BO wuntomba kuzaba thangu, mbi wumvanganga? Ḿba wummonanga mu relógio yi koku voti yi kibaka. Ḿba ngye wulenda mona ti tweka 14h30. Mvutu mbi wulenda vana boti nkundi’aku wube kukuvula, “Thangu mbi tweka”?

Mwingi wumvana mvutu, wulenda tadila theti bwidi batu bantubilanga thangu ku tsi’aku. Dedi, ngye wulenda tuba ti “tweka 1h30 va masika,” voti “tweka 13h30” boti wunsadilanga relógio yidi 24h. Mu bibwangu binkaka bantubanga ti “30 ma minutu mikhambu mwingi kutuka 14h.”

Bwidi batu mu thangu yikhulu baba tubilanga thangu? Bawu baba phila ziwombo zi kutubila. Matangu ma Kiebeleo mansadilanga bikuma dedi: ‘va meni’, ‘va masika,’ ‘thangu-mbata,’ ayi ‘va bwilu.’ (Ngenesi 8:11; 19:27; 43:16; Deutelonomi 28:29; 1 Mintinu 18:26) Vayi khumbu zinkaka Kibibila kinsadilanga thangu yinluta dedakana.

Mu Isaeli yikhulu, baba sadilanga nkengididi, ayi va bwilu baba luta vangilanga mawu. Basi Isaeli bakabila bwilu mu bitini bitatu batedila ‘thangu yi minkengididi.’ (Minkunga 63:6) Buku yi Nkongudidi 7:19 yintubila matedi ‘thangu yi nkengididi wumwadi va bwilu.’ Mu thangu Yesu kabutuka, basi Yuda bakaba thangu yi minkengididi va bwilu mu bitini binna, dedi buba vangilanga basi Ngelese ayi basi Loma.

Mu Masonoko mantubila luzingu lu Yesu, musonama zithangu beni khumbu ziwombo. Dedi, ‘mu thangu yinna yi bwilu,’ Yesu kadyatila va mbata nlangu bo kayenda mu bwatu buba minlonguki myandi. (Matai 14:25) Yesu wutuba mu kinongu kimweka: ‘Boti mfumu yi nzo zebi thangu mwivi kalenda kwizila va bwilu, khanu kalendi baka ko bu kulekila mwingi mwivi kabika kota mu nzo’andi.’—Matai 24:43.

Yesu wutubila zithangu beni zinna bo kalubula minlandikini myandi, bila bawu ‘basa zaba ko thangu mbi yela vutukila mfumu nzo; kani va masika, kani va khati bwilu voti va thangu yinkokulanga tsusu voti va thononu kilumbu.’ (Malako 13:35; tala matangu madi va wanda mu nwt-TPO) Thangu yitheti yiba ‘va misika’ yiba toninanga va khotolo mwinya nate 21h. Yimwadi batedila ‘va khati bwilu,’ yiba toninanga 21h nate va khati bwilu. Thangu yintatu, yawu ‘thangu tsusu yinkokulanga,’ voti ‘mu thangu tsusu yikokula,’ yiba tonanga va khati bwilu nate 3h va meni. Ḿba yayiyi thangu tsusu yikokula va bwilu Yesu bantula ku buloku. (Malako 14:72) Thangu yinna batela ‘va thononu kilumbu,’ yiba tonanga 3h va meni nate va mbasukulu mwinya.

Kheti mu thangu yikhulu kusa ba ko relógio buka befu bubu, vayi bawu baba phila baba tubilanga thangu va mwinya voti va bwilu.