Biiyaʼ guiraʼ ni nuu lu sitiu riʼ

guyé lu índice

 CA TEMA NI ZEEDA LU CA PRIMÉ YAZA | ÑEE RIUULÁʼDXILUʼ XHIIÑALUʼ LA?

Biechené dxiiñaʼ nadipaʼ ruʼnuʼ

Biechené dxiiñaʼ nadipaʼ ruʼnuʼ

«Maʼ biiyaʼ jma galán gó guiráʼ hombre ne dxandipeʼ gueʼ ne guiecheʼ pur ca dxiiñaʼ nadipaʼ ni runi. De Dios zeeda ca cosa sicarú riʼ.» (Eclesiastés 3:13.) Yanna, pa dxandíʼ racalaʼdxiʼ Dios chuʼnu nayecheʼ ora gúninu dxiiñaʼ, cadi laaca jneza nga nuluiʼbe laanu ximodo gúninu ni la? (Isaías 48:17.) Ngapeʼ nga ni rusiidiʼ Dios laanu lu Stiidxaʼ, Biblia. Guidúʼyanu caadxi conseju ni zanda gacané laanu chuʼnu nayecheʼ ora maʼ cayúninu dxiiñaʼ.

BIYUBI MODO CHUULÁʼDXILUʼ XHIIÑALUʼ

Pa jma riquiiñeʼ guendabiaaniʼ lu dxiiñaʼ stiuʼ o pa jma riquiiñeʼ gaca stipa, cadi guiaandaʼ lii «raca ganar xiixa lu intiica dxiiñaʼ guni binni» (Proverbios 14:23, Versión Israelita Nazarena). Xi raca ganar yaʼ. Primé la? racané dxiiñaʼ stinu laanu gápanu ni guibaninenu. Dxandíʼ na Biblia zudii Dios ni caquiiñeʼ ca binni runi adorar laa (Mateo 6:31, 32). Peru laaca riniʼni naquiiñeʼ gúninu stipa ne gucáʼ íquenu gúninu dxiiñaʼ stinu jneza (2 Tesalonicenses 3:10).

Naquiiñeʼ gúʼyaluʼ racané dxiiñaʼ stiuʼ lii ti ganda gapuʼ ni caquiiñuʼ. Josué, ti hombre de 25 iza guníʼ: «Galán chuʼ binni nayecheʼ né biaʼ napa. Pa racané dxiiñaʼ stiuʼ lii guni ganarluʼ ni caquiiñuʼ la? zanda guininu biaʼsi modo cayuʼnuʼ dxiiñaʼ».

Laaca racané dxiiñaʼ stinu laanu gácanu ti binni risaca. Xiñee rininu zacá yaʼ. Purtiʼ riquiiñeʼ stipa para guni binni dxiiñaʼ nadipaʼ ne zándaca ziuu ora zabeeni gana laa, peru pa quixheʼ chaahuiʼ tuuxa modo guni xhiiñaʼ ne gucaa ique ni la? ziuu nayecheʼ purtiʼ cayuni biaʼ gándatiʼ; zacá zusihuinni riuulaʼdxiʼ guni dxiiñaʼ (Proverbios 26:14). Ngapeʼ nga tobi de cani ruchátipa ladxidóʼ binni. Guidúʼyanu xi guníʼ Aaron, hombre ni maca bizéʼtenu que: «Dxandíʼ ridxagaʼ ora maʼ bineʼ dxiiñaʼ ti dxi o zándaca qué ganna guirutiʼ pabiáʼ nadipaʼ dxiiñaʼ bineʼ; peru nannaʼ maʼ guleenduáʼ xiixa ne guizáʼ galán runeʼ sentir».

 BIʼNIʼ XHIIÑALUʼ JNEZA

Ora riníʼ Biblia de ti hombre ni nanna guni xhiiñaʼ ne ora ruzeeteni de ti gunaa ni runi dxiiñaʼ nadipaʼ la? riniʼni galán de laacaʼ (Proverbios 22:29; 31:13). Dxandíʼ qué zanda diʼ guiziidiʼ binni guni xhiiñaʼ jneza ti dxi si, ne guirutiʼ qué riuulaʼdxiʼ guni xiixa ni qué randa runi jneza. Zándaca ngapeʼ nga ni rucaa stale binni guiníʼ qué riuulaʼdxiʼ dxiiñaʼ stiʼ: qué rinácabe gúnicabe stipa biaʼ caquiiñeʼ para guiziidicabe gúnicabe xhiiñacabe jma jneza.

Cadi guiaandaʼ ndiʼ laanu: zanda chuulaʼdxiʼ binni guni intiica dxiiñaʼ, ni caquiiñeʼ si guni binni nga guiziidiʼ guni xhiiñaʼ jneza. Sicaríʼ guníʼ William, laa napa 24 iza: «Ora guni binni biaʼ gándatiʼ ne guʼyaʼ guiráʼ ni cabeendú la? riuu nayecheʼ. Peru qué ziuu dxi guni sentirluʼ zacá, pa gácaluʼ nachaabaʼ lu xhiiñaluʼ».

GUNÍʼ IQUE XI RIBEENDÚ XCAADXI BINNI PUR XHIIÑALUʼ

Stale binni nisi maʼ caníʼ ique pagala chitíxecabe laa, peru guyuu cuidadu ti cadi guiábaluʼ lu trampa ca. Gunabadiidxaʼ laca lii: «Xiñee caquiiñeʼ guneʼ dxiiñaʼ riʼ. Xi zazaaca pa qué chuʼ tu guni ni o pa qué gúnicabe ni jneza. Xi ribeendú xcaadxi binni pur dxiiñaʼ stinneʼ riʼ».

Nabé risaca ni gunabadiidxanu últimu riʼ, ne ora guicábinu ni zacaneni laanu chuʼnu nayecheʼ né dxiiñaʼ stinu. Jesús peʼ guníʼ ca diidxaʼ riʼ: «Jma nayeche ni rudii que ni ricaa» (Hechos 20:35). Cadi ca cliente o ca jefe si stinu nga cani ribeendú stale cosa ora rúninu dxiiñaʼ, laaca nuuruʼ xcaadxi binni: familia stinu, dede né ca binni ni jma caquiiñeʼ xiixa.

Familia stinu. Ora runi tuuxa dxiiñaʼ biaʼ gándatiʼ para gudii ni caquiiñeʼ familia stiʼ la? racané laacabe de chupa modo. Primé, ruuyaʼ gápacabe ni gócabe, ni gácucabe ne ra gásicabe; zacá nga rúnicabe dxiiñaʼ bisaanané Dios laacabe (1 Timoteo 5:8). Guiropa, rusiidicabe xiiñicabe pabiáʼ risaca gácacaʼ binni runi dxiiñaʼ. Sebastián guníʼ: «Nabé galán ejemplu rudii bixhozeʼ laadu: nacháʼhuibe ne maʼ xadxí cayúnibe dxiiñaʼ de carpinteru. Maʼ bisiidibe naa guuyaʼ pabiáʼ risaca guneʼ xiixa ni iquiiñeʼ sti binni».

Cani jma caquiiñeʼ xiixa. Ti biaje gudxi apóstol Pablu ca xpinni Cristu naquiiñeʼ gúnicaʼ «dxiiña jneza» o nadipaʼ. Xi para yaʼ. Laca laabe bicábibe: «Ti ganda [gápacaʼ] xiixa para [gacanecaʼ] cani qué gapa gastiʼ» (Efesios 4:28). Pa gucáʼ íquenu gúninu dxiiñaʼ para gudiʼnu ni caquiiñeʼ familia stinu la? dede zándapeca gacanenu cani jma caquiiñeʼ (Proverbios 3:27). Zacá nga laani, pa gúninu dxiiñaʼ nadipaʼ la? ziuʼnu nayecheʼ ora gacanenu sti binni.

 BIʼNIʼ JMA QUE NI GUNÁBACABE LII

Lu xa libana bidii Jesús lu dani que, bisiidibe ca discípulo stibe ti cosa: pa «chuʼ tobi de cani runi mandar uguáʼ [laacabe] bultu stiʼ ti kilómetru la? [naquiiñeʼ guácabe] ni chupa kilómetru» (Mateo 5:41). Ximodo zanda guʼnuʼ ni guníʼ Jesús riʼ yaʼ. Lugar de guʼnuʼ huaxiéʼ la? biʼniʼ jma que biaʼ gunábacabe lii. Bicaa ique guʼnuʼ xhiiñaluʼ jma nagueenda ne jma galán cada biaje. Ne pa lu dxiiñaʼ stiuʼ caquiiñeʼ gaca xiixa ni ruluíʼ huaxiéʼ risaca la? bicaa ique guʼnuʼ ni galán.

Pa guʼnuʼ ni bizéʼtenu riʼ, zucaani lii chuulaʼdxuʼ xhiiñaluʼ. Xiñee yaʼ. Purtiʼ cadi cayuʼnuʼ ni tisi cucaacabe lii guʼnuʼ ni, sínuque purtiʼ riuulaʼdxuʼ ni. Lii nga caguíxheluʼ xi zanda guʼnuʼ, cadi sti binni diʼ cucaa lii guʼnuʼ ni (Filemón 14). Ni bizéʼtenu riʼ rusietenalaʼdxiʼ laanu ti proverbio ra zeeda ca diidxaʼ riʼ: «Binni runi dxiiñaʼ nadipaʼ la? zadxiña dxi gaca ti xaíque, peru tobi ni nachaabaʼ la? qué zusaana de gaca esclavu» (Proverbios 12:24, La Palabra de Dios para Todos). Zándaca qué ziuu dxi gácanu ti esclavu casi guca binni dxiqué ne gucaacabe laanu gúninu dxiiñaʼ naná. Peru pa gácanu binni nachaabaʼ la? qué ziaadxaʼ tu gucaa puya laanu para gúninu ni racalaʼdxiʼ, zacá nga casi ora ñácanu esclavu stibe. Peru, pa guʼnuʼ jma que biaʼ gunábacabe lii la? zuni sentirluʼ lii nga riniʼluʼ ximodo guʼnuʼ xhiiñaluʼ.

CADI PURU SI DXIIÑAʼ GUICÁ ÍQUELUʼ

Galán gucaa ique binni guni dxiiñaʼ, peru cadi puru si laani nga guni binni biaʼ dxi guibani. Dxandíʼ cayabi Biblia laanu gácanu binni runi dxiiñaʼ (Proverbios 13:4). Peru laaca caguixhenani laanu ti cadi gundiibi dxiiñaʼ laanu. Eclesiastés 4:6 na: «Jma galán cuee binni tiempu para guiziilaʼdxiʼ ti ratu que cuee stale tiempu para guni dxiiñaʼ o para gacalaʼdxiʼ guinaazeʼ ti puñu bi». Xi cusiidiʼ textu riʼ laanu yaʼ. Ti binni runi xhaataʼ dxiiñaʼ la? zándaca qué ziuu dxi chuʼ nayecheʼ né dxiiñaʼ stiʼ, purtiʼ runiti stale tiempu ne stipa lu xhiiñaʼ. Ti guendahuati nga guni binni zacá, purtiʼ na Eclesiastés zeeda gácani casi ora ñacalaʼdxiʼ tuuxa ninaazeʼ ti puñu bi.

Zanda gacané Biblia lii para cadi gundiibi dxiiñaʼ lii. Dxandíʼ naquiiñeʼ gucáʼ íquenu gúninu dxiiñaʼ, peru laaca rusietenalaʼdxiʼ Stiidxaʼ Dios laanu gánnanu xii nga «ni dxandí risaca» (Filipenses 1:10). Gunáʼ nga caadxi de laacani yaʼ. Zapuʼ jma tiempu para familia stiuʼ ne para ca xhamíguluʼ. Peru ni jma risaca nga zapuʼ tiempu para gúʼndaluʼ Biblia ne guiníʼ íqueluʼ xi cusiidini lii.

Ca binni ni nanna guni dxiiñaʼ riuucaʼ nayecheʼ ora maʼ cayúnicaʼ xhiiñacaʼ. Guidúʼyanu xi guníʼ William: «Dxiqué gupaʼ ti jefe ne nabé galán ejemplu bidiibe laadu pur modo rúnibe dxiiñaʼ. Guizáʼ rúnibe dxiiñaʼ ne nabé nayecheʼ riuu ca cliente stibe pur modo runi tenderbe laacaʼ. Peru ora maʼ biluxe ti dxi dxiiñaʼ la? rusaanabe guiráʼ ni ne rucaa íquebe familia stibe ne religión stibe. Ne laabe nga tobi de ca binni jma nayecheʼ runebiaʼyaʼ».