Ti binni nanna guni dxiiñaʼ la? riuulaʼdxiʼ dxiiñaʼ stiʼ, qué ribeza gacanécabe laa ne racané xcaadxi neca qué risaca peʼ dxiiñaʼ ni runi.

Nabé risaca gúninu dxiiñaʼ, purtiʼ tiempu riʼ stale binni maʼ qué riuulaʼdxiʼ guni dxiiñaʼ nadipaʼ (Eclesiastés 3:13).

Reyon guníʼ: «Riuuladxeʼ dxiiñaʼ stinneʼ ne runeʼ sentir galán. Ora rúniluʼ dxiiñaʼ stiluʼ jneza la? riuulaʼdxiʼ binni dxiiñaʼ stiluʼ».

CONSEJU ZEEDA LU BIBLIA: «Intiica dxiiñaʼ guʼnuʼ né gana, qué ziaadxaʼ lii xiixa» (Proverbios 14:23).

Ca conseju chiguzéʼtenu riʼ, zacanécani lii chuuláʼdxiluʼ gúniluʼ dxiiñaʼ.

Biʼniʼ xhiiñaluʼ jneza. Pa rúniluʼ dxiiñaʼ ra yoo, ra scuela o lugar ra rúniluʼ dxiiñaʼ, gudixhe ique gúniluʼ ni jneza ne biyubi modo gúniluʼ ni jma galán o jma nagueenda. Pa gúniluʼ ca ni bizéʼtenu riʼ, jma ziuuláʼdxiluʼ gúniluʼ dxiiñaʼ.

CONSEJU ZEEDA LU BIBLIA: «¿Ñee huayuuyaluʼ ti hombre ni runi xhiiñaʼ jneza la? Nezalú rey nga zuzuhuaabe, qué zuzuhuaadibe nezalú tutiica binni» (Proverbios 22:29).

Bizaalaʼdxiʼ xcaadxi binni. Zabeendú binni ni galán pa gúniluʼ dxiiñaʼ stiluʼ jneza. Guzéʼtenu ti ejemplu, pa gúniluʼ dxiiñaʼ ni raca caber lii ndaaniʼ yoo la? zacaneluʼ familia stiluʼ.

CONSEJU ZEEDA LU BIBLIA: «Jma nayecheʼ riuu binni ora rudii que ora ricaa» (Hechos 20:35).

Cadi gúniluʼ biaʼ ganda si. Cadi gúniluʼ biaʼ gunabasícabe lii, sínuque biʼniʼ guiráʼ ni nuu lu naluʼ. Zacá zusihuínniluʼ de lii nga riale ni gúniluʼ. Zándaca zúniluʼ jma dxiiñaʼ, peru cadi purtiʼ cucaacabe lii gúniluʼ ni, sínuque purtiʼ nga nga ni racaláʼdxiluʼ (Mateo 5:41).

CONSEJU ZEEDA LU BIBLIA: «Ti guʼnuʼ ni canabaʼ lii de guidubi ladxidoʼloʼ ne cadi purtiʼ si canabaʼ ni lii» (Filemón 14).

Guca equilibradu. Laani nga cadi guni xhaataluʼ dxiiñaʼ. Risaca guni binni dxiiñaʼ, peru laaca risaca guiziilaʼdxiʼ.

CONSEJU ZEEDA LU BIBLIA: «Jma galán cuee binni tiempu para guiziilaʼdxiʼ ti ratu que cuee stale tiempu para guni dxiiñaʼ o para gacalaʼdxiʼ guinaazeʼ ti puñu bi» (Eclesiastés 4:6).