Biiyaʼ guiraʼ ni nuu lu sitiu riʼ

guyé lu índice

Chuʼnu gaxha de Dios

Chuʼnu gaxha de Dios

Casi bidúʼyanu lu primé artículo stiʼ revista riʼ, stale binni nanna naca Biblia ti libru ni zeeda de Dios. Ora ruundacaʼ ni ne rinándacaʼ ca conseju zeeda luni runi sentircaʼ nuucaʼ gaxha de Dios ne ránnacaʼ xi pur nabánicaʼ.

Biblia ruzeeteʼ ca binni ni naca espiritual o nuu gaxha de Dios, nabánicaʼ nayecheʼ neca ridxaagalucaʼ guendanagana (Judas 18, 19). Peru ca binni ni cadi nuu gaxha de Dios la? rúnicaʼ ni riuuláʼdxicaʼ ne qué rinándacaʼ ni rusiidiʼ Dios. Peru ca binni ni nuu gaxha de Dios siempre rinándacaʼ guiráʼ ni rusiidiʼ Dios laacaʼ (Efesios 5:1).

GÁPANU ESPERANZA

CONSEJU ZEEDA LU BIBLIA: «Pa qué gapuʼ gana ora nuuluʼ ra nagana la? gastiʼ qué zanda guʼnuʼ» (Proverbios 24:10).

XI RINÍʼ NI. Ora rireʼnu gana pur ca guendanagana ridxaagalunu, maʼ qué rápanu stipa para gudxíʼlunu cani. Peru ora nápanu esperanza rudiini laanu stipa para gudxíʼlunu ca guendanagana nápanu, ne racaneni laanu gánnanu zidiʼdiʼ si ca guendanagana ca ne dede lu ca guendanagana jma naroʼbaʼ zanda cueendunu xiixa galán.

XI ZANDA GÚNINU. Gúninu stipa guiníʼ íquenu ca cosa galán ni gueeda. Lugar de chuʼnu xizaa pur ca cosa ni zándaca gueeda guizaaca o cuézanu guiree ni gúninu jneza, jma galán gúninu stipa pur ugaandanu ca ni maʼ gudixhe íquenu gúninu. Dxandíʼ, laaca zándaca guizaaca xiixa ni cadi cabézanu (Eclesiastés 9:11). Peru stale biaje ora qué guiree ca cosa ca casi cabézanu jma galán riree ni gudixhe íquenu gúninu. Biblia ruchaaga ni bizéʼtenu né tuuxa runi dxiiñaʼ layú: «Bidxiibaʼ biidxiʼ stiluʼ siadóʼ, ne cadi gusaanadxiluʼ naluʼ dede ora gaca huadxí; purtiʼ qué gánnaluʼ paraa guindani ni, pa raríʼ o pa raricaʼ, o pa guiropaʼ lugar ca» (Eclesiastés 11:6).

 GUYÚBINU RESPUESTA STIʼ CA PREGUNTA JMA RISACA

CONSEJU ZEEDA LU BIBLIA: «Gucané naa guieneʼ [...]. Dxandíʼ de guiráʼ stiidxaluʼ» (Salmo 119:144, 160).

XI RINÍʼ NI. Biblia ricabi ca pregunta ni rúninu. Casi ca pregunta riʼ:

  • ¿Xiñee nabáninu?

  • ¿Xiñee nuu stale yuubaʼ?

  • ¿Xi rizaaca binni ora gatiʼ?

  • ¿Xi cabeza laanu despué?

Millón de binni maʼ biiyacaʼ ximodo ricabi Biblia ca pregunta riʼ ne xcaadxi pregunta ni huayúnicaʼ ne yanna maʼ nuucaʼ nayecheʼ.

XI ZANDA GÚNINU. Runi invitardu lii gúʼyaluʼ xi rusiidiʼ Biblia. Gunabaʼ ti testigu stiʼ Jiobá gacané lii guiéneluʼ ni. Laaca zanda cheluʼ lu sitiu nuu lu Internet jw.org o cheluʼ ca reunión ni rápadu. Qué riaxa para chuʼ binni ne qué rinábacabe guna.

XCAADXI CONSEJU ZEEDA LU BIBLIA

Guyé lu sitiu jw.org ne biiyaʼ videu ni láʼ Xiñee naquiiñeʼ gúʼndaluʼ Biblia, nuu ni lu jma de 880 idioma.

GUIÉNENU CAQUIIÑENU DIOS

«Dichoso ca ni nanna caquiiñeʼ Dios» (MATEO 5:3TNM).

GUNIBIÁʼ CHAAHUINU DIOS NI GUNÍʼ GUICÁ BIBLIA

«Laidxiña gaxha de Dios, ne laa zadxiña gaxha de laatu» (SANTIAGO 4:8).

GUIDÚʼNDANU BIBLIA NE GUINÍʼ ÍQUENU NI ZEEDA LUNI

«Nayecheʼ nga riuu hombre ni [...] riuulaʼdxiʼ guʼndaʼ ley stiʼ Jiobá, * ne ruundaʼ ley stibe chaahuidugá dxi ne gueelaʼ. [...] Ne guiráʼ ni guni zaree ni laa galán» (SALMO 1:1-3).

^ párrafo 23 Biblia rusiidiʼ Jiobá nga lá Dios.