼ ne ti bi yooxhoʼ laacaʼ lu nisadóʼ stiʼ Galilea. (Biiyaʼ dibuju ni zeeda ra ruzulú tema riʼ.) 2) Xiñee bizulú biaaziʼ Pedru yaʼ.

TI GUEELAʼ zeʼ Pedru ne xcaadxi discípulo stiʼ Jesús ndaaniʼ ti barcu lu nisadó stiʼ Galilea, óraque biaba ti nisaguié naroʼbaʼ ne ti bi yooxhoʼ. Málasi biiyacabe Jesús zedazá lu nisa que. Pedru gunabadiidxaʼ Jesús pa zanda saʼ lu nisa que casi cayúnibe ni. Jesús gudxi laabe zanda. Ngue runi biree Pedru ndaaniʼ barcu que ne bizulú guzá lu nisa casi cayuni Jesús. Peru despué de bidiibe chupa chonna pasu, bizulú biaazibe. Xiñee yaʼ. Purtiʼ biiyabe nisaguié naroʼbaʼ ne bi yooxhoʼ que ne bidxíbibe. Óraque gúdxibe Jesús gacané laabe. Gudapi Jesús nabe ne gudxi laabe: «Aque huaxiéʼ fe napu xa. Xiñee bidxibi lu, hombre» (Mateo 14:24-32).

2. Xi zadúʼyanu lu tema riʼ.

2 Lu tema riʼ zadúʼyanu chonna cosa ni zanda guizíʼdinu de ni bizaaca Pedru. Primé, ximodo bisihuínnibe nápabe fe zacané Jiobá laabe. Guiropa, xiñee bizulú birá fe stibe. Ne guionna, ximodo gúpabe fe sti biaje. Gánnanu guionnaʼ cosa riʼ zacané ni laanu iguidxi fe stinu (1 Corintios 16:13).

 GÁPANU FE JIOBÁ

3. 1) Xiñee biree Pedru de ndaaniʼ barcu que ne guzá lu nisa. 2) Laanu ca xpinni Cristu, xi maʼ bíninu cásica biʼniʼ Pedru.

3 Ora bicaa Jesús ridxi Pedru bireeca de ndaaniʼ barcu ne guzá lu nisa que. Xiñee bíʼnibe ni yaʼ. Purtiʼ gúpabe fe zacané Jiobá laabe cásica gucané Jesús. Ca xpinni Cristu maʼ bíʼninu cásica biʼniʼ Pedru. Ora bizíʼdinu lu Biblia cayuni invitar Jesús laanu gácanu discípulo stiʼ, bidiinu xquendanabáninu Jiobá ne guyuunísanu. Xiñee yaʼ. Purtiʼ biʼniʼ crenu de guidubi ladxidoʼno zacané Jiobá ne Jesús laanu (Juan 14:1; biindaʼ 1 Pedro 2:21).

4, 5. Xiñee nabé risaca gápanu fe.

4 Nabé risaca gápanu fe purtiʼ racané ni laanu gúninu cosa ni ruluíʼ qué zanda gúninu (Mateo 21:21, 22). Casi Pedru gunda guzá lu nisa que pur fe ni gupa. Laanu laaca huayúninu cosa nabé nagana pur fe ni nápanu. Stale de laanu huchaanu modo laanu. Ne ca binni ni binibiáʼ laanu dxiqué rudiicaʼ cuenta maʼ gadxé laanu. Bichaanu modo laanu purtiʼ nadxiinu Jiobá ne purtiʼ gucanebe laanu gúninu ni (biindaʼ Colosenses 3:5-10). Ne pur fe ni nápanu bidiinu xquendanabáninu Jiobá ne guca xhamígunu laabe. Qué ñanda diʼ ñúninu gastiʼ pa qué ñacané Dios laanu (Efesios 2:8).

5 Nabé risaca gápanu fe purtiʼ rudiini laanu stipa para gudxiilunu Binidxabaʼ ne cadi guiábanu lu trampa stiʼ purtiʼ laa nabé nadipaʼ (Efesios 6:16). Ne laaca racané fe stinu laanu gudxiilunu ca guendanagana gápanu. Jiobá maʼ gudxi laanu pa gápanu fe laa ne quixhe íquenu gúninu ni na, zudii laanu guiráʼ ni caquiiñenu (Mateo 6:30-34). Ne pa nápanu fe, zudiibe lugar laanu gápanu ti guendanabani ni qué zaluxe ndaaniʼ Paraísu (Juan 3:16).

CADI GUSAANA DE GÁPANU FE

6, 7. 1) Xi zanda guchaaganu bi yooxhoʼ ne ca ola ni biasa lu nisadóʼ ni bichibi Pedru que yaʼ. 2) Xiñee nánnanu tutiica de laanu zanda guirá fe stiʼ.

6 Guzéʼtenu de Pedru sti biaje. Xiñee bidxíbibe laga zizabe lu nisa que yaʼ. Biblia na bisaana de ñuuyadxibe Jesús ne biiyabe nisaguié ne bi yooxhoʼ que (Mateo 14:30). Óraque birá fe stibe ne biaazibe. Bi yooxhoʼ ne ca ola ni biasa lu nisadóʼ que zeeda gácacani ca guendanagana ni ridxaagalunu guiráʼ dxi. Neca nabé naroobaʼ gaca ca guendanagana riʼ, zanda gudii Jiobá laanu stipa para guni huantarnu cani. Peru pa jma guicá íquenu ca guendanagana stinu zará fe ni nápanu ne maʼ qué zuni crenu zanda gacané Jiobá laanu.

7 Tutiica de laanu zanda guiráʼ fe stiʼ. Xiñee nánnanu ni yaʼ. Purtiʼ Biblia na ora riaadxa fe binni qué zaca nagana para laa guchee (Hebreos 12:1). Pa jma guicá íquenu ca guendanagana stinu casi biʼniʼ Pedru, zándaca guirá fe stinu. Ximodo zanda gánnanu pa maʼ cará fe stinu yaʼ. Guidúʼyanu caadxi guendarinabadiidxaʼ ni zanda gacané laanu gánnanu ni.

8. Xi zanda gucaa laanu gusaana de gápanu fe lu cani maʼ bizabiruaa Jiobá.

8 Ñee náparunu fe lu cani maʼ bizabiruaa Jiobá la? Jiobá maʼ bidii stiidxaʼ maʼ cadi candaa zunitilú guidxilayú stiʼ Binidxabaʼ. Peru pa gudiʼnu lugar cubayú ca cosa ni nuu ndaaniʼ guidxilayú riʼ laanu, zándaca gusaana de gápanu fe o zándaca maʼ qué zuni crenu pa mayaca gueeda fin (Habacuc 2:3). Guidúʼyanu sti ejemplu. Jiobá laaca maʼ bidii stiidxaʼ gutiidilaʼdxiʼ ca donda stinu pur guendaguti stiʼ Jesús. Peru pa qué gusaana de guiníʼ íquenu lu ca cosa malu ni bíninu dxiqué, zanda guiníʼ íquenu caʼruʼ gutiidilaʼdxiʼ Jiobá stóndanu (Hechos 3:19). Zacá maʼ qué ziuʼnu nayecheʼ  ora gúninu ni na Jiobá ne gusaana de gucheechenu diidxaʼ.

9. Xi zanda guizaaca pa gudiʼnu lugar chuʼ sti cosa ni jma guisaca lu xquendanabáninu.

9 Ñee rúnirunu ni na Jiobá de guidubi ladxidoʼno la? Gúninu ni na Jiobá biaʼ gándatiʼ racané ni laanu quixhe íquenu ugaandanu guendanabani ni qué zaluxe. Peru xi zándaca guizaaca pa gudiʼnu lugar chuʼ sti cosa ni jma guisaca lu xquendanabáninu yaʼ. Zándaca guicaanu ti dxiñaʼ ra guiáxanu galán peru maʼ qué gúninu ni na Jiobá biaʼ rúninu dxiqué. Ndiʼ zanda gusirá fe stinu ne gusaana de gúninu ni na Jiobá de guidubi ladxidoʼno (Hebreos 6:10-12).

10. Xiñee rininu ora rutiidiláʼdxinu donda stiʼ binni rusihuínninu nápanu fe Jiobá.

10 Ñee raca nagana para laanu gutiidiláʼdxinu donda stiʼ stobi la? Ora sti binni guiníʼ xiixa ni guniná laanu, ñee ridxiichinu ne rusaana de guiníʼnenu laabe la? Pa gúninu zacá, zusihuínninu cuyúbinu para laasinu. Peru pa gutiidiláʼdxinu stonda cani gucheené laanu, zusihínninu nápanu fe Jiobá. Xiñee rininu zacá yaʼ. Nánnanu pa racaláʼdxinu gutiidilaʼdxiʼ Jiobá stóndanu naquiiñeʼ gutiiláʼdxinu stonda binni (Lucas 11:4). Ora rutiidiláʼdxinu donda stiʼ stobi, rusihuínninu runi crenu ziuu Jiobá nayecheʼ né laanu ne zutiilaʼdxiʼ stóndanu. Ne jma risaca nga gutiidiláʼdxinu donda que guquíxenu ni bíʼnicabe laanu. Ne ca discípulo stiʼ Jesús laaca gúnnacaʼ caquiiñeʼ gapa binni fe para gutiidilaʼdxiʼ donda stiʼ stobi. Ngue runi ora gudxi Jesús laacabe gutiidiláʼdxicabe dede ca binni ni maʼ bicheené laacabe stale biaje, gúdxicabe laa: «Bitale fe stidu» (Lucas 17:1-5).

11. Xi cadi naquiiñeʼ gúninu ora gulidxe tuuxa laanu.

11 Ñee ridxiichinu ora gulídxecabe laanu la? Ora tuuxa gulidxe laanu, naquiiñeʼ guidúʼyanu ximodo zacané conseju stibe laanu. Peru pa guidúʼyanu ra cuchee si binni ni cudii conseju laanu ca o qué chuuláʼdxinu ni gábibe laanu, qué zazíʼdinu  gastiʼ (Proverbios 19:20). Jma galán nga gápanu fe ne guidúʼyanu ni cazaaca riʼ casi ti modo para guiníʼ íquenu casi Jiobá.

12. Xi zusihuínninu pa qué gusaana de guininu mal de cani zaniruʼ ra ridagulisaanu.

12 Ñee rininu mal de cani zaniruʼ ra ridagulisaanu la? Ora binadiaga ca israelita ni guníʼ ca 10 espía que, guniʼcaʼ mal de Moisés ne Aarón. Nga runi gunabadiidxaʼ Jiobá Moisés: «Padxí maʼ gapa guidxi riʼ respetu naa pue. Padxí maʼ gápacabe fe naa pue, naa ndaʼ maʼ bineʼ stale cosa pur laacabe» (Números 14:2-4, 11). Ora guníʼ ca israelita que mal de ca hombre ni gulí Jiobá para saniruʼ lúcabe, bisihuínnicabe qué gápacabe fe laabe. Zaqueca nga zanda guizaacanu, pa qué gusaana de guininu mal de ca hombre ni caquiiñeʼ Jiobá para saniruʼ ra ridagulisaanu, zusihuínninu cará fe ni nápanu laabe.

13. Xiñee cadi naquiiñeʼ guireʼnu gana pa gudiʼnu cuenta cará fe stinu.

13 Despué de maʼ bicábinu ca guendarinabadiidxaʼ riʼ, zándaca gudiʼnu cuenta cará fe stinu. Peru cadi naquiiñeʼ guireʼnu gana. Guietenaláʼdxinu dede apóstol Pedru bidxibi ne birá fe stiʼ. Ne guyuu biaje gupa Jesús xidé bilidxe ca apóstol stiʼ purtiʼ huaxiéʼ fe gúpacaʼ (Mateo 16:8). Neca zacá, zanda guizíʼdinu ti cosa nabé risaca de ni biʼniʼ Pedru despué de birá fe stiʼ ne bizulú biaaziʼ ndaaniʼ nisadóʼ que.

XIMODO GÁPANU FE STI BIAJE

14, 15. 1) Xi biʼniʼ Pedru ora bizulú biaʼziʼ ndaaniʼ nisadóʼ que. 2) Ximodo nga zanda chinándanu Jesús casi ora ñuuyaʼ chaahuinu laa yaʼ.

14 Xi biʼniʼ Pedru ora bizulú biaaziʼ ndaaniʼ nisadóʼ que yaʼ. Laabe guizáʼ nánnabe xhúʼbabe, ngue runi ñanda nixuubabe para nibiguétabe ndaaniʼ barcu que (Juan 21:7). Peru qué ñúnibe ni. Xiñee yaʼ. Purtiʼ qué ninabe nulabe laca laabe, sínuque biiyadxibe Jesús ne gunábabe laa gacané laabe. Pa gudiʼnu cuenta cará fe stinu naquiiñeʼ gúninu casi biʼniʼ Pedru. Ximodo yaʼ.

15 Biiyadxí Pedru Jesús. Laanu laaca naquiiñeʼ chinándanu Jesús casi ora niduʼyaʼ chaahuinu laa, casi rieeteʼ lu Biblia (biindaʼ Hebreos 12:2, 3). Peru laanu qué zanda guidúʼyanu Jesús casi biiyaʼ Pedru laabe. Yanna, ximodo nga zanda chinándanu Jesús casi ora ñuuyaʼ chaahuinu laa yaʼ. Ra guidúʼndanu guiráʼ ni bíʼnibe, ni bisiidibe ne chinándanu ejemplu stibe. Pa gúninu ndiʼ la? zacané ni laanu gápanu fe sti biaje. Guidúʼyanu chupa chonna modo zanda chinándanu ejemplu stiʼ Jesús.

Ora guiníʼ ique chaahuinu lu ejemplu stiʼ Jesús ne chinándanu ni né stale cuidadu, jma zaguidxi fe stinu (Biiyaʼ párrafo 15)

16. Ximodo zanda iquiiñenu Biblia para iguidxi fe stinu.

16 Iquiiñenu Biblia para guquídxinu fe stinu. Gunna dxichi Jesús de Dios nga zeeda Biblia ne ndaaniʼ ni nga zeeda ca conseju ni jma zanda gacané laanu (Juan 17:17). Pa racaláʼdxinu chinándanu ejemplu stiʼ Jesús ne gaca fe stinu naguidxi, naquiiñeʼ guidúʼndanu Biblia guiráʼ dxi ne guiníʼ íquenu lu ni guidúʼndanu. Laaca naquiiñeʼ guyúbinu lu Biblia ca cosa ni qué riénenu. Ñee nuuluʼ seguru maʼ nabáninu lu ca últimu dxi la? Biindaʼ ca profecía stiʼ Biblia ni cusiene de ca últimu dxi ne zaguidxi fe stiluʼ. Ñee nuuluʼ seguru zuni Jiobá guiráʼ ni maʼ bidii stiidxaʼ guni la? Biindaʼ ca profecía ni maʼ guca ne zaguidxi fe stiluʼ. Ñee nuuluʼ seguru zanda gacané ca conseju stiʼ Biblia laanu yanna la? Biindaʼ ximodo bichaa ca hermanu modo nabánicaʼ ra yenándacaʼ ca conseju stiʼ Biblia ne zaguidxi fe stiluʼ (1 Tesalonicenses 2:13). *

17. 1) Xi gucané Jesús guni huantar ca guendanagana ni gupa. 2) Ximodo zanda chinándanu ejemplu stiʼ Jesús.

17 Guiníʼ íquenu lu ni maʼ bidii stiidxaʼ  Jiobá laanu. Jesús guníʼ ique lu ni bidii stiidxaʼ Jiobá. Ngue gucané laabe guni huantarbe ca guendanagana gúpabe (Hebreos 12:2). Laabe qué nudiibe lugar nigubayú ca cosa ni nuu ndaaniʼ guidxilayú riʼ laabe (Mateo 4:8-10). Ximodo zanda chinándanu ejemplu stiʼ Jesús yaʼ. Ra guiníʼ íquenu lu cani maʼ bidii stiidxaʼ Jiobá laanu. Xi zanda gacané lii gúniluʼ ni yaʼ. Guníʼ ique ximodo zabani binni ndaaniʼ Paraísu. Zanda gucaaluʼ o guni dibujarluʼ ni ñuuláʼdxiluʼ ñúniluʼ raqué. Zanda gúniluʼ ti lista de ca binni ni ñuuláʼdxiluʼ niníʼneluʼ de cani guiasa lade gueʼtuʼ ne gucaaluʼ xi ñuuláʼdxiluʼ ñábiluʼ laacabe. Guníʼ ique cayabi Dios lii guiráʼ ni maʼ bizabiruaa.

18. Xi zanda gacané laanu iguidxi fe stinu.

18 Guinábanu Jiobá gacané laanu gaca fe stinu jma naguidxi. Bisiidiʼ Jesús ca discípulo stiʼ guinábacaʼ Jiobá espíritu santu (Lucas 11:9, 13). Espíritu santu zacané laanu iguidxi fe stinu, purtiʼ fe ca nga tobi de ca guenda ni rudii espíritu santu. Laaca zanda guinábanu Jiobá gacané laanu gudxiilunu ca cosa ni rusirá fe stinu. Casi pa raca nagana para laanu gutiidiláʼdxinu stonda binni, zanda guinábanu Jiobá gacané laanu gaca fe stinu jma naguidxi ne gacané laanu para gutiidiláʼdxinu donda stiʼ stobi.

19. Tuu nga ca binni ni naquiiñeʼ cuinu para gaca xhamígunu.

19 Gaca xhamígunu ca binni ni napa ti fe naguidxi. Gulí chaahuiʼ Jesús ca xhamigu. Cani jma guca xhamígube nga ca apóstol que purtiʼ qué nusaanacaʼ laabe ne bizuubacaʼ stiidxabe (biindaʼ Juan 15:14, 15). Laanu laaca naquiiñeʼ cuinu gaca xhamígunu ca binni ni napa ti fe naguidxi ne cani ruzuubaʼ stiidxaʼ Jesús. Ca binni ni dxandíʼ xhamígunu qué rusiguiicaʼ laanu. Ne pa naquiiñeʼ gudiicaʼ laanu xiixa conseju la? zúnicabe ni. Ne pa laanu nga naquiiñeʼ gudiinu laacabe xiixa conseju la? zacaacabe ni (Proverbios 27:9).

20. Xiñee naquiiñeʼ gacanenu xcaadxi binni iguidxi fe sticaʼ.

20 Gacanenu xcaadxi binni iguidxi fe sticaʼ. Biʼniʼ Jesús ne guníʼ stale cosa para guquidxi fe stiʼ ca discípulo stiʼ (Marcos 11:20-24). Laanu laaca naquiiñeʼ gacanenu xcaadxi binni para iguidxi fe sticaʼ. Zacá laaca zaguidxi fe stinu (Proverbios 11:25). Ximodo zanda guquídxinu fe stiʼ xcaadxi binni yaʼ. Ora rucheechenu diidxaʼ, zanda gusiénenu laacabe xiñee runi crenu dxandíʼ nuu Dios, rizaaláʼdxibe laanu ne laabe nga bicaabe Biblia. Laaca zanda gacanenu ca hermanu stinu iguidxi fe sticaʼ. Casi pa gunadiáganu ti hermanu stinu caníʼ mal de tuuxa ni zaniruʼ ra ridagulisaa, cadi naquiiñeʼ guiníʼ íquenu mal de laabe ne cadi naquiiñeʼ gusaana de guininenu laabe. Naquiiñeʼ gápanu paciencia ra gacanenu laabe gápabe jma fe Jiobá ne gápabe confianza ca hermanu (Judas 22, 23). Ñee nahuiiniluʼ ne canazaluʼ scuela la? Pa maestru stiluʼ guiníʼ de evolución, guca nadxibalú ne guníʼ runi creluʼ Dios bizáʼ guiráʼ cosa. Cadi guiníʼ íqueluʼ qué ziuulaʼdxiʼ maestru stiluʼ ne ca xcompañéruluʼ ni gábiluʼ laacaʼ. Zándaca guidxagayaaluʼ ora gúʼyaluʼ chuuláʼdxicabe ni gábiluʼ laacabe.

21. Xi zuni Jiobá pur cada tobi de laanu.

21 Casi maʼ bidúʼyanu ca, gucané Jiobá ne Jesús apóstol Pedru para cadi guidxibi ne gaca fe stiʼ naguidxi. Ne ra gudiʼdiʼ dxi beeda gaca Pedru ti hombre ni gupa fe ne zanda chinándanu ejemplu stiʼ. Laaca zacané Jiobá cada tobi de laanu para gaca fe stinu naguidxi (biindaʼ 1 Pedro 5:9, 10). Neca gúninu stipa para ugaandanu ni, zabeendunu ni galán pur stipa gúninu.

^ párrafo 16 Biiyaʼ tema ni láʼ «Gucané Biblia laacabe para bichaacabe» ni riree lu Torre stiʼ ni rapa ni rusaananenu binni.